Zitnøt láò rìí lú:nò we gønpaq

Zitnøt láò rìí lú:nò we gønpaq

 Ngàcèá, ngà kà svng nàtōshì nø, Ngà dvkv́mkàrì svng nà nøt taq èshøpshì. Nà vnà nø zitnøt svng èyuqshi. Nà nø:tní gø cíngrálnøt kà svng ècà:nò. Nà nø rvwv̄n shánøt lún høq èkórshi nø, cíngrálnøt v̄l høqshaq nàtírshì nø èrøtshì.Gv̀msùng svng láò dø zitnøt svng èláò nø, má yà:ngà we pø̀bø̄m dø èláò nø nàjá:ngò kvt kèní nø,Yehowa svng vpǿ svrēnøt nø nàí rvwv̄n èshá lú:ngò nø, Gvray kaq shánøt lá èlún lú:ngòe.Pawá wani zitnøt nø Yehowaí zi daqe. Shánøt nvng cíngrál kà gø Ang nònggøp kèní bunge. Nøt mvdóng rì dvpvt nø A:ngí shvlā we gvcvt bvnyā rvdāāòe. Nøtdøng rì dvpvt Ang nø dvgà íe. b

Pàwálv́m wani vdu vbóng dø kà ra:tnò lòng svng A:ngí gāraò nø, ang svng nøtlø̀m vsvng rì tvrà A:ngí roqrīmāe. Weyv́ng kèní nàí døngman we nvng vdu vbóng we tvrà, dvrá we tvrà nvng tvrà shvlá í dv́ngte svng rvwv̄n èshá lú:ngòe. Wekvt zitnøt nø nà nøt vdòng svng gòngvm nø, shánøt gø nà dòngnøtmvsø̀n dvbúrà í longe. Dak rvwv̄nnø:tní nø nà svng ègar nø, cíngrálnø:tní nø nà svng nàcún nàsòngvtne. Mvgv̄m màshvla tvrà rì kèní gø, gvzv̀m bvlèkà shø̀n vsvng taqkèní gø, zitnø:tní nà svng shèlutnvtne. Vsvng werì nø mvdóng tvrà gu:rò nø, dø̄ we tvrà cv̀nlv́m rv́lshìá:mì. 

Angmaq nø màshvla lòng wàlv́m shvwéshì nø, vsvng mvgv́m rìò gvzv̀m bvlè lòng taq lè dvbùe.  Angmaq tvrà rì nø dvgoqāò nø angmaq cúnshì we vjàng laqyà gø vyvpme.Zitnø:tní nø góngnv̄mmè kèní gø, svng gvlv̄ngmèí dvchap we kà taqkèní gø nà svng shèlutnvtne.  Vsvng wemè nø vlàngré lvpat taq shvzøngshì yàng we, dø̀ngku pè kèní rv́lshì nø, Gvray mv́rdv̀ngø kàgvp gvpshì yàng lòng svng gø vnáshìe.  Kadø íe wani wemè chø̀m nø shìlòng svng vshūng mv̄nshì nø, ang tvrà rìí gø shìlv́m lòng svng wa shø̄:lòe. Ang yv́ng gòngvmrì kagǿ gø vrá màtv́ng ra. Ang nvng yøp rì kagǿí gø gø̀nshaq tvrà vrá yv́ng mvlú:nò.

Wervt nàí nø vsvng shvlá rì tvrà taq wa ècà:nò. Døngmanrì tvrà svng wa yv̀nggùnggùng tènù:ngò.Pawá wani nøt mvdóngrì nø, móng taq v́l lú:nò nø, shvràlv́m pàzì gø màvl rì wa rvgaq taq ngv́mshì longe.  Wedø ínìgø, dvrá mvcv̀n rì mv̀ng nø móng taqkèní dvkoq rvt we vhǿ:mò nø, dvgoq bvnyā lá:ngò rì nø rvgaq kèní put bǿòe.