Bvnlì wàngrì taq nøt datlvm wa vhømì we vsvngrì vlìe má?

Bvnlì wàngrì taq nøt datlvm wa vhømì we vsvngrì vlìe má?

Yadø bvnlì wàngrì taq nøt datlvm vhømshì rawe nø we bvnlì svnggø zá dvzvŕ we mvtaq bvnlì wálúnwe àngdèò kùngà svnggø vnøn dvzvŕ lúngòwe íe. Wedø bvnlì wàngcèrì taq nøtdat lvm vhøm lúngò dvgvp àng rvtø taq bvnlì màdángwe, bvnlì døngjá rì taq kèní yvlshìwe, bvnlì wá vléshì we rì bøn dvzvŕ lúngòe. Weratnø yadø bvnchvtrì bønra dvgvp kadø wa pvranlvm íe má?

Bvnlì taq nøtdat lvm, nøt mvlúm rawe rì bøn rawe nø bønlì dvpat vjú vnøn dvzvŕ we íratnø we bvnlì taq dvzaqshì we vsvngrì kaq kadø vrá kùngà vwángā lúnlvm wawe dang cvn cvn ni dvdamā ràwe íe. We dangrì taq Paqzí cvnā we dang taq kèní dvshvtā lvm, yalòngnø bvnlì taq nøtdat rawe tiqgø dvpat vlíng vpo lúnlvm dvpat àngò nøt mvsøn kùngà svng dvshvtā we gø íe.

Wewa mvtaq àngò nøtlúm we paqzí dang tiqpvn pvn taq dvshvtā nø zìdang dvhángā we taqkèní gø àngò nøt mvsøn kùngà àngshvr svng zíā lún we íe. Wedø paqzí cvnshì we rvtø taq àngdèò shvnvng taq vlwe nøt vshvt we rvmnvngrì nvng vtoq vtip lúnwe taqkèní mvkrøm mvdøp àngshvr rì vshøpshì lúnwe mvtaq angdèò nøt mvsøn kùngà svnggø dvshvtā lúnwe cì gvbà tiqlòng gø bønlún we íe.

Wedø íratnø we bvnlì svng shølshú wáshì we tiqgø nø we bvnlì taq dvzaqshì we vsvngrìò kà, layàrì svng táā, yángā lúnràwe nø gvzà ni vchyak we tiqlòng ni íe. Pàwálvm wani bvnlì vsvng tiqgø nvrshì bøwe mèpvng we shvrà taq vrá rúng lún, riplún we vsvng tiqgø lálún lvm dvpat nø rvtø zíshì ràwe, bvnlì dvtírì, paqzí rì cvnā ràwe ínø rvtø zíshì ràwe íe.

Wedø nøtdat we bøn long dvgvp kapà ratnø wedø bøn dvzvŕ we svng gùn dvtøpā ràlonge. Bvnlì ratnø bønwe ímá, shvlá zìbè nvng singnø íe má?, Vko vkángrì nvng singnø ímá?, Mø:íni bvnlì shølshú rìò pvran we dangrì ratnø íe má? Walòng svng chvkwa gùn dvtøpā lún ràlonge. Mvdàm kaq shønshì bøì we dangrì tiqpvn pvn rat bvnlì taq mvbyo we írakvt àngò nøt mvsøn kùngàrì pvnvshvt vwángā lúnlvm nøt byo dvzvŕ lúnlvm dvpat nvngòn ziwe, vko vkángrì dvgøā, tvrà tóngā we rì wáā lvm vchyak we íe.

Vránø bvnlì taq ripwe vsvngrì téwa nøt kùngā vl lúnlvm, bvnlì wangtaq dvzøm dvzaqshì we taq byowe nøt kèní dvzaqshì lúnlvm dvpat nø tiqgø nvng tiqgøò rà vchyak we, shvrúng we dangrì svng dvtøpā weí rvtø zílún lvm, vko vkángrì ziwe rì wáā lvm vchyak we íe.

Bvnlì wàngrì taq bvnlì wa vsvngrì we bvnlì taq vzing kéò we, mvbyo werì bøn rawe dvgvp we bvnlì nø krvtcøm we, nøtdat lvmrì bøn dvzvŕ we, rì bung longwe ínø làngdøm taq tiqgø nvng tiqgø vzøm we dangrì tinvmwe, vkang we dangrì bøn sháò we íratnø bvnlì shølshú vgo wáshì we rì taqkèní bvnlì wàngcèrì kaq vchyak zínø ràwe dangrì taq pvranā lvm gø gvzàni vchyak we svng dvtit tvle svngkà yayáng naròe.