Angcì angkàng rìkaq svng mvkok shìràwe ang pvlí pvlaq rìò døngjá

Dèni ò zìlàngré nvng singwe tvyø taq nø angcì angkàng rìkaq svng mvkok shìràwe ang pvlí pvlaq rìò døngjá wawe kà vgo taqkèní dvtit tvle lvm íe

Shóngshøng we zìlàngré vnvm vchangrì angcì angkàng wawe nø chøm døngku tiqlòng dvpat dvgø zíò we shøngtøng nvng vbónge wae. We shøngtøngò angrø rìnø pvlí pvlaqrì nvng shvbóng shì we íe.welòng shøngtøng ngàngdøng dø cúnshìnø shvlawe angshí angwvt rì zílún lvm nø angrø taqkèní we shøngtøng dvpat rà vchyak we tì nvng nvngòn ziwe nvmpøn rì tùbum-a ràwe íe.

Ínìnø angcì angkàng rìkaq lvpat yanggúng shiqshàn nø cúnshì lúnlvm dvpat kadø wa mvkok shì ràwe ímá? Dvdam shàì.

Angmaq taq tiqni mvdàm tiqni vsak te nø svrøng mvnshì weí angmaq taq kadø íwe vm-aq lvm pvnrì rà vchyak emá? Angmaq vm-aq mvyø we pvnrì dvgø-a we mø:íni angmaq ò shiqshàn tvrà dvpat cìrì lvjáng-a we dangrì svng shvlá wa yáng-a nø mvkok ràe.

Angmaq svng rvtø zíshì ràe, angmaq taqkèní cvnshì we paqzí lushì we wáshì ràe. Àngmaqò lvpat mvkrøm mvdøprì taqkèní dvtit tvle werì wáshì ràe.

Wedø wáshì wenø angmaq svng nøt shømnø dvbù dvzvŕ we gø íe. Angmaq taq svrøng ra nvng nvng mvzøng nøt yúm rawe ínø kà tiqlòng svng angboq boq shøn sháò we íe.

Wedø íra long dvgvp nøt shvyang shìnø cvn-a ràe wae. Angmaq dvpat vpø nø ringwe nø angmaq shvnvngø rvtø zínø vl we nvng mvkok we íe. Wedø washì wenø angmaq svng tùbum dvbang shìwe gø íe.

Àngcì angkàng maq shvngbe gø cvm kèní téráì we wa ínø angmaq gø vrvm taq gø àngmaqò cvm lvpat rvmnvng rì vl we wa íe. Svrøng vmì we àngmaqò rvmnvng rvmchangrì cúnshì we la vl nìnø angmaq nvng vtoq vtip lún lvm dvbang shì we gø gvzà vchyake we íe. Angmaq dvhø nvmbøng kà taq kèní vtoq vtip we mø:í nìnø tùng dinø èsháò we wá shvlae. Shóngshøng we zìlàngré vnvm vchangrì maq vle vmì we July shvlá 26 ni nø mònggvn døng taq vlwe angpè angmè rìkaq shvgùn shvrìng nø oqà wawe bóy angni íwe íe. September ò 2 lvbán wa lvbán ni svng nø angcì angkàng rìò angni wanø American Danmvdaqpè Jimmy Gatta í 1978 nøng taq mvsat yàngà we íe. Denøng taq nø weni svng wáshìwe 42 nøng vhøm ráì we gø íe. Wedø íratnø vdè chøm døngku ò dvgø shvlá íwe angcì angkàng rìkaq vpø shvring shì shálvm nvngòn ziwe dvtit dvle shvngkà yayáng naròe.