မိမိကလေးကို ချစ်တတ်ကြပါစေVdèò Angcèrì Svng Shóngshì Lvm Waì

မိမိကလေးကို ချစ်တတ်ကြပါစေ
Vdèò Angcèrì Svng Shóngshì Lvm Waì
Vdeò angcèrì svng shóng shiwe nø Pè/mè maq gǿ vrvm taq vlwe íe. Wedø ínigø tiqmaq angpè angmè maq nø vdeò
angcèrì kaq svng gvza dvdvm weí shòngwe shóngnønt chávleò nø shò:ngò we dang nø mví, løp mò, shvyúmò we
dang ív̀:me.

Vdeò angcǿ angcèrì kaqsvng jø̀ng jǿng shóngshi we íninø shiqshvn lvm dang, Paqzí dang nvng Kv́m nønt tvra dang rìsvng
cv̀ndøng lúnò høq shvngøt dvtú rawe íe. Wedø paqzí zishi we dang taqnø lega taq kèní gø, kàrì taq kèní gø, mòngkà taq
kèní gø shvngøt shìwe, svshvt shìwe gvza vle. Jø̀ng jǿng vchvk mvdøng nø “chvqdvp cv́n dvgømlvm” wa íe.

Cv̀mwe rvtø kèní cv̀mréò vsvk ang rvtø nvng tiqdø wurshér shìnø nvmlvt góng shvnshér shìlvm svng shvngøt dvtú ràe.
Cv̀mré a:ngí ni wá mvngøtnò ke angpè angmè maqí wurshǿl àònø cv̀mré a:ngí ni wurshǿl sháò høq shvngøt dvtú rae.
Wurshǿl we dang taq kèní vna yógà rìsvng vgv́mlún wesvng shá dvzvr ràe. Denila bø̀nwe vna yóga íwe jényet dukgwí,
wet dukgwi nvng Covid-19 rìsvng vgám lúnshì we dang svng shá dvzv́r rae. Wur shvnshér shìwe taq kèní pvwáza
pvwá vshòng we rìsvng vgv́m lúnòe.

Paqzí vdè rìí shønò we kà taq cvmré tiqgøò paqzí dang svng vgo mvrcì yvng gòng we høq shaqré rìí wálúnò we ínìnø
cvmrécè nø pán vshvt weí (high rates) vháng lún we cvmré tiqgø ílonge. Angí waò we laqmù laqyà rì kení vsak cvm we
ínìgø shvlà dødvtvn lún lú:ngòe.Angpè angmè maqí zùng yvng kení ziwe lèga rì svng cvmrérì nvng tiqdø shvnvng yvng
rúng dvbvng nø da:ngò høq wá dvzvr wenø bvnlì tiq lòng svng dvdvng lvm nønt taq za:ngò nø bvnlì dvdvng lvm laqyà rì
vl longe.

Angpè angmè maqí shvnvng yvng vlnø bvnlì kaq nønt lúm lvm dvpvt dvtú we cvmréò lvpvt vháng lvm tvrà svng dvbvng bøà
wanø shøn lún shìe. Paqzí shawe cvmré tiqgø ílún lvm dvpvt angpè angmè maqí cvmrérìò nønt lúm we yv:ngò nø nvnggùn
zíò nø tvrà shøl shvngøt dvbvng ràe.

Nøngmaq nø kadáng te cvnshìwe ínøgø chvpdvp waò lòngí cvnshì shvlae. Dòrò møt svra nø dorò møtnø vlrae. Døngmvn
we vsvng tiqgø nø døngmvn we tvra dang cvnràe. Vdè nø vdeò vyá shìlún lvm, vdè nø vdè vyá shìràe. Vzaq Shìwe vsvng
tiqgø ílvm vzaq Shìwe bvnlì waràe. Pvlacè dang taq vháng we ínìgø, mònggàn dang taq vháng we írìnø, vdè nø vdèò
góngsvng øpshì lúnlvm nø vchvk mvdøng íe.

Cv̀mrérìò lvpvtnø angpè angmè maqò lvpvt taq kèní pv́ng shìwe gø íe. Wervt cvmré tiqgø dvté lvm nvng vháng vlún lvm nø
Angpè angmè maqò døngjá íe. Angpè angmè maqí cvmré rìsvng dvkùm dvtéò, Shvngøt vjøn lvm nø gvzà vchvk we íe. Wedø
cvmré rì vháng lvm dvpvt shaqré rìò wur taq vhap we íe,wàng dvtit dvle nø dvshvt mvyv́:ng we íe. Shv́ngbe kaqsvng oqa.