Bvnlì wang taq èvl dvgvp cvnshì we dang nvr vduemá?

Bvnlì wang taq èvl dvgvp cvnshì we dangrì nvr vdu emá? Vsvng shvngbe nø lvpat vsak vrvm ra dvgvp angdè dèò bvnlì døngjá rì taq dvzaq shìwe wa íe. Wedø íwe taq kagø ínìgø ràwe dangrì nø vsvng shvngbe taq vl we íe.wedø angdèò kùngà vnøn nø ràwe dangrì taq bvnlì taq kèní cvnshì shvla we wa íe.

Wedø wá dvzaqshì we taqkèní wà jòr we svng lúnhøq dvcøp dvgøshì weí jór nvngòn manggá rìsvng lúnhøq di lún lvm vchyake. Ínì gø vsvng tiqmaq taq bvnlì tiqlòng taq zángshì bø mèpvng zvn dvtut cvnshì we dangrì taq dvtut mà dvzaqshì we svng yánglún shìe. Wedø nøt mvsønrì angdè taq zángshì we ínìnø we nøt mvsønrì svng vgám lvm wáshì ràwe svng làngrérì kaq shvdøm we íe.

Kadø íwe bvnlì dangrì taq evl we ínìgø zvn dvtut angdèò lvpat taq paqzí cvnshì nø lá vshøp shìlvm svng nø nvr mvdaq long we íe. Nà taqkèní bvnlì nvng singwe paqzí cvnshì we ínìgø dvgádø paqzí tiqlòng lòng ècvnshì we ínìgø tiq pvn pvn svng nø pvngyàn cvnshì ràwe íe. Chapdap taq bvnlì tiqpa kèní paqzí cvnshìe walòng nø yakwe íe.

Rvtørì zíshì ràlonge. Angdè dèzøm shìwe bvnlì kùrwàng vdòng taq kèní cvnshìwe mø:í ni bvnlì vtànglvp kèní cvnshìwe tiqpvn pvn ku nø cvnshì lvm rà vchyak we íe. Rvtø mv vl wanø wa shønnø angdè lvpat ò rvtø rì svng laq mà dvcømì. Ngànø ya zìdang taq wa nvrshìnø vl vdu emá? Dvtut dvzaq shì lvm vdu emá?

Walòng svng dvdam shìnø dvtøp lúnlvm shvdøm we íe. Nà ècvnshì we taqkèní svngpvn vtoq vtip we dang, wulaq bvnlìrì, paqzí paqratrì nvng bvnlìrì dønjárì nvng sing we paqzí rì lúnshì shvla we íe. We dø irat làngrérì taq chapdap bvnlì nvng tiqrá wanø cvnshì we tiqgø mvdàm bvnlì mv vl we tiqgøò cvnshì we nø 2dvtàng dángte dvzaqshì nø cvnshì rà we svng yánglún shìe. Bvnlì wawe taq tiqrá wáshì nø cvnshì we ínì nø nàí èwàò we bvnlì gø téwa dvtí vl longe.

Shóngshøng we zìlàngrérì cvnshì we dang taq tiqgø nvng tiqgøò cvnshì we tvràrì taq vsháy longe. We dø íwe vdòng taq angdè nø kadø íwe tvrà taq evl we svng dvdam shì nø dvtøp shìlvm vchyake. Kà shvbóng nànø bvnlì døngjá tiqlòng taq dèzømshì we vsvng tiqgø èíwe ínì nø nàí ka rvtø svng zílúnò we svng dvdam shìlvm vchyake.

Nàò rvtørì shvngbe svng bvnlì taqwa zíshìnø dvtut cvnshì we mvwá shì we tiqgø taq síngrál nøt rvmshì we mv vl longwe mvtaq nyan paqzí rìgø tiqni mvdàm tiqni yúm mvnshì longwe svng shvdøm we íe. Dvtut cvnshì we mv vl vsvng tiqgø taq bvnlì kèní nøt yaklvm vkøn werì taq wa nøt vyuq vdu we ínø nøt shømlvm nøt boy lvm dangrì mvlún shìwe gø bøn dvzvŕ sháò we íe.

Àngdèò bvnlì nvng màbóng we dangrì taqgø, paqzí rìtaq gø cvnshì we svng wáshì vdu we íe. Angdèò bvnlì dang nvng cvnshì we dangrì svng shvng shvng wa gvlhì sháràe. Wedø ínø wa angdè taq vhømshì rawe mvhøt lvmdangrì taq nøt dvshat we svng tùbumã lúnshì we svng yánglún shìe. Cvnshì we dang taq angdè tiqgø wa ècvm shì we mvdàm vsvngrì nvng tiqrá ècvn shìlòng nø nà dvpat téwa vjú zílún we íe.

Pàwálvm wani angdèí dèdam mèrønò we dang, mvsíng sháshì we dangrì taq rvmnvng rìtaq kèní vrá dvtøp nø dvtit dvle kewe taq kèní téwa jór lúshì we svng gø yánglún shìe. Angdè taq kadø íwe yaklvm bvnlìrì vdòng taq dvzømshì vdu we ínì gø rvtø lushìnø cvnshìwe taq kèní pazíqrì, mvkrøm mvdøprì vshøp shàì we ínìnø angdèò lvpat taq kadø íwe bvnlì bvnchvtrì vkøn rawe ínìgø mvngàn lúnnø jòr we lvpat svng vtoshì lúnlvm wa íe wanø dvtit tvle shìwe shvngkà yayáng naròe.