Cvmré gùnicèrì svng dvzøm mvkoqlvm dang.

Cvmré gùnicèrì svng dvzøm mvkoqlvm dang.

Vkvt rvmnvngpè,mè nàí cvmré lùlvm dèda:mshì bøì má?(møí nìnø) cvmrécè lúnlvm rvtø níshìráì má í nìnø pàmvra wvngē. Nàí wálúnò wenø shvlà mvchàcè mvkoqò nø dvzøm dvtélvm dvpvt Shóngnøt taq kèní ràe. Cvmrécè taq góng shìqshan nø pàmvrácè télún lvm dvpvt vchvt we íe. Myenmar móngdàn taq nø Cvmré shøq daqòrì svng mvkoq dvzømlvm tiqdvng nø tiqnvmshá íwe íe. Tiqdvng nø Svràwùnrìí paqzízì we dang tékaq nø mònggàng taq Shvngbè vbóngwe kaq svng shálún shìe. Angpè angmèmaqí røtshá íwe kàrì íe. Tiqmaq røtshì we kà svng nø dvtvn lún shìwe ínìgø tiqmaq røt shìwe kàrì svng nø Myenmar móng vsvngrì svng shvngønt dvtvn lvm yvkwe vle. Dènì nø nvmlvt shøqò we cvmré gùnìcè rì dvpvt paqzízì dvtit dvlè we íe. Lvngpvng yvng svng dvtú shìwe dang nø nvmlat cvmré gùnìcè lúnò we cvmré angpè angmèmaqí cvmré gùnìcè dvzøm mvkoq lvm dang yòl lvm dvpvt íe. Yupwe Cvmré gùnìcèrì svng gàlá kaq yup dvzvr we nø gvzà vtùk we íe. Kúngkūp nø bat tùt yùp dvzvr mvdaq we íe. Cvmré gùnìcèrì svng vgò màkùm shvján nvng laqtùn shvjání shvnvng nvng yvng gøpwà wàmà mvdaq we íe. Pàwálvm wanì yàdø wàò wenø tiqdang taq shvlà nìgø tiqdvng taqnø Cvmré gùnìcèrì svng chvt nø shaqhé shìlvm yvk dvzvrò we íe. Yup we rvtørì taq gø Cvmré gùnìcèrì svng mvràkéò dø vyáshìnø yup ràe. Shvnvng yvng shvyùpò we ínìgø vgò dvbìn we mvílvm dvpvt tiqlvp wà mvínø shònílvplvp vdùdø yùp dvzvr ràe. Cvmré gùnìcè mvlìmrì taq (22) nãyì dángtè yupshá shìe. Cvmré gùnìcèrì nø ngøwe nvng vláshìrìnø angwà íe. Shøn mvyø wenø cvmré gùnìcèrì nø vyáng raqdøngrì svng rvwèng màsháò we rvtnø íe. Wedø írvt dvshvt mvyøng wenø cvmré gùnìcè rvtørì taq vdùvbóng dø dvzøm mvkoqlvm wàì. Cvmré gùnìcè yùpwe rvtø angmè gø yùpràe. Nòngdvcøq we dang Cvmré gùnìcèrì nø nàmlvt shøqò nì taq vlwe bóngchìng 10% yùmshá shìe.

Wedø írvt vní Lvbán dángtè vdòng taq màyøm lvm dvpvt (2-3) nàyì vdòng taq màlé dø yùpnì gø cvmré svng dvshvtònø nòngdvcøq dvzvr ràe. Mèpvng nø dvshát mvrà. Ngø daqke Cvmrécèrì ngø wenø Cvmrécèrìò laqyà írvt mvrà we íe. Puqwá dvshér shìnì gø nòngdvcøqò nìgø pàwaò nìgø ngølùngē. Wedø ngø daqke zàe wa lánshìe. Yaqdøng rvwèí ngø wenø vgò mvcì shvla nø vháng lvm dang írvt shvlàe. Cvmré gvzà ngø daq nìnø zàngwa bònò nø shvlìnò. Cvmrécèrì nø vpúnlvm svng shóng shìwe íe. Angmaq ínø dvdvm mvsháò rvtnø wurí bòn mùn lvm svng svrè mvrà. Puqwá dvshér shìwe Yãdvng nø angpè angmèmaqí cì Svràwùnrì svng shøn røt mvyø we dang íe. Cvmrécèrì vlwe ínìnø yakà svng shvlá mvshà ètà shìnø mezøng shì. Puqwá dvsher shìwe vyòngrì nø nòng tiqpaq dvcøqò ke vsháye. Poqwá vkøn weí angboqboq dvshér shìwe ínìgø nøtshì mvrà. Angmè kení nvmlat vyøwerì nø cvmré puqwá dìwe nø vcaq we nvng naqwe íe. Mepvng nø vyòng angpvnpvn dì lu:nge. Tiqbaqbaq nø angke ke dì lú:ngì we íe. Wedø zaq we dìdaq ke Cì Svràwùn rì yvng svng dìnø paqzí røt shì ràe. Tìshør shìwe dang Cvmré gùnìcèrì svng (2-3) nì tiqbaq dang tè Tìshør ãràe. Cvmré gùnìcèrì nø shàpol vshóng weí angkøm køm vchaq shá shìe. Gvza male we rvtø rìtaq wedø bønshá shìe, ínìgø angwawà shvla bøwe íe. Wedø írvt sàbyà lvng mvrà. Shàpol vshóng we írvt vaseline angtì záò ke shvlae. Cvmré gùnìcèrì svng dvkùm lvm dang yàdángtè íwa kùmzøp we mví, ngàí cvnshì lúnò yvng kení tiq dvtvng dvtit dvlè ngòwe íe,

Add new comment

10 + 8 =