Vlàngré bàn taq Mv́npè Gvray kaq dvdv̄m rǿn rà we

Vlàngré bàn taq Mv́npè Gvray kaq dvdv̄m rǿn rà we
“Ngà nø yarì kaq màshvrúng,” èwalong we angnǿngrì nvng angni mvgv́mrì shini mvtuq ra vzv̀ng, nà vlàngré lvpat taq, Mv́npè Dvmø̀ svng dvdv̄m èrǿ:nò. Nv̀m, gálòng, shvlá nvng kùrniprì shini màmø̀lv̄m ke, shø̄ zaqvm mèpvng rvmøt shini màkǿn ra dvgvp, Ang svng dèdā:mò.Wenila taq nø chø̀m roqshúrì gø vdv̄rké lú:ngòe. Shvrērì gø vngǿm longe.Jøklv́m pv̀n mvluq rvt loklang jø:kngòrì gø rip nø mvngatshì longe. Vwvt bv́ngkàrì taqkèní dvjaqrì gø nē vyǿm longe. 

 Wamà tvrà bv́ngkàrì cøt bǿò nø, loklang jøkshaq gø vnǿnv̄me. Cacèrì gǿng we shaqí vsvngrì vshat lōng nø, zàywà wáshú zvmìcè rìò shaq gø mángmáng wacè táshì longe.  Wemvdv̀mø, vsvng nø vngv̀m vgo nvng tvrà yv́ng svre vnv́n longe. Bùshvyøm wvt long kvt nø cóngkutrì dø shv́lshì longe. Mvyǿ nøt yoni gø zīlv̄me. Wekvt vsvng nø dvciq lvpat chø̀m svng lov̄m nø, rv̀ngshvng warì nø wamà tvràø vlvmshìv̄me.Wervtnø̀ gv̀msùng bv̀nrì shini mvdvt dvgvp, shékūng shini màgvyøpshì ke; tìdùng yv́ng gàngshø̀ng gø shini mvdev̄m dvgvp, sóng* taqò chvnglvng shini màgvyaqshì dvgvp, Gvray svng dvdv̄m èrǿ:nò.  Wekvt vbāshi nø angwà dø rvgaq svng vtv́ngv̄me. Pvlàcè nø pvlàcè zí daqì pè Gvray yv́ngsvng vwv́ngv̄me. “Vhúng í mvdv̀m vhúng, shvngbe nø vhúng íe,” wa shvngøtshú pè shø̀ne.
Shvngøtshú pèò kàdvtøm
Shvngøtshú pè nø zitnøt v̄l pè í mvdv̀mø bashàrì svng gø a:ngí shánøt paqzí shvngø:tnòe. A:ngí dak dvdā:mò nø, gùn dvtø:pmò dá:ngí kàshvgøp gø mvme vra:ngòe. Shvngøtshú pèí nø ngø̀rngun we kàrì láò nø, vdu vbóng we kàrì màléshì dø vrūòe. Zitnøt v̄l vsvng kàrì nø vsǿr we bv̀nghǿ dø íe. Dvkǿmshaq zitnøt kà yarì èshø:pmò lòng nø zv̄ngwa yǿkéò we shv̀mshirì dø íe. Yarì nø Vyv̀ng Roqshú tiq pèí zí daqì we kàrì íe.  Ngàcè pèé, yalòng mvdv̀mø rvm nø màrulv́m vgám dvtóngvtnøng. Kàru bokrì vrūlv́m nø bénì mvnì. Kàrurì svng mvnøklá èyishì kèní nø vdè góng svng dèdashì we wa íe.  Etá bǿà kàrì shvngbe ang dvtø̄m nø yalòng íe: Gvray kaq svre nàpǿò nø, Ang dvkv́mkàrì cv́n dèdø:ngò. Yalòng nø sv́ngzà cèí rí rà we bv̀nlì íe. Pàwálv́m wani shvla lòng gø, mvgv̄m lòng gø, vmáshaqrì í dv́ngte nvng wàò bv̀nlì í dv́ngte kaq Gvrayí kà rvwv̄n daqòe.