Banlì lálvm pàrat rvzaqwe ímá?

Banlì lálvm pàrat rvzaqwe ímá?

Angdè nø bvnlì la we tiqgø ínø bvnlì lálvm pàwá rvzaq we ímá? Kapà dangrì taq rà ratnø íemá? Kadø íwe dangrì nø bvnlì lúnlvm dang taq vbam shì emá? Wawe nvng singnø tiqdongvè dvtit tvle lvm íe. 1. Bvnli la we vsvngrì dvløt nø shøng jungke vsvng gvzà luqe.

Company dø íwe bvnlì wàngrì taq bvnlì wàngcèrì kaq shvlá zìbè wa mvtaq lúngkángrì kadø vle wawe taq cvnnø bvnlì shokshì we vsvng gvzà luq sháòe. Kàshvbóng we bvnlì taq ràwe vsvng 50 gø dángte wa ínìgø bvnlì goò we nvng shokshì vsvng angkíng mvdàm vl we vsvngrì taqkèní rvsvngò we íratnø bvnlì lúnlvm dang yakwe gø bøn sháòe.

2. Nøt mvsøn mvshèr we. Vsvng tiqgø taq nøt mvsøn shèrnø dønglvm gvzà vchyake. Èshønò we kàtaq cvnnø chvpdap bvnlì nvng gø dvtan lúnlvm vchyak we íe. Bvnlì shokshì we taq bvnlì angkàngrì nvng vhømnø dvmvnwe danggvp taq angdèò mèpvnglvp mvkrøm mvdøprì nvng singnø røt sháòe. We kvt angdènø vzàngkaq shèrwe nøt mvsønrì nvng bvnlìrì taq dvzaq shìdvr we ímá, mø:í má walòng svng angmaqí dvdut lúngò we íe. Wedø íwe rvtø taq angdè taq vlwe shèrwe nøt mvsøn jøng kèní vtàn lvmnø mvdøng vchyak longe. Mvdingwe kàrì svng mvshøn lvm svdiq vyáshì ràe.

3. Bvnlì mvkrøm mvdøprì, yadang nvng singnø làngrérì mvlúngka svng vdønke dvzvŕ we gø íe. Bvnlì vringwe kàrurì taq yúm vtang bvnlì mvkrøm mvdøp zìdang tiq zìdang svng tvnùngò we vsvngrì téwa vko vkáng zìwe svng yánglún shìe. Wedø íwe taq angdè taqnø bvnlì mvkrøm mvdøprì gø mv-vl we ínì gø nøt dat lvm laq mv-vl. We bvnlì taq síngshá nø wálúwe kùngàrì vl nø kámshì lúnlvm wa vchyake. Angdè taq bvnlì mvkrøm mvdøprì gø mv-vl we mvtaq we bvnlì nvng sing we paqzí, kùngà nvng kámshì nøt gø mv-vl we ínìnø bvnlì lúnlvm nvng vzvr vme.

4. Bvnlì shokshì we kàru, yalòng kàru nø bvnlì shokshì we taq nvmlat danggvp íe. Bvnlì shokshì we karu wawe taq tiqdá vsvngrì ò kàru kèní dvgø shìnø mvdàm rvmwa vru shì we dø mø:í nø rvtø lushì nø angdè tiqgøò dang svng shvng shvng wa síngsháā lúnlvm dø vrushì lúnlvm vchyak we íe.

5. Follow up wawe tiqkvt vrá gùn dvtøpwe, yadang svng shvlá wa gùn dvtøpwe mvwá shì vsvngrì tiqmaq taq bvnlì vko vkángrì cøm nø vmáng sháò we íe. Vrá gùn dvtøp lvm wawe taq angdèí shokshì bøwe bvnlì svng mvsat shìwe rvtø vdòng taq angmaqí angdè svng lèga mø:íni shvngkà vwàng ráò we vl má? Mv-vl má wawe svng dvtøp shìlvm íe. Angdè kaq shvngkà mà vwàngvt nò we ínì gø angdè taq kèní vtoq vtip shì lvm gø gvzà vchyak we íe.

6. Bvnlì angkvt angkvt vsér shìwe, yadø íwe dang kèní gø bvnlì àngshár lúnlvm svng vbamshì dvzvŕ sháò we svng síng sháshì ràe. Bvnlì tiqlòng mèpvng tiqlòng svng rvtø angdongcè taq vcérshì we laqyà vl we tiqgø dvpat bvnlì shokshì rakvt we bvnlì taq kèní gø angdè svng todø ni tiqlangcè dvpat bvnlì wá vløt lvm dira we tiqgø ku dvdutvm rawe bøn sháshì we írat bvnlì shì mèzángshì rvtø taq kèní angdè nvng tok vdu we bvnlì íwe, mø:í we nvng nøtratshì nø dvzaqshì lúnlvm gvzà vchyak we íe.