“ Zidvng vháng dø banchvt pvrvn lvm mvtú (5) dang "

“ Zidvng vháng dø banchvt pvrvn lvm mvtú (5) dang "

Yà shvra taq zidvng vháng dø wàwe taq nønt mvsøn vzàm vháng lòng svng wàwe íe.

Banchvt tiqlòng lòng, vzì vrùng wàwe tiqpvn pvn svng zidvng vháng dø pvrvnà rì nø, àngdeò nønt vjángshì lòng svng vzàng pvrvnà we íe. Wèdv'ng íwa banchvt svng zvndvtut pvrànàe. Shøn mvyøn we taq àngdeò vdòng nønt svng vzàng dvgø'āe. Wèdv'ng íwa banchvt svng dvgø'āe.Íni nø banchvt rì svng zidvng vháng dø kadø wā pvrvnà lvm íe?, Yàng lvm wàì. 

(1) "Nònggup nàyáshì "

Banchvt tiqlòng bøná:mì, dvdvm nà lébø'ā laqwā. Vzì vrùng mè wàni. Àng dvja taqkèní pvrvnà dvgvp vshø'ng màshø'ng íwe rvtø taq dvtut gø shø:nàlvm rvt mè- dègvngshìni. Vsvng wà pvn nø Vsvng gø' vrv'mì àngde kaq svng síngàlvm mvrà. Tiqdvshaqí pvrvnà mvyø' we nønt svng ègwurò.Tiqdvshaqí pvrvnà mvyø', lún mevyø', àng dvjarì nø téwa rvzaq sháòe. Nvmlat tiqtaq wá rà we nø nònggup vyáshì ràe.

(2) "Dìngdø evl."

Nønt dìng kvtwā mvr vtán nø døng lvm vlē. Pàdang taq íni gø mvr taq mè-nàru nī. Nønt dìng dø ègvlshì. Shaqmè í Na héshì. Dìngmàn lòng svng yv'ng lúnò we vsvngrì vlē walòng svng dvdvm leqlúnò. Nønt dìng lòng vtoshì èlún lú:ngòe. Tiqdvr Vsvngí àngdeò vjang laqya vdòng nønt mvsøn vzàm rì svng tvp-vm mè-dvzvrnì.

(3) "Àngké lòng svng è láò."

Vkvt bønbúng we tvrà banchvt nø vjú lúnshì lvm lòng kèní bønbúng we banchvt i mà?, Dvdvm vléshì yv'ngkèní bønbúng we banchvt i mà?, Mvdìng mvmàn yv'ngkèní bønbúng we banchvt i mà?, Dvshv'ngshø'ng yv'ngkèní bønbúng we banchvt i mà? Vkvtdø banchvtnò mvtú àngké rì svng vzàng lá rà we íe. shvngbe svng dvkøm nø Kà rvt mvdaq we íe. Wè pvn dvci í rvt, wè pvn shvngømré í rvt, vjang laqya mà-shvla wànø dvdvm we dang svng vyáshì ràe. Banchvtnò àngké lòng svng  tøpni tøpràng sháshì bø'nøwā pvràn vdùe màdu walòng svng shálún shìe.

(4) "Shvra tvle nø dèdvmo."

Ngà àng shvra taq dv'ng vl nøng nø kadø pvràn lvm íe, àngde nø àngde èrøtshì. Banchvt svng Pvràn we àngshvr tiqpvn í vdùvmè. 

(5) "Jór Shø'm lòng mø-í."

Banchvt pvràne walòng nø shvyúmà we ( Compromise ) tiqpvn íe. Nònggup vyáshì lvm dvpvt, Vsvng dvgá kaq gvzà mv-shønlvm wàwe, àngde cìpshì lvm rvtø taq mvr gvzà mà-líng mvzā dø è wáshì. Mvr lún meyø'lòngí vjú vmyat svng cø'mkàmshì nø jórlòng í rvtlvm nønt svng catlvm rvt íe. Ngà kàgø' Øngàe walòng vchvk mø-í. Ngàí yalòng banchvt svng vjú vl dø kadø wā pvrànlvm íe, walòng mvng mvdøng vchvk nge.Banchvt tiqlòng svng shòní lap cìpshì nø shòní lap zvndvtut vrv'm vrá weí vjú jèjú mvmè vtōshì lúnò we Kà shvbóng rì mvmè vlē. Win- Win Situation wàwe nø wè dø íwe àng dvja pvnrì svng shøn we íe.