Àngdèò shvngwang vdòng taq mòngzøl døvl sháshì rà we

Vdèò lvpvt svng dvsøpshì lvm nø àngdè taq wa mvdøng íe wa we ínì gø vdè taq kèní wá mvlúnshì we dvng gø vl le wa lòng svng gø síngshá nø vto shì ra e. Kà shvbóng nøtyøl nøtdvshà lvmrì nø vdè taq kèní vgám nø yølshì màshvla we íe. Tiq kvt kvt vdè mèshóngshì we bvnchvt rì vkøn we vdòng taqøgø vl vdu ràlòng svng gø síng sháshì ra e.

Vsvng lvpvt taq vdèò shvngwang nvng dvgá vsvng tiq gøò shvng wang wa we vl e. Zìlàngré tiq gøò lvpvt taq mòngzøl dø vl lúnlvm shóngshì we íninø vdèò shvngwang svng síngsháì nø vl sháshì rae. Nøng maq gø vrvm taq nøt mvsøn nvng laqyà shvngwang wa we vl le. Vdèò shvngwang nø àngdè nvng wa sing we ínø dvgá tiqgøò shvngwang svng vlíng vpoã mvlún shì. Dvgá tiqgøò nøt laqyà, dvdamò we kámnøt síngshá nøtrì svng upkángà mvlúnì. We døí we dvngrì taq møngzøl dø vllún lvm kadø wa dvgø shì nø vl rà we svng dvtit tvle lvm íe.

Vsvng tiqgøò lvpvt taq àngdèò nvngòn kùngàrì vlwe dvng nvngkadøí we dvng taq nvngònyúmì we dvng svng síngsháshì lvm nø mvdøng vchyakìe. Nøngmaq gø vrvmò lvpvt taq vdèí dèdamò we zìdvng mangárì jor nø vhánglún lvm dvpvt nø yàngmadat dvzaq shì ra we íe. Vsvng tiqgøò lvpvt nø todø tiq mvnø taqwa vlì we møí tiqni mvdam tiqni nø vlíng manshàì we wa íe. We døí we vdòng taq vdè shagóng, lvpvt svng dvgá vsvngrì nvng shvdún shvbóng shàì we dø møí nø vdèí dèdamò we mvngá svng lúnhøq dvzaq shì rà we íe.

Vdèò lvpvt taq nøt mvsøn mòngzøl lòng lúnlvm dvpvt nø vdèò lvpvt svng síngsháì nø vtoshì lúnlvm nø nvmlat mvdøng vchyak e. Vdè nvng vrámì we rømnvngrì taq tiq gø nvng tiq gø mvbúngì tiq gø gø taq nø shvmná wa mvgør we ínø ti gø nø nøt nímshì sháò nø nøt yang we rømnvng tigø gø taq nø gømvŕsì gvza shvla we rømnvngrì dø íwe vsvngrì nvng vzømì we vdòng taq vdè nø kadøí we lvpvt taq cúng shøne wa lòng svng síngsháshì rae. Vdè nø kadø íwe nøt mvsøn laqyàrì taq cúnshønge wa lòng svng shálún shì lvm dvpvt nø, vsvng tiqgø svng shvgùn shvrìngò nø vpøò we svng eyàngvtnò dvgvp nànøt vdòng taq kadø dèdamò emá, vsvng dvgá dø tiqgøí dvbù lvm vhømvtnò dvgvp nàtaq mvnúr nøt ezángshì emá vsvngrì ò lvpvtrì svng wa eyàngò nø dèdamò we ímá yadø íwe rìtaq kèní gø vdèò lvpvt nøt mvsøn mòngzøl lòng lúnlvm nø mvl long. Nøtsun paqzí vdèrì taq kèní shønò we taq vsvng dvgá dø tiqgø mvdàm taq gvlshì we vdèò nøt nø jøng jøngni vde taq vlwe nøtmvsøn lòng bung we íe wa nøshøne.

Vdèò shagóng lvpvt svng mvkámnø vtoshì we mvl we tiq gø taq nø dvshángshì nø vcha we, gvzà nøt mvgør we, nøtcvm nøt yòlwe, vsvngí vpø shvring lvm lòng svng wa mvp we, vtangshaq svre nø nvrøm dvbumshì we, vsvngrì kaq wa yit kèwe, vsvng dvgárì kaq mvkám nø mvnúr we nøt laqyàrì vlsháòe wa nø shálún shìe. Vdègóng vdè vtoshìnø kám we tiqgø taq íni nøt mvsøn mòngzøl lòng vtoshì lúnò we mvtaq vsvng ímvnúr nø sipla we svng gø svre nøt mvgvlò wá vdu we bvnlì døngjárì svng wá dángò dángte dvzaqshìe wámvdángò we dvng taq ínigø nøt yòl we mvl. Mvdøng mvman we bvnlì waò nø vyà we gø mvl we í vsvngrì taq kèní vpø shvring we lòng svng vtoshì lúnòe. Mvdàm kaq tálún bøshà we rì mvtaq nøngmaq gø vrvm taq Gvray kaq kám vlømshì lvm gø mvdøng vchyak we íe.

Vdè taq vtoshì lúnbøò we jàgvmsùng zaqshuprì nø vdèò nvngòn kùngàí dvzaq shì we taq kèní lún vdu rvtø wa vtoshì lúnìe wa nø gø dvdamì we laq mvl. Gvray àng taq kèní íwe cúnshàì we nvng góngshiq shànlún we jejú rvtnø wa vtoshì lúnì lòng svng síngshá lvm gø vchyak e. Tiq kvt kvt nøng maq taq bøn mvyø lóng mvbøn lún mèyø lòng mvlún daqì dvgvp Gvray kaq mvrà shvri sháìe vdè taq vl we shvla we jejú rìdvpvt íni oqà wá mvshái.

Kadø íwe rvtø taq ínìgø Gvray kaq kám vlømshì nø Gvray nvng tiqdø íshàe wa we nøtmvsøn taq kèní vdèò lvpvt taq mòngzøl lòng vtoshì laqlúnì wangnø zìlàngrérì svng nvngòn ziwe svngkà dvtit tvle we ayáng narò we.