Cúnshàìwe lvpat tvrà taq shvladø kadø vl vdue

Cúnshàìwe lvpat tvrà taq shvladø kadø vl vdue

Vsvngrì ò lvpat taq tiq rvtø taqni cúnshàì we ínìgø vsvng tiqmaq taq vtangshaq vdá mvgàm vmwe vlnø tiqmaqnø lvpat taq vrvmgvp vlbyowe rvwe zìdàng taq vl vdu nø vsvngrì tiqmaq taq ínivtang kèní dvshà mvhøtwe vhømòe.

Vsvng shvngbe nø tvmø bvnlì wàvmì wewa ínìgø we bvnlì rìtaq chvk wa nøtløpshìwe, rvtø zíshìnø wawe vlrà longe. Wedø ínøwa we bvnlì dvpat àngdènø jøng jøngni zømdàngnø rà vchyak we vsvng tiqgø íe wanø shønlún shìwe íe.

Vránø àngdèò nøt, jàng laqyàrì gø tiqdá vsvng nvng vzømlvm, vtoq vtip we tvrà taqgø yuqyàdø, shvladø gvlshì ràlonge. Ànhdènøt svng nø àngdèí wa síngsháshì we ínìgø tiqdá vsvng nvng vtoq vtip we tvrà taq kadø nø yuqyàe, màshvla we dangrì svng síbgshá dángí tiqdá vsvngrì ò shønkàrì, shvngøt dvtúwe dangrì taq shvladø vtoshìnø táä lúnràwe íe.

Àngdèò nøt svng shádøm shìdø gvlshì mvdaq, wedø wáshì lòngnø vsvngí àngdè svng yáng mvthàmvm rawe gø bøn dvzvŕ sháòe. Vsvng gø vrvm taq àngdèí wá lúnò we kùngà taq cvnnø vko vkáng rìgø wedøni vl longe.

Wedø lúnshìwe àngdèò zìdang taq nøtshøm lúnwe nøt svnggø gvlshì lvm vchyak we íe. Vránø vlù vlàngrì taq mvkrøm nvdøprì nvng lvpat témvnshì lúnlvm gø gvzàni vchyak we íe. Wedø àngdèò lvpat rvtørì svng bvnlì mvkrøm nvdøprì nvng vháng lúnlvm tvrà svng dvzaqshì ràwe íe.

Vsvng tiqgø taq àngdè nvng zìdang vbóng we vsvngrì nvng wa vtoq vtip shìlvm mø:í, kadø íwe mvril, zìdangrì nvng gø vzøm vzap we tvra wáràwe íratnø àngmaq nvng vdu vbóngdø nøt laqyàrì gvlshì ràwe íe. Welòngnø vsvngí àngdè svng la vlømvm radø wáshì we ínø we yáng kèní àngdè dvpat gø vjú lúnshìwe íe.

Wewa mvtaq vsvng wawe nø tiqgø nvng tiqgø nøt vtoā kérà longe, dvsháza nøt gvlshì nø, kà svdiq døng lvm gø gvzàni vchyak we íe. Wedø àngdèò cúnshìwe lvpat taq tiqdá vsvngrì í vlømvm radø nøt laqyàrì gvlshìnø vzøm vzap we vdòng bvnlì taq dvzaq dvkáng shàìwe ínìnø àng vdèò lvpatrì mòngzøl nø vnvpwe lvpatrì vtoshì lúng lúng:ìe.