Cvmrécèrì ò nvmlvt dvtvng Paqzí dang.

Cvmrécèrì ò nvmlvt dvtvng Paqzí dang. 

Earliest Education

Dènì nø cvmrécèrìò nvmlvt dvtvng paqzí dang wawe kà vgo taq kení tiq dongcè dvmvn lvm íe.

Vzàng nvmlvt dvtvng paqzí dang  walòng nø shøqò nì kení vsak (8) nøng dvngtè svng shøn mvyø we íe. We mvril kení vlíng pvng shìnø nvm wa tiq dvtvng kení tiq dvtvng vsvng tiqgø dø vling vpo lù:nge.

 

We shøqò ni kení vsak(8) nøng høq pàlvm vchvke má? wanì nø nvmlvt vháng lvm dvpvt cvn pvng shiwe rvtø  írvt íe. Cvmrécèrì nø angdang dang kaq vháng lvm svng cvnlún lvm dvpvt shvngøt dvtú ràwe rvtø írvt gø íe.

Angpè angmè maqí vdèò angcø' angcè rì kaqsvng shóng shidø shvngøt dvtú lún shìwe rvtø íe.

We rvtø ritaq nø cvmrérìò vgo mvrcì vháng we rvt cvnshì we dang taq nønt lúm we rvtø íe. Wedø írvt mvn shiwe taq kení gø angmaq svng cvn shì dvzvr ràe.

 

Paqzí vdè rìí shø:nò we taq, we (8) nøng wawe rvtø vdòng taq vsvng tiqgø vháng lúnwe nvmlvt nø vgo mvrcì vháng vlún we íe, wae. We rvtø rìtaq vm-aq lvm gvzà neshì longe. Welòng nø (vharaq) ràwe rvt íe.

Vsvng vrvm gø cvmrérì svng shvla we kà, laqyà shvlá kení dvtvn ràe. Paqzí dang taq wanìnø lèga vrū lèga rø shálvm dvpvt tiqgø nvng tiqgø vpø kewe dvtvn lúnò nìnø cvmrérìò vgò mvcì vháng we dang kaqsvng yvng lún shì longe.

Wedø írvt cvmrérì nø (vharaq) mvlúnò we, paqzí dang svng gø shvlá wacè cvn shì mvlúnò we, tiq dvng taq nø mvn shìwe mv-vl we, yarì svng mvlúnò nìnø cvmrérìò vgo mvrcì nø vháng ràwe dvngtè vháng lún lvm mvvl long.
           
Wervt cvmré tiqgøò nvmlvt ràwe paqzí dang svng vto lúnò ninø, Cvmrécèò tiq lvpvt taq gvzà vjú vlnø vháng lvm wa íe.
            

Paqzí vdè rìí shønò we kà taq cvmré tiqgøò paqzí dang svng vgo mvrcì yvng gòng we høq shaqré rìí wálúnò we ínìnø cvmrécè nø pán vshvt weí (high rates) vháng lún we cvmré tiqgø ílonge.

Angí waò we laqmù laqyà rì kení vsak cvm we ínìgø shvlà dø dvtvn lún lú:ngòe.

Angpè angmè maqí zùng yvng kení ziwe lèga rì svng cvmrérì nvng tiqdø shvnvng yvng rúng dvbvng nø da:ngò høq wá dvzvr wenø bvnlì tiq lòng svng dvdvng lvm nønt taq za:ngò nø bvnlì dvdvng lvm laqyà rì vl longe.

Angpè angmè maqí shvnvng yvng vlnø bvnlì kaq nønt lúm lvm dvpvt dvtú we cvmréò lvpvt vháng lvm tvrà svng dvbvng bøà wanø shøn lún shìe.           

 

Cvmrérì svng nvnggùn vl dvzvr we vsháng ám:pà (break fast) vm,aq lvm zíòwe nø tiqnì taq a:ngí vhø'mò we bvn chvt rìsvng shvlé lúnlvm nønt kù:ngà ílo:nge. Zùng yvng paqzí lèga rì svng gø nønt lúm lvm wa íe.
                   
Zùng yvng kení chøm kaq lo daq kegø bèlaq rì kadø gvl lvm, lèga wa lvm, mvn shì lvm, shaqré rìsvng dvbvng lvm yarì svng shaqré rìí shvngøt ràe. Cvmré vrvm nø wedø washá lvm vdu we íe.
          
Cvmré tiqgø wedø paqzí shá lvm dvpvt nø angpè angmè maqí gvzà shvngøt dvtú ràwe íe. 
           

Paqzí shawe cvmré tiqgø ílún lvm dvpvt angpè angmè maqí cvmrérìò nønt lúm we yv:ngò nø nvnggùn zíò nø tvrà shøl shvngøt dvbvng ràe wanø paqzí ziwe kà yayvng nvl lvm íe.

Add new comment

14 + 3 =