Angdè lvpat taq zìdang vháng lún lvm dvpat kadø wa dvzaqshì ràwe

Angdè lvpat taq zìdang vháng lún lvm dvpat kadø wa dvzaqshì ràwe

Tiqni rvtø taq angdèí dèdamò we tvnù manggá svng tuqlún lvm dvpat kadø dvzaqshì ràwe nvng kadø dvgø shì lvm wawe svng síngshá shìlvm mvdøng vchyak we íe. Yadang nvng singnø cvndøng ràwe dangrì tiqdongcè dvtit tvle lvm íe.

1. Angdè góng angdè síngshá shìlvm, yadang taq nø angdè tiqgø nø kadø íwe bvnlì døngjá rì nø Ka zìdang taq zømdàng we, kadø íwe vsvng tiqgø ønge wawe svng dvtøp shìnø síngsháshì ràlonge.

Vle vmì rvtø høqshaq angdè taq kèní vsvng kaq vjú ziwe bvnlìrì kadángte wálún dánglúng bø:ngà, vlé shì we dangrì kadángte vlwe, kadangrì taq angdè kungà vnønwe nvng kapà dangrì nø angdè tiqgøò tvnù manggá svng tuqlún lvm dvpat vl bø:ì mø:íni mvl wawe dangrì dvtøp shì nø dvdam shì lvm vchyak we íe.

We dangrì taqkèní nà tiqgø vle vmì we rvtø taq kapàrì bøn bø:ì we, vkvt kadø íráì we nvng tuqrawe rvtø taq kadø bøn mvyø we svng síngshá dvzvŕ longe.

2. Vtang shaq vháng nø tewe yøpnvng shøngranrì ègvlò, ínigø cvm vtang we bvnlì dvtàng kèní wá èpvngò. Bvnlì mvkrøm mvdøprì vshøp nø lá dvzaq shì weí angdèò tvnù manggá tvrà svng ècvnò.

3. Angdè góng angdè kámshì ràwe, angdè góng angdè kámshì we nøt vlwe tiqgø taq wa pàgø wákamshì we ínø jór nvngòn kùngàrì gø lúnò we íe. Angdè taq wálún we nvngòn kùngàrì nvng bvnlì mvkrøm mvdøprì vlwe taqkèní gø angdè góng angdè kámshì we nøt svng téwa dvhángā lún longe.

4. Tvlú dvgø shì ràwe, tvlú dvgøshìe wawe taq angdèò tvnù mangárì svng tuqlún lvm dvpat kàpàrì vzàng wàlvm wawe taq cvnnø dvgø shì ràwe svng shøn mvyø we íe. Wedø tvlú dvgø shìwe dang mv-vl nø angdè bøn mvyø we tvnù manggá svng vdú na wanø diwe ínìnø angdèò tvnù mangárì taqkèní tvrà vyuqshì sháòe.

5. Angdè góng angdè dvshatshì nø kùngà lushì ràwe, angdèò dvdam shìwe shøngran yøpnvngrì jórlún lvm dvpat dvzaqshì ràwe bvnlìrì taq yùl we danggvp kèní èpvngò. Yalòng nø nàò shønran yøpnvng tuqlún jórlún lvm dvpat angdè góng svng dvshatā we ílonge. Wewa mvtaq angdè tiqgø taq kèní yáng tvmnø shóngshì we vsvng tiqgø gøò lvpat bvnlìrì svng èyàngònø cvnshì we taqkèní gø angdè góng pvn vshat dvzvŕ we íe.

6. Rvmnvng shvlá rìnvng vzøm we, vtoq vtip we wáshìlvm, angdè lvpat taq bvnlì, tvrà vrvm taq nø shvla we rvmnvng rvmchangrì vl nø angmaq nvng mvngushì we wáshì lvm gvzàni vchyak we íe. Angdè tiqgø taq kèní dvdam mvrønshì we, wá mvlúnò we tvrà rìtaq àngmaqò paqzí ziwe, nvngòn ziwe taqkèní dánglún shìwe íe.

7. Lèga røshì ràwe, vsvng tigøò lvpat taq mvdøng mvdaq ni gvlshì ràwe jàng laqyà tiqlòng nø lèga røwe laqyà tiqlòng íe. Angdè lvpat taq angdè bøn mèyø we, angdè shóngshì we dangrì nvng sing we lègarì røshì nø cvnshì we taqkèní gø angdèò lvpat tvnù manggá svng tuqlún jórlún lvm svng tvrà tóngā longe.

8. Angdè góng shiqshàn tvrà svng cvndøng shì ràwe, vsvng tiqgø taq kàdangte jór nvngòn vl nø zìdang vháng lún we ínìgø shagóng shiqshàn we dang nvngòn vnøn we tiqgø dvpat pàdang taq gø vjú mv-vl dø wani bøn dvzvŕ we íe. Wedø íratnø vnvmchvngrì shvngbe ò lvpat taq angdè tiqgøò shagóng shiqshàn lvm dang cvndøng shìlvm gø gvzàni vchyak we íe.

9. Nà taqkèní cvn cvn wálún we taqkèní tvnù mangárì svng gø cvn cvn jôr lúnwe, angdè lvpat bvnlì dang vrvm taq rvtø svng vjú vl dø mv láng nø rúngnvm we svng wa yàngwe í bvnlì svng nvmcè wá wásháò we tiqgø dvpat jór nvngòn lúnshì we dang taqgø rvtø yánggúng wedøni caràlonge. Pàdang taq ínì gø cvn cvn wáshì sháò we jàng laqyàrì gvlshì we nø lvpat taq shvla we laqyà tiqlòng íe.

Nøngmaq gø vrvm taq bøn mvyø we dangrì nø gvzàni luqe. Ínìgø chvpdap bvnlì taq kèní wá dvzaqshì we taq cvnnø jôrlún we dangrì lúnlvm dang taq tiqgø nvng tiqgø nø vsvr vmwe íe.

Wedø íratnø vpøì we zìlàngré vnvm vchangrì angdè ò lvpat tvnù manggárì svng jór lún lvm dvpat nø angdè taq kèní kadángte rvtø zíshì we, nøtløp shìnø dvzaq dvkángshì we nvng nøt shvyang shìwe taq cvn nø lúnshì we angshí angwvt rì svng vto shì lúnlvm dang nvngòn ziwe dvtit dvle shvngkà yayáng naròe.

Aa