Bvnlì wàngrì taq nøttøng nøtdøng ràwe

Bvnlì wàngrì taq nøttøng nøtdøng ràwe

Bvnlì wàngrì wawedø tiqdvchá vsvngrì nvng vzømwe vtoq vtip nø vlràwe shvrà íwe svng shvngbe í shá vráì we íe.
 
Vsvng rìò jàng laqyàrì nvng vdu vbóngdø vzøm vzap shìrawe shvrà tiqlòng gø íe.

Bvnlì wàngrì wawe taq tiqpvn nvng tiqpvn nø vbóng we mvvl, àngpvn pvn ku vsháyvm we vl longe. Wedø vsháy we ínìgø jòrlvm mànggá walòngnø shvngbe taq vlwe wa íe.

Vsvngrì nvng vtoq vtip we taq 1. Tiqgø nvng tiqgø tasvng síngsháā ké ràwe
2. Vsvngrì dvhø cvndøng dvrárì cvn dvgøm ràwe dangrì vl longe.

Vsvng tiqgø nvng tiqgø vhøm we rvtø taq heliyet mvrshvm wáshìnø vtoq shìwe, pàmvrà wawe nvng tiqmaq taq tasvng vpø shvring kewe gømlarì dvtan kenø bvnlì wàngrì taq vtoq vtip we svng yánglún shìe.
 
Bvnlì wàngrì taq vsvng tiqgøò kùngà taqkèní wa wá dvzaqshì we mø:ínø we bvnlì taq mvngushì we vsvngrì shvngbe ò ròráshaq kùngà í dvzaq dvkángshì ràwe íe.

Wewa mvtaq wedø bvnlì wàngcèrì dvhø tasvng vtoq vtip we dang taq bang mvnøcè íwe kà, shaqí rìí vtoq vtip shìlvm gø gvzà vchyak we tiqlòngni íe. Rvmnvng rvmchangrì mvdàm nøt mvgør we kà, shaqí wa vtoqshì we laqyàrì mvwá shìnø tiqdá vsvngrì ò vnà taq tá wámshì lvm kàshaqrì í vtoqshì we lòng taqkèní wa we bvnlì nø téwa jórlúnwe tvrà svng di vdu longe.

Bvnlì wàngcèrì dvhø tiqgø nvng tiqgø ò zìdangku, vsvk vbatku mø:íni mvkrøm nvdøprì taq cvnnø tasvng rvwing we mvwà lvm laqni vchyak we íe.

Wedø vdu vbóngwe laqyàrì taqkèní vzøm nø bvnlì wawe ínìnø we bvnlì nø jøng jøngni shvla we vjú vrarì svng vtoshì lúnlvm wa ílonge.

Tiqgø nvng tiqgø tasvng svng shvnip shvnvr we, mvdøng mvdaq vmíng taqkèní dvzvŕ we dø mø:í nø tasvng síngsháā ké we vdòng vpø shvring kewe í dvzaq dvkángshì we ínìnø we bvnlì nø gvlshì we mvnggá svng jøng jøngni tuqlún lvm ílonge.

Bvnlì tiqlòng jór lúnlvm dvpat nø vsvng tiqgø ò síngshá ò we nøt, dvdam nøt svng wa mvngushì we mø:í nø vsvng shvngbeò shíngshá we tvrà nøt vrá lúnwe dang taqkèní cvnlvm gø vchyak we svng shvdøm we íe.

Weratnø dèni bat làngrérì taq wedø vsvng mvngpòng mvdòrì nvng bvnlì wàngrì taq dvzøm dvzaq shàì we rvtø rìtaq mvdàm kaq tálún bøshà we dangrì, vsvngrì nvng vdu vbóng we cvndøng dvrárì taqkèní dvzaq shàì we ínìnø àngdèí dvdamshì we bvnlì mvnggá rì bvnlì dvlàrì svng jøng jøng ni jórlûn lvm íwe svng shvdøm nø nvngòn ziwe dvtit tvle svngkà yayáng naròe.
#youth