Wv́ngzà shvlá rì gø mvrà v̄l we

Wv́ngzà shvlá rì gø mvrà v̄l we

 Wervtnø̀, vsvng kaq kà èrvt vsangé, nà vzvtshilv́m pà gø màvl. Nàí kà èra:tnò vsvng rìí wàò rìni nàí gø èwàò we í rvtnø, nàí vsvng kaq kà èra:tnò kvt nø nà vdè svng gø kà èrvtshì we íe. Vrá wedø í rì wàò vsvng kaq Gvrayí kàngé daqò lòng nø, dìnglòng svng cà:nò nø kàngéò we nøngmaqí sháìe. Vsvngé, nà vdè gø wedø èwake, wedø ípv̀n warì kaq nàí kà èra:tnò nìnø, Gvray kàngé lòng kèní nà lutshø̀ng longe èlv́nshi ma? Mø̀í ni, Gvray Ang nøt shvla lù:ngí nà svng nøt língshì dvzv́rlv́m rvt èshø̄l we svng nàí mèsháò nø, Gvray Ang pǿng we nøt shvlá nøt svng gø, tønzán nøt nvng nøt yvng nøt svng gø yv́ng mètv̀má:mò ma?

Dvshàshà nøt èzaq nø culshì mètá weí, Gvray shv̀mná høpnøt nvng døngman dø kàngélv́m dvtan daqò we angni høq, nà nø nà dvpvt shv̀mná høpnøt lè ènvngshì we íe. Gvrayí nø, kagǿ svng gø, a:ngí wàò lòng cà:nò nø teq daqòe.  Shvla dø wáshì we taq tǿng weí, Gvray dvgùng nvng vpǿ shvring we nvng shí bøp mvsháò we gø̀nshaq lòng svng láò vsvng kaq nø, A:ngí dvciq lvpat gø̀nshaq zí daqòe.Inìgø, dønglòng svng màtáshaq, vdè nøt wa cv̀n nø mvgv̄m màshvla tvrà cà:nò vsvngrì kaq mv̀ng nø, shv̀mná høp we nvng shv̀mná vcōr lòng dvpvt daqòe.  Mvgv̄m màshvla dø wáshì we sv́ngzà wàngcè gǿ vrvm svng nø, nv̀mlat nø Yuda vsvngrì kaq, wemèpvng nø wv́ngzàrì svng gø, dvshà mvhøt yv̀ng nvng nøtyùr lòng dvpvt daqòe.  Shvla dø wàò vsvng gǿ vrv̀m kaq mv̀ng nø, ngø̀rdvgùng nvng vpǿ shvri:ngò we nvng mòngzø̀l we, vzv̀ng nø Yuda vsvngrì kaq, mèpvng nø wv́ngzàrì svng gø dvpvt daqòe.Kadø íe wani Gvray nø vsvng mv̀rshv̀m màrvwìng.