Angpè angmè Shvngøt kàtã we Cvmrérì ílvm dvpvt Shvngøt dvtú wedang.

Angpè angmè Shvngøt kàtã we Cvmrérì ílvm dvpvt Shvngøt dvtú wedang.

Nøngmaq angpè angmè maqnø angcø angcè rìsvng zaqshøp rì zílvm dvle nø angmaqò tiq lvpat vjú vlwe paqzí dang, cingnøt rálnøt vlwe, kàtã sháò we, laqyà shvlá vpø vnvp we kaq svng tékà zí mvyø we íe. Angcø angcè rì shóngshì we røt vrvm yòlyòlcè zí mvdaq we íe.Nøngmaq angpè angmè maqí cvmrérì røt shìwe kaqsvng zílvm nø yak we møí. Cvmrérì shóngshì døwa cvnãò nìnø, angmaq télùng ke pà gø vchvt we mvsháò, vpø shálvm gø møí we íe. Angmaqò nøt taq vlwe shángbè nø wadø lúnshì dárì wa dvdvmò rvt angmaqò lvpat taq bvnlì màdáí lònge. Angpè angmè maq shvngbe nø vdèò angcø angcèrì svng nøt dvshà we mvrshvm svng yvngò nø nøt boy we mà-vl. Wedø ínìgø angmaq vshøm baq røtke, tiqbaq dvngtè nø dvbvng ngà rà we íe. Vránø vdè svng dvbvng shìnø jèjú vlwe vsvngò jèjú svng Oqã wáshálvm Shvngøt ràe. Vdèò jèjú angkàng rìsvng vpø shánøt zàng weì vrvm vrá sháràe. We mvdvm jèjú dvráò ang dvpø svng kadvgvp gø dvdvm shálvm shvngøt ràe. Vránø dvgá vsvng rìsvng vwvlò nø dvbvng shálvm laqyà vnvp lvm dvpvt shvmùn shvjvng ràe. Vdè yvng vlyv'ng kèní muqlàng móngdàng dvpvt nøtløm we vlù zángshálvm dang laqyà tiqpvn vl-lvm høq Shvngøt ràe. Wedø vkvt vkvt vlù zí dvbvng sháò gø vdèò lvpat svng nøtlømlvm lúnshì we mvdvm dvgá dvshà we vsvng rì dvpvt gø nøt vtò shálvm svng Shvngøt rae.

Vránø shvnvng yvng vlwe vsvng rvmnvngrì taqgø vdèò angcø angcèrì svng shvlá wa shvnøt shàì we í nìnø, shvlae. Pàwàlvm wanì Cvmrérì nø dvgá vsvng rì wàò we dvngsvng cvnshì sháò rvt íe. Vháng mvn shìwe lvpat taq vl rvtø Cvmrérì nø yàngò, nøntò we dang lóqloq vlwe írvt tiqpvnpvn svng Oqã wá mvyø wesvng legà vrùònø mvzing shálvm shvngøt rae. Cvmrérìí wárawe bvnlì svng shaqrérìí wáã lvm nø mà-dù we íe. Bvnchvtrì vhømò we rvtø taq vdè nø vdèwa pàran sháò nìnø téwa Shvlae. Cømwe nø vhánglvm dvpvt nonggùn lùshìwe tiq tvrã íe.Cvmrérìnø angmaqí shòngò dvrerì kaq svng røtshìdø èzíò ínìnø, Cvmrécèrì nø shvngò shìnø røtlvm wa íe. Wedø írvt nøngmaq nø:tøng bøshàwe shaqrìí nø èsháò we írvt rà vdùwe dang taq zí ràe. Vsvt tewe shaqré shaqtvngrì, angcì angkàng rì, angpè angmè maqsvng vpøsháò kewa nøngmaqò angcø angcèrìí vdè svng gø vbø shálvm ílònge. Vrá dvgá tiqpvn nø jà Gvmsúng svng gø vpøshá dvzvr ràe. Welùng yvng jà gvmsúng nvng singnø gvmsúng svng kàdø mvnggá gvl lvm, ngvm gvmsùng svng kadø lánglvm, kadø dvbvng kelvm svng gø ang mvtú sháshì høq Shvngøt dvtú ràe. Wedø í kewa angmaqò lvpat taq lúnshì we zìdvng svng nvmwacè dvdvm rønshádaqò we íe. Vdèò lvpat taq vhøm shìrá we mvkúm mvdup rì nvng dvdvm shálvm shvngøt dvtúlvm waì. Lãdvng Cvmrérì nøtzaq shvngò shìwe ínìnø, shvraq dvchaq lvm nø angpè angmè maq wa íe. Cvmrérì svng mvrà zílvm dvlenø, mvdvmrvm dvtvn shìdø tiq dvchá Shvngøt nø Shvlae. Wedø írvt, nøngmaqò angcø angcèrì nø bangmanøcè vpø vnvp we angcø angcèrì ílúnlvm dvpvt dvzaq shàì wàngnø Paqzí dvkøm mvyøngè.

Translated by Paul Hpu Ye Dwi