Angcǿ Angcèrì Kaq Jòdø̀ Dvtúlv́m Dvrá Svng Gv́l Ràwe Dang.

Angcǿ Angcèrì Kaq Jòdø̀ Dvtúlv́m Dvrá Svng Gv́l Ràwe Dang.

Shóngshø̀ngwe Pème vnv̀m vchvng maq, dènì nø angcǿ angcèrì kaq jòdø̀ dvtúlv́m dvrá gv́l ràwe dang svng

dvtit dvle lvm íe. 

Tiqkvt kvt cv̀mrérì nø shaqrérìí dvtú shìwe dvrárì svng mvcvnò we rvtø̀ rìtaq Pè,mè maq dvpvt nøt dvshàlv́m vle.

Pè,mè maqí mvdø̀ng mvdvmò wenø angmaq kaq dvtúshì we dvrárì svng shvngøt lv́m íe. Angcø,angcèrì nø,

dvtúshìwe dvrárì svng mvcv̀nò we rvtø taq nøtmvgòlnø dvrøq weí ngà:nì íe. Wedø walv́m rvtø̀ mví we svng

nāná bǿà, cv̀mrérì nø shìni cv̀m we svng dvdv̀m ràe. Wedø dvtúshìwe dvrárì svng mvcvnò rvt dvrá svng

chá vle bǿà we íe. Nøngmaq pè,mèrìí gø dvdv̀m lv́m vlè, welòng nø nøngmaq pèmè vrv̀mí gø vléì we

rvtø̀rì vle. Nøngmaq pèmè rìínø cv̀mrérì svng shvngøt dvtú lv́m bvnlì døngjá vlwe svng dvdv̀mì nø vzàng

dvtut kadø̀ shvngøt lúnlv́m svng tiqdø vrā shìlvm (align) wàlvm nøtkǿm ràe. Cv̀mrérìí vléòrì svng angmaqí

sháòe, wervt nøngmaq shaqrérí dvdv̀mì we mvtú svng shvngøt lúnlvm dvhø̀ taq (alignment) nøtkǿm ràe.

Cv̀mré tiqgǿ nvng tiqgǿ síngrál nøt màbúng we írvtnø cv̀nshìwe dang taq gø mābúng we íe. Cv̀mré tiqmaq

nø kapv̀n walv́m dvdv̀m mvsháò dø pèmè maqsvng gø shvngøt mvkàm shìwe (stuck up) vlwe íe. Wedø

írìsvng shvngøt dvtúlvm nø pèmè maqò døngjá íe. Cv̀mré rvtø̀ nø dvng vrv̀m taq dvzø̀m lvm, shvngøt lv́m,

dvtúlv́m døngjá vlwe íe. Vdèí kǿmshì døni dvzø̀m dvbv̀ng ràe. 

Paqzí vdèrìí vkvt dø shønòe, cv̀mrérì wawe nø dvtú we kàsvng tálv́m angmaqò vgo mvcø̀ taq vlwe íe.

Angmaqò lepvt vhánglv́m nvng cère we nøt, vshvt mvyǿ we nøtrì vgo mvcø̀ taq vlwe íe. Wervt nø

nøngmaqò angcǿ angcè rìsvng jòdø ku dvdv̀mlún lv́m rvtnø rvtø̀ vrv̀m taq shvngøt dvtú rà we íe. 

Cv̀mrérì svng gø angmaqí shòngò dø rvsàng dvzvr rae. Wedø rvsàngò we taq nøngmaq pèmè maqí

jòwe dang svng dvtúlv́m vkoqkáng zílv́m gø vchvk mvdøng íe. Nøngmaq pèmèrìí shvngøt dvtú we

dang vrv̀m svng shòngò, mvshvngò we ínigø vrá tiqdang kèní rvsvng shìlvm dvdv̀m ràe. Welòng nø

nøngmaqí dvdv̀mì we dvtúì dang svng tuq, høqlvm dvpvt (goal) shvla we dang íe. 

Cv̀mrérìí dvdv̀m we dang màbúng, tiqmaq nø dvdvm nøt vhánge, tiqmaq nø cøp we dang vle. Wedø

írvt tiqmaq cvmrérì nø gvza shvngøt dvtú yat we íe. Cv̀mré tiqmaq nø yòl we íe, vdè nø vdè kám vrv̀m

we nøt angmaq taq vle. Kadø ínigø dvtú we dang svng síngshá lv́m nø vchvk mvdø̀ng íe. 

 Pè,mè wa rìnø vdèi shø̀:nò dø tiq dvchá vlíng we mv-vl dø íràe. Angcǿ angcèrìí kám vrv̄mlv́m vldø v́l

dvtv̀n ràwe íe. Cv̀mrérìí kám vrvm we íninø vdè nvng tiq dø vl lòng we íe. Wedø mvíni nø vdè nvng

vsvr lv́m wa íe. 

Angcǿ angcèrì svng dvrá dvtú we rvtø taq dvrárì taq kèní, dvkivrè we nvng mvdø̀ng mvdaq dvzvr shìwe

yarì nvng tiqdø vbáà:m we íe. Yādø mví, shóng nøt mvdø̀ng taq kèní dvrárì dvtúshì we dang svng

shvngøt dvtú ràe. 

Nøngmaq shv́ngbèí sháì dø tiq dvchá cv̀mrérì nø pè,mèí dvtú we dvrá svng mvdø̀ng táwám shìwe íe.

Nøngmaqò túng laqyā nvng gø̄ vzø̀mlv́m vchvk we íe. Wervt nø angcǿ angcèrìí dvrárì svng cv̀n dvzv́

r mvyǿ we íninø vdèí nv̀mlat cv́dvgø̀m wenø tvrà shvlá tvtv̀ne wanø vlǿm shìe. Welòng nø

(Rolr model) nv̀mlat tvtv̀nì nø mòngzø̀l we dø̀ngkū svng vrv̄ng dvzaq shìlv́m wàì shv́ngbè svng oqà.