Bvnlì wàng taq byo lvm dvpat

Bvnlì wàng taq byo lvm dvpat

Jòr we lvpat wawe nø kàpà svng shøn mvyø we íe má? Lèga vru svra tiqgø shøn we taq jòr we lvpat wawe nø vsháng mvgá gá àngdè yøp èkungshì nø ne ègár weó àngdè í wá ràwe bvnlìrì nø jøng jøng ni àngdè dí mvyø we tvrà taq ílvm vchyak we íe wae.

Àngdèò chøm døngku vdòng taq shømløm nø mòngzøl lòng vlwe ínì gø vsvng pvn køm we bvnlì wàngrì taq byo nø mòngzøl dø vl lún lvm nø yak longe. Àngdèò bvnlì wàng taq, shvnvng gùr gùr rì taq mòngzøl dø byo we svng lún lvm dvpat rà vchyak we dø tiq dvchá we dang svng vtoshì lúnlvm dvpat àngdè tiqgóng taqkèní gø cvndøng lvm dang rì vl we íe.

Àngdèò bvnlì svng vpø shvring shì ràwe

Bvnlì wàngrì taq byo dø vl lún lvm dvpat vrá nø àngdèò bvnlì svng vpø shvring shì lúnlvm dvpat nø rà vchyak vtang tiqlòng íe. Tiqni nvng tiqni wá ràwe bvnlìrì taq vzing shì lvm gø vhøm lúngìe. We rvtø taq àngdèí èwàò we bvnlì taqkèní vjú vto shì lúnwe dang svng dvdam nø vpø shvring shì shálvm shvdøm we íe.
 
Oqà wá shá ràwe
Ni vrvm dvzøm dvzaq shàì we bvnlì taq tiqdø vzømì we rvmnvng rvmchangrì kaq svng gø oqà wawe nøt, laqyà gvlshì rà longe. Welòng nø àngdè shvnvng gùr gùr svng ngør nø dvbu dvzvŕ we gø íe.

Tiqdá rvmnvng rì nvng shvla dø vtoq vtipshì ràwe
Vsvng tiqgøò lvpat yàngùng taq chøm vsvngrì nvng tiqdø vl we rvtø rì mvdàm bvnlì wàngò rvmnvngrì nvng tiqdø vtoq vtip nø vl ràwe rvtø nø téwa luq longe. We ratnø bvnlì vdòng taq rvmnvngrì nvng shèr we nøt mvsønrì í shvlá vtang vzøm nø vtoq vtip lún lvm nø gvzà ni vchyak longe.

Mvsat shì bø we bvnlì rvtø rì svng pvng mvkrat dø wálún, tuqlún ràwe
Ni vrvm ò bvnlì svng di we taq gø rvtø vmø høq tvlú ètuq lúnò we íni cvndøng dvrárì svng cvn dvgøm èlúnò we mvtaq tiqdá rvmnvngrì ò mvr taqgø dvgùn èlún lúngò we írat àngdè góng àngdè nøt mvsønrì gø byo nø ngør ngun dvzvŕ lúngòe.

Chøm døngku vdòng taqkèní shìwvt rìsvng chøm taq wa ègvlò.
Àngdè tiqgøò chøm døngku taq vkøn longwe shìwvt shini shibøn cèrì kutwa shvngbe svng bvnlì vdòng svng èrívtnò nø vgùngò welaqyà mvwá shì lvm svng shvdøm we íe. Wedø íwe shìwvt àngpvn pvn rìnø àngdè tiqgø taqwa mvtaq vsvngrì shvngbe taq vl we wa írat nø bvnlì taq mà shvla we dang kèní vbam shì sháò we svng síngshá ràwe íe.

Àngdè ò bvnlì shvrà taq shvng shvng wa shèr dø vl sháshì ràwe
Yalòng nø kadáng te nø màchyak wanø dvdam shì sháìe. Ínì gø yalòng taqkèní nàò bvnlì rvtø taq nøt shok lvm, nøt mvngør lvmrì bøn dvzvŕ lúngòe. Àngdèò shvngwang, rúngtàng, shvbóy rì svng shvng shvng wa èwàò we taqkèní gø àngdèò bvnlì rvtø taq nøt mvsøn svng ngør nø byo dvzvŕ we íe.

Nvrshì rvtø rì lushì ràwe
Àngdèò bvnlì rvtø rìtaq tiqdang gvp kèní dvtut tiq shvle svng wáshì ràwe rvtø rì taq tiq dvshaq shaq cè ènvr shì we møí ni tìshu aq rvtø dø íwe rvtø lushì we svng wá shì shvla we svng shøn mvyø we íe. Yadø èwà ò we taqkèní nvngòn kùngàrì vrá ban shì vwángshì we íratnø àngdèí dèdamò we bvnlì dvtírì jór lúnshì longwe mataq nøt mvsøn svng gø shøm dvzvŕ we íe. Yadø mvdàm kaq tálún shì bøì we dangrì nø àngdèò bvnlì wàng taq nøt mvsøn ngørnø  byo lvm dvpat wáshì shvla we gvlshì shvla we jàng laqyàrì íwe rat yadang rì taq zøm shàì nø gø vrvm nø àngdèò bvnlì wàngrì taq jór nvngòn banshì laqlúnì wang dvtit dvle shvngkà yayáng naròe.
#youth