Bvnlì wàngrì taq tiqdá vsvng nvng shvla dø vzøm ràwe dang

Bvnlì wàngrì taq tiqdá vsvng nvng shvla dø vzøm ràwe dang

Bvnlì wàng wawe dø tiq dvchá vsvng pvn køm we, àng zìdang rì vzipwe vháng we vsvngrì nvng vtoq vtip ràlonge. Ni vrvm bvnlì wàngrì taq wedø màbóng we vsvng rìnvng vtoq vtip ràwe taq tiq gø nvng tiq gø ò bvnlì døngjá rì nø màbóng we dang rìtaq ripwe wa írat we tvrà svng nø vpø shvring shì ràlonge. Bvnlì àngkàng rìnvng mø:íni bvnlì wàngcèrì dvhø tasvng vtoq vtip we taqkèní we bvnlì svng kadø jór lún lvm íwe svng tiqdungcè dvtit tvle lvm íe.

Tiqgø nvng tiqgø vtoq vtip we tvrà taq tasvng shvla dø vtoq vtipshì we, vzøm we svng lúnlvm dvpat nø àng vdè tiqgø taqkèní nvmlat pvngshì ràwe svng síngshá dvzvŕ we íe. We taq 1. Vsvng kaq shvlá vtang kà táā lún we vsvng tiqgø írà we, Kà shønwe taq shvla dø shøn vtoqshì lún lvm dvpat nø nvmlat taq shvlá vtang táā lún rà longe.

Tiq dá vsvng shønwe kà svng ètáāò dvgvp àng kapà svng shøn mvyø we, kadø bøn mvyø we nvng kapà lvjøm svng vtànòe walòng svng táānø dvtøp lúnā ràwe svng shøn mvyø we íe. Wedø tiqdá vsvng shønkà shvlá wa táā lún long mvbat àngdè taqkèní kadø àng nvng vtoq vtip shì shvla we tvrà rì téwa síngsháshì mvbat ílonge.

La nà nø bvnlì taq shølshú vgo tiqgø gø nvng vhøm nø dvmvn vdu long dvgvp àngmaqí shøn vtànò we dangrì svng lèga taq vru nø mvzøng shìwe wá vdue. We dø vru nø mvzøng shìwe nø àngdè dvpat téwa mvzøng shìwe dang svng tubùmā we gø íe.

2. Kà shøn we taq gø lvjøm vldø àngdungcè ku shón shá ràwe íe.

Bvnlì wàngrì taq tiqgø nvng tiqgø nø màbóng we bvnlì døngjá rì taq ripwe vsvng rìwa írat nø tiqdá vsvng ò rvtø kaq svng gø vpøā shá ràwe íe. Rvtø vrvm nø vsvng gø vrvm dvpat vpø ringwe we svng dømsháā rà we íe. We ratnø tiqgø nvng tiqgø vpø we nøt gvlshì we kèní rvtø kaq vpøā kèlvm gø vchyak longe.

3. Àng vdè tiqgø ò dòngnøt mvsøn svng wa dvtan shì mvdaq, àngdèí vsvng tiqdá kaq mòngzøl nø ngørwe nøt mvsøn svng dvtan shìwe íni pà mv-rà we ínì gø dòngnøt taq mvngør we, mvgør we rvtø taq we mvrshvm laqyà svng dvtan shìwe ínì nø tiqdá vsvng kaq gø nøt mvsøn mvngør we bøn dvzvŕ sháò we íratnø we laqyà svng mvwá shì lvm vchyak we svng shvdøm we íe.

4. Mvhøt, mvrø we laqyà rì yvlshì ràwe, yadø mvhøt mvrø we laqyà nø bvnlì àngshvr zángshì rawe bvnlì wàngcèrì svng téwa shøn mvyø we íe. Pàwálvm wani mvdàm kaq shøn shì bøì we dø tiqdvchá bvnlì shølshú shaqré rì nvng vhøm nø dvmvn vdu we rvtø rì taq àngdèò nøt laqyà rì svng tøn shì shálvm svng shvdøm we íe.

5. Tasvng vyit kewe taq wa rvtø mèdè béni, vsvng shvngbe taqkèní àngdè svng la shóngshì radø vl dvzaqshì lvm wawe mvdàm vsvngrì í àngdè svng mvwám shì we mv-vl lvm dvpat vlshá shì lvm nø téwa vchyak longe. Vdè rvmnvng rì dvhø taqø gø tiqdá rvmnvng rì kaq vzel ke, vyit kewe íwa rvtø dvbé we dø wáshì mvdaq.

Yalòng nø vsvng rìnvng vzøm we, vtoq vtip we dangrì svng kadø gø vjú mvzi we laqyà tiqlòng íratnø we laqyà svng gø yvlshì ràwe íe. Bvnlì wàngrì taq ya dø vsvng pvn kømwe, nøt màbóngì we nvng zì dang màbóng we vsvngrì dvhø taq shvla dø vzøm nø vtoq vtip shàì we taq kèní gø vrvm nø shvla we, zìdang vháng we lvpat rìsvng vrang shàì wawe dvtit tvle svngkà yayáng naròe.