Christus Vivit lega taqkeni zilangre nvng singwe shvngka

Vlù vlàngrì taq bvnchvtrì shìwvt àngpvn pvn vhøm mønø yak lvm angpvn pvn vhøm shì we mvtaq HIV/AIDS vna zínké òwe, vrù ra pvnrì vmaq we, shvwøn dówe, màshvla we bvnlìrì taq vlínwe, chøm, døngku rì màdá, bvnli màdá ínø tvrà mvdàmø wa vlángwe làngrérì gvzà yánglún shìwe íe.

Mònggvn taq màshvla we pvnrì taqkèní gvzàmnø, gvyaqshì we, shvnip shvnarwe, tasvng vze kewe rì làngrérì dvhø taq bøn mvnshìe. Wewa mvtaq àngdè góng angdè ídømshì we, tiqdá vsvng kaq vréshì we nvng kám nøt tvrà nvng vsvr mvnshì we vlù vlàngrì gvzà luq mvnshì ráì wanø shálún shìe.

Dèni bat taq mònggvn paqzí vháng mvnshì ráì we ínø yalòng svng gø yel ràwe íe. Wedø íwe taq dèni bat nø digital bat wawe taq cúnshà ìwe ínø yalòng taq shvlawe dang nvng màshvka we dang rì vkøn we svng gø døm shá ràe. Yalòng taq nøngmaq shvngbe nø yùl yùlcè vtoq vtip shì lún nìe, paqzí rì lálún shìe, kámnøt tvrà nvng singwe dangrì kaq Internet taq cvnshì shvla we íe yarì shvngbe nø Internet wawe taqkèní vjú ziwe dang rì íe.

Ínìgø welòng Internet langwe taqkèní màshvla we dangrì taq vlín we, vsvngrì lvpat svng vtuwe dø íwe taqkèní tasvng vzøm nø vtoq vtip we dang kaq svng shvtin shìwe svng gø síng shá ràwe íe. Yalòng Internet wawe nø màshvla we hang sømla, lègarì taqkèní angdèò lvpat màshvla we dang svng vyuq dvzvŕ we svng mvdøm shìwe høqshaq ne vmám dvzvŕ we gø bøn sháòe.

Wedangrì nvng sing nø gø Svrabín angké rúng taq dvmàn nø vrashì bøì we íe.

Làngrérì nø shvngømré dvpat gø màshvla we ngàshàrì gvzàmwe taq kèní vgám lúnòe, zìdang vháng lvm dangrì taq tùbum dvbang lúnòe, dvsháza bvnlirì taqkèní tasvng mvkok we bvnlìrì wálúnò we íe.

Wewa mvtaq vdè móng vdè rvgaq, vdèò shvngømré rìkaq roqgvr lvm nvng Gvrayò dvbùshvng bvnlì rìkaq svng gø àngmaqò nvngøp taq kèní dvtit tvle lún lvm gø gvzà rà vchyak we íe.

Svrabín koqkámpè Francis shøn we taq làngré lvpat svng shvlá vtang cúnshì leqlúnò, nøt mvsøn bángkà svng ètàn nònø vháng vtang vlang leq lúngnò, bvnlì kèní cvn cvn narshì lvm mèwá shìni wanø nvngòn zika shøn bøà we íe. Wewa mvtaq làngrérì taqkèní kàngpè yesuò dvsháza shóngnøt taqkèní chutcháng we jàng laqyà shvlá rì cvnshàì nø tasvng vzøm ìwe taqkèní àngdè móng àngdè rvgaq nvng shvngømré rìtaq dvzaq shàì wanø dvkám we íe. ( Christus Vivit )