Bvnlì wàngtaq mòngzølnø byo lvm dvpat.

Bvnlì wàngtaq mòngzølnø byo lvm dvpat.

     Bvnlì wàngtaq mòngzølnø byo lvm wawe nø èshønò kvt yùlwe ínìgø chvpdap bvnlì taq nø yakwe tiqlòng íe. Bvnlì wàngrì taq dang àngpvn pvn taqkèní byowe dang svng vnøn dvzvŕ sháò we íe. Kàshvbóng nøthøpwe bvnlì àngkàngrì vdòng taq bvnlì wá vduwe dø íwe kvt byolvm wawe tvrà taq vnøn dvzvŕ sháòe. We dø ínì gø byoe walònø tiqdá vsvngí mvnāwe mvtaq àngdè tiqgóng àngdè èwa shì, èlu shìwe nø mvdøngni íwe svng síngshá ràlonge. Shóngshøngwe zìlàngré vnvmchvngrì chvpdap lvpat taq àngdè góng àngdè lvpat svng vháng lúnlvm dvzaqshì we gø nøtshøm nøtbyo dvzvŕ we tvrà svng bøn dvzvŕ we íe. We ratnø àngdè lvpat vháng vlún lvm dvpat àngdèò tvnù manggárì svng lúnhøq dvzaqshì lvm nø mvdøng vchyak we íe. Vránø àngdè dvzømshì we bvnlì taq paqzí dvkømwe wáshì ràlonge. Kadø èwàò nìnø bvnlì dvpat jórlúnwe, bvnlì wàngcèrì dvhø yuqyà lvm íwe tvràrì svng màdat dvtøpnø paqzí dvkømshì ràwe íe. Vsvng gø vrvm taq àngdè shóngwámshì we bvnlì svng vháng nø jór dvzvŕ mvyø we wa íe.

  Dvgárì mvdàm vháng màlúnwe ínìgø tiq zìdang taq rìn vráwe jór nvngòn svng lún mvyø we wa íe. Pàwálvm wani àngdè ripwe bvnlì welòng ongnø jòrwenø àngdè tiqgøò lvpat jòrwe dø nøtshøm dvzvŕ lúnò we rat íe. We bvnlì taq jòrwe taqkèní nøtshøm, nøtbyo lvm lún dvzvŕe wawe taq kàshvbóng, bvnlì wàng ongnø vháng vlún rakvt bvnlìwàngcèrì taqgø svlá zìbè rvmā lúnwe, gømpaq kèní shvring rawerì vtoshì lúnwe írat we bvnlì taq téwá nøt byo lvm svng lúnò we íe. Bvnlì wàngtaq tasvng tubùm dvbangā kewe dang svng èyàngvtnò dvgvp àngdè tigø taq bvnlì gvzàjatwe ínìgø tiqdá rvmnvng kaqsvng dvbangā ràwe rvtø taq dvbangā weí àngtiqgø we bvnlì svng jórlún bøò we ínìnø vdè taqgø nøtshøm nøt byowe svng vtoshì lúnìe. Wedø bvnlì wàngrì vdòng taq rvnvng shvlâ gvlshì shálvm gø gvzàni àngdè dvpat vjú vlwe íe. Paqzí zùngrì taq rungwe rvtø taqwa rvmnvng shvlárì vhømshìe wa dvdam shìlvm mø:í, bvnlì wàngrì vdòng taqgø rvmnvng shvlárì lashì shvla we svng shvdøm we íe. Mòngzøl we lvpat taq vllúnlvm dvpat nø rvnvng shvlárì, àngrì àngyàngrì nvng vzøm vzap lúnlvm gø gvzàni vchyak longe.

             Weratnø kadángte bvnlì yakwe vkønwe vdòng taq ínìgø rvnvng shvlá gvlshì nø vtoq vtip shì shálvmnø gvzàni vchyak we íe. Shøn mvyø we taq lvpat vrvmwe vlù vlàng shòlaqré battaqnø bvnlìrì vdòng taqwa rvtø zíshì vduwe ínìgø we àngdè èripwe bvnlì taq nøtshøm nøtbyo lúnlvm gø gvzàni vchyak we svng síngshá dvzvŕ we íe. Welòng svng lúnshì lvm dvpat gø àngdè tiqgø taq kèní wa tvrà tongshì ràlonge. Mòngzølwe, byowe mvvl we bvnlì vdòng ripwe tiqgø nø shøng vshúng tiqgùng nvng vbónge wae. Àngtaq kèní àngsvp àng dvgàngrì mvwvt rawe mvtaq nvm dvgø gø zí mvlúnò. Weratnø àngdè dvzøm dvzaqshì we bvnlìwàng vdòng àngdè tiqgøò nøt mòngzølnø byowe svng vtoshì lúnlvm dvpat nø àngdè taq ni mvdøng íwe rat we tvrà svng shvlá vtang tongshì laqlúnì wang dvtit dvle shvngkà yayáng naròe.