Bønlún jór lún høq dèzaq shì

Bønlún jór lún høq dèzaq shì
        
Àngdèò lvpat kratcøm we tvràrì gvzà vl longe. Ínìgø wedø íwe shìwvtrì vkøn longwe kvt nøt màdat dvzaq dvkángshì lvm nvng we tvrà taqkèní cvnshì nø kù:ngà lushì shálvm vchyak we íe.
          
Àngdèò lvpat tvnù mànggá svng jórlún lvm dvpat nø vhøm shì rawe tvràrì taqkèní paqzí lushìnø nøt mà dvcvmshì shaqí bønlún høq dvzaqshì ràwe íe. Tiqkvt kvt àngdè í èwàò bvnlìrì, dvdamshì dø mvbøn long dvgvp nøt dvcvmshì we mvwáshì shaqí tvrà tongshìnø dvzaqshì lvm vchyak we íe. 
        
Welòng nø àngdèò tvnù mànggá svng jórlún tuqlúnlvm dvpat shvlá vtang we tiq tvrà ni ílonge.
          
Wedø àngdèò lvpat tvnù mànggá svng diwe tvrà taqgø jór nvnggùn lúnshì longwe dvgvp nøt vhwvp we, ídømshì we nøtrì zángshì mvdaq. Àngdèò lvpat tvnù mànggá svng diwe tvrà taq gòngre dø tiq danggvp kèní tiq danggvp svng dí ràwe íe. Wedø diwe tvrà taqgø mvhøt mvhè wedø mvwá lvm gø vchyak longe.
          
Lvpat tvnù mànggá rì svng jórlún we vsvngrì gø vrvm nø dvzaq dvkángshì we vsvngrì wa ínø, dvzaq dvkángshì we vsvng gø vrvm gø jór lúnwe vsvngrì wa ílonge. 
            
Dvzaq dvkángshì we ò àngshí àngwvt nø jór nvnggùn íe wawe kámnøt svng shvng:ángshì nø nøt shvriqshì shaqí màshvla we dangrì svng gor nø shvlawe tvrà svng rvcvng shì dvzaqshì lvm nvnggùn ziwe dvtit tvle svngkà yayáng naròe.