Angpè Angmè maq shòngwe angcø,cè rìí lvm dvpvt.

Angpè Angmè maq shòngwe angcø,cè rìí lvm dvpvt.

Shóngshøng we pèmè vnvm vchvng maq nøng maq shún shàì we mòngàn taq vsvng, ninà rinvng, shøng tàwa, nvmpù nvmban rìnø
ang mvdò dò rìnvng tiq dø vlnø súnshì we yò we íe.

Nøngmaq døngkū tiqchøm taq nøtkøm weí cømsaq mòngzøl lvm dang nø àngpè,mè nvng angcø angcè rìò Shóngnøt nvng vzøm lvm mvdøng vchvk íe.
Angpè angmè nvng angcø' angcè rìnø tì nvng ngã dø vbong nø tì mv-vl nìnø ngã gø vl mvshvla dø ni íe.

Sígwìk we tì dø ni íwe àngpè angmè mvl ninø àngcø àngcè rì lvpvt nø kadø gø zúnshì mvshvla we íe. Tì vdúng taq vlwe ngã rvt tìwàng vnvp dvzvr wedø
angcø' angcè rì mv-vl nì angpè,mè wa rìgø pa lvchøm mvl we nvng vbó:nge.

Wedø yv:ngò we mvn Gvrày Gvsvngí àngpè angmè nvng angcø' angcè rìsvng shòngnøt vzøm kènø mòngzøl lvm vrvm vrá dø vl lvm záng shaq íe. Mat
nyàn mv-vlwe ninà rì dvng angcè rì kaqsvng dvzøm mvkoq nø shóngnøt nvng mvré zà shàlvm nøt Gvràyí zíò nø zánga shaq íe.

Yòrwe kà shvbóng taq kèní shøn mvyøng wenø catiq go nø angcè rìsvng kadvng tè shò:ngò má wanìnø ang vmlvm vmpà svng màvm shaq angcè
rìsvng shv-vm shae.

Pìn rì rvt cèrè rawe gvyaq lvm vhøm shì daq kè vsak sóm lvm svng dvdvmò we mvl wedø gvrò mvkokò wedang nø angpè angmè maqò té vtvng we
Shóngnøt mvdøng íe. Wedø írvt angcø' angcè rì mvdvm vlwe shóngnøt wawe nø kapvn ígø shvbóng røng lvm mvl we íe.

Angpè angmè maqò shóngnøt tèwe svng kapvn ígø shvbóng mvrøng rvnaqè svng nøngmaq shvngbè í sháìe. Wedø ínìgø Angcø angcè rìsvng mvshóng
we angpè angmè rì vlwe svng gø shálún we íe. Angcø' angcè rì kaq shò:ngò we ínìgø shò:ngò wedang tvra shùtnò we gø íe. Tiqmaq nø àngpè angmè
mvnglè shóngnøt mv-vl rvt angcø' angcè rìsvng golò we angpè angmè rì gø vle. Wedø íwe angpè angmè maqó shóngnøt mvlúnò nø
télú:ngì we rì svng yvng shìwe vní dang vle.

Nvmlvt tiq dang nø dvgá cvmré rì angpè angmè maqò shóngnøt lúnò we svng yàng bøà rvt vdè dè nøt dvcvm shì shàe. Cvraq shiwe nøtzàng lù:ngè.
Vsvng køm we rìpòng rìtaq dí màkàm shìlù:nge. Lvngdøm taq nøtcvm nøtyòl lùngnø vdè nø vdè shat shìwe bøn shàe.

Vní wawe dang taq dvgá cvmré rìnø àngpè angmè maqò shóngnøt lúnò we svng yàng bøà kvt mvnún we nøtzàngnø nøtzà nøthøp we rì bøn weí rvmnvng
rvmchvng rì nvng vrám vrá we dang taq vzi vrùng we bønnø vsvng shvtwe nvng vrù rapvn aq shànø, vsvng mvgám wá shì lù:nge.

We rvtnø angpè angmè maqò bvnlì mvdøng nø Angcø' angcè rìsvng Shóngnøt taq kèní dvzøm mvkoq dvté lvm nø vchvk we íe. Nøngmaq àngpè angmè
vyá shì lvm dang nø angcø angcè rì mvdvm kà vjò we dvgám kàrì battùt shøn mvdaq we íe.

Nøngmaq angpè angmè rìnø cvmré rì dvpvt nvmlvt shvngøt dvtvn we svra rì íe. Wervt cømsaq mòngzøl lvm dang høq shørshú gø íe. Gvrày mòngkà svng
cvn nø ni vrvm vjú røtshì weí súnshì we døngkù ílún lvm dvzaq shìwe íràe.

Wedang nvng singnø yv:ngò we taq American damvdaq gàmcøl pè Abraham Lincon nø vgò møcì gvza shvla rvt rvmnvng rìí angsvng pàlvm nànø we dangtè
vgó mvcì shvla nø wedang tè èbøn wenø kayvng kèní cvnshì yvng èmá, wa røtnò ke, ngà (9) nøng dvngtè taq kèní vmèí ngàsvng nìvrvm
Cvnshér lega røò we svng táòe, wervt íe, wae.

Døngkū tiqchøm taq angpè angmè maq nø gvza vchvk we íe. Wervt angpè angmè maqò døngjá svng tøpwa dvzaq shìlvm gvza vchvk we íe.

Gvrày dará angmè (10) dang taq gø nvpè nvmè svng nvpøò wawe íe. Angpè angmè maqò shóngnøt kàdvngte tè wenø dvhòng bøt svng gòrlvm túng vlnìgø
àngcø àngcè rì svng gòrlvm túng màvlwe íe.

Angcø angcè rì kadáng tè màshvla nìgø, angpè angmè jèjú svng dvdvm mvsháò we ínìgø shóngshìweí mvrà ròqà we íe. Nøngmaq angcø angcè rì mvng
angpè angmè jèjú svng màpø' àwe íe.

Shóngshøng we àngcø àngcè rìe angpè angmè maq svng laq màvléì. Angpè angmè necì vyø lvm dø laq mvwaì. Angpè angmè nècì tiqgá angcø angcè rì
dvshà lvm tiq dvciq wanø paqzí vdèrìí shvdúm we íe. Angpè angmè rìsvng nècì yø dvzvr we angcø angcè rìnø ka dvgvp gø nøt cømsaq mòngzøl lvm
dang lún lvm mví wanø shvdøm we íe.

Angpè angmè maqó jèjú svng tvng lvm nø kãdø gø bøn mvdaq we íe. Dvsha rvt, yat we írvt íe, wanø angpè angmè svng gòlò we angcø angcè rìgø vle.
Kadáng te dvshà we ínìgø yatwe dvhø taq oqà wanø jèjú tvng shvlae. Welòng nø angpè angmè maqò Kàta weí nøtbyò dvzvr we dang íe.

Angpè angmè maq nvng tiqdø kà dvmvn tiqdø vmpà vmwe yadang nø vrúm múng kèní gvmsòng shvrì we mvdvm vpøe, nøtgø dvbù nø té nøtshøm lvm lúnòe.
Døngmvn we shóngnøt nvng angpè angmè maq svng zívm we nvng vdè rvt àngpè angmè maq nøtshøm dvbù wenø oqà wanø jèjú tv:ngò we íe.

Angpè angmè maqí vmnè shì dvgvp ezí vmò wenø jà dø vpøe, zànø góng mvbyo nø vm mvnè shìwe rvtø taq èzívmò wenø gvmsòng dø vpøe, págø vm mvnè
shìnø gvza aàwe rvtø taq èzí vmò wenø mvgrì zìdang wa ínø págø dvpø mavlwe íe wanø pàqzí vdèrìí shønò we íe. Wervt nø angpè angmè maqí vmjò vmnè
we rvtø taq èzí vmò dvzøm mvkoqò nø Nøngmaqó àngpè angmè maq nøtboy nøtshøm lvm svng dvpvt dvzaq shà lvm waì.

By: Paul Hpu Ye Dwe                                                                            

Add new comment

7 + 6 =