Shvring Zàywà

Shvring Zàywà

  Móng døngtáng cèrìé, Yehowa svng zàywà èwànø̀ng. Yehowa svng zàywà angshá:rí shètànøng.  Yehowa svng zàywà èwànø̀ng; ang bø̀ng svng shètànøng. Tiq ni nø tiq ni Ang chutchv́ng we jejú Dvbù shv̀ngkà dèshv̄ngnøng.  Vsvng dvcìrì dvhø̀ taq Ang ngø̀r dvgùng dèshv̄ngnøng. Bashà rì mv́rdv̀ngø Angdvdv̄m vtiqlv́m bv̀nlìrì shètànøng. Kadø íe wani Yehowa nø rīng pè í nø, vtv̄ngshaq shvrīng vdū we íe. Mvshá ìnvtrì í dv́ngte mvdv̀mø Ang svng vpǿ svre vdūe. 

  Pàwálv́m wani vsvng dvcì rìí noqò we mvshá ìnvtrì í dv́ngte nø, pvrà hāng wa íe. Iwe, muqlàngrì pv́n yà:ngà pè nø Yehowa mv̀ng íe.  Pòngbàng shór we nvng rīng we koqkv́m dvgùng nø, Ang mv́rdv̀ngø v̄le. Shaq nònggùn jòr we nvng vnvp nø ngø̀r we gø Ang shànshérrà taq v̄le. Vsvng dvcìrì shvngbeé, Ngø̀r dvgùng nvng nònggùn kv́ng we nø, Yehowaò wā Iwe svng nàchàngnøng. Yehowa Ang bø̀ng svng dvgùng shvrīng vdū dø shèrīngnøng. Núnglv́m èlv́ngnøng nø, Ang dòngpè tø̀mrì vdòng ègòng ránø̀ng. Shanshér dø ègwāshìnø̀ng nø, Yehowa svng ènoqnøng. Móng døngtáng cèrìé, Ang mv́rdv̀ngø svre nàdv̀nnø̀ng.

  Vsvng dvcìrì dvhø̀ taq, “Yehowa nø koqkv́m wáshìe,” wa dèshv̄ngnøng. Jø̀ngjǿng, rvgaq nø ngv̀ngdøng dø shvzøngshaq í rvtnø, shøt mvdv́ngshì. Vsvng dvcìrì svng A:ngí màyvp dø rìn vrá kàngé lú:ngòe.Yehowa mv́rdv̀ngø muqlàngrì shaqshaq wā nø, rvgaq gø laq dvbù.Nvmukdvra nvng we vdòng taq vl dv́ngte gø laq gø̀m laq vhoshi.  Zømwàng shønsári nvng we vdòng taq vl dv́ngte gø laq shvwéshì. Wekvt nø mvlø̀ng shǿngkàngrì gø dvbù nø:tní zàywà wa longe.  Kadø íe wani Yehowa di daqe. Pàwá wani rvgaq svng kàngélv́m rvt Angdi daqe. Døngman nø:tní rvgaq tø̀m vsvng rì kaq kàra:tnò nø, Ang dø̄ngtǿng kv́mv́m daq nø:tní vsvng dvcìrì kaq, A:ngí kàngé daqòe.