Angcø angcèrì kaqsvng Cvndøng tará vl lvm høq dvzøm mvkok dvté lvm

Tuesday, October 13, 2020
Angcø angcèrì kaqsvng Cvndøng tará vl lvm høq dvzøm mvkok dvté lvm
 
Shóngshøng we Døngkù Vpè Vmè maq Nøngmaq Angpè angmè tiqmaq rìnø angcø angcèrì kaqsvng shvmná ngán shvrí shì mvgvl vtìpò we mvwàò nø shvlá mvcha dásíng lvm høq shvnga:t tángí Cvndøng lvm tará rì kaqsvng cvn dvzvl mvyøè Angpè angmè rìgø vlè. Nøngmaqò angcèrì kaqsvng Cvndøng tará cvnlvm dvzaq shìwe nø kàngnyeq gòng svng røng lvm mvdvm yatwe íe, angpè angmè maq shángbè íshá shaq íe.
Téwa lvpvt zìtang nvng singwe ínøgø, vdè cøm vdòng daq ínøgø, paqzí tvrà dvng nvng shìqshvn we lúnlvm dvpvt kadø íwe cvndøng lvm tará rìnø cvnshì ràe wànø angpè angmè maqó vkáng v-nà rì kámshì nø láng mvdaq bøìwe kaqsvng Nøngmaqí singshá rà v:mì. Nøngmaqò angcø angcèrì mvdvm gvlò we Cvndøng tará rìnvng sing nø Cvmrérì nvng vrã shìwe, Cvndøng tará rì cvnshì mvyøè, yárì Cvndøng lvm tará rìnø Nàmaqò lvpvt zìdvng dvpvt íe wanø angcø angcèrì kaqsvng ang mvtó rìsvng dvnòngò nø shvngøt ràe.
Ínì gø wedø íe Cvndøng lvm tará gvl lvm ídaq ke vjú vlwe írvt, Cvmrérì nvng vrã Shìnø ang maqò kasvng gø táă nø røt gø røt ràe. Vkoq vkáng zídū nìnø zí ràe. Zí màdū rìkaq svng nø zí mvdaq we íe. Wedángí nøngmaq angpè angmè rìí angmaq mvdvm dvdvmò we rìkaqsvng gø vbø ràe, yarì shvngbè nø namaq ísing shá ràwe íe wanø shá dvzvl ràe.
Werì shvngbè dvngí angpè angmè maq nvng angcèrì dvhø taq Cvndøng lvm tará rì kaqsvng vrã Shìnø gvlò lòngnø shvlá vtvng we íe. Cvmrérìí nøtò dø vní vchøm baq vlé daqò kenø dvdvm lvm vle. Tiqmaq vléò rìkaqsvng nø dvzùp shì shvlà we ínìgø tiqmaq svng nø dvzùp shì lvm dvpvt rvdø yvnggóng lushì rawe gø vlè. Angpè angmè nvng angcèrì dvhø taq yat lvm dø íwe cvndøng tará gvlò lòngnø madu we bvnli íe. Shóng nøt taq kení wa dvzøm mvkok lvm nø vchvt we íe.
Cvndøng tará kaqsvng vléshì daq ke mvrà zílvm dvlè tiqgá chøm bvnlì rì waò lòng nø vdèò chøm vháng lvm dvpvt wulaq Bvnli wá dvzvlò ke bvnli kaq angmaqò nøt lúm we kaqsvng gø vpo sháòe tvrà rìgø vlwe íe.
 
Yà prat taq Social Media nøgùn vlwe rvtø írvt Nøngmaqó angcø angcèrì kaqsvng phone mvlang nì, Facebook lang mvdaq, TV hang sømlà vngat yáng mvdaq, game mvn shì mvdaq wanø shønlvm màdù bøámì we kaqsvng angpè angmè maq shángbèí èshá shaq íe. Téwa nø Cvmrérì lvpvt zìdvng Vháng lvm rvtø írvt nøngmaqí angmaq kaqsvngláng mvdaq, wá mvdaq, yáng mvdaq wanø nàgámò ke angmaqò nøt taq angmaqò angpè angmè rìnø nøt patut mvshvlà wanø mvrà zíshà shìe.
 
Wedø írvt láng mvdaq wanø shønlvm dvlè ang rvtø nvng angrvtø chvt wà zíò nø láng dvzvlò lòngnø té shvlá we íe. Zíshì we rvtø yáng chvt wa láng shá lvm dvpvt dvnòng ãrae. Nøngmaq angpè angmè rìí Cvndøng tará gvlò lòngnø Cvmrérìí yvngò dø nøt shøm lvm vldø dvdvmã nø nømaq angpè angmè maqí shóngshì mvkok mvyø we nøt nvmlvt gvlò lòngnø nøgun lushì lvm, mvrà rìkaqsvng vléò daqkè mepvng mà vlé shì lvm dvpvt kadø shvngat dvnòng lvm kaqsvng dvtit dvle we ka vyáng nvlòe.
 
 
 
 

Add new comment

4 + 15 =

Quick Links