Cvmrécèrì dvpat PèMè maqí dvdv:mā rawe dang

Cvmrécèrì dvpat PèMè maqí dvdv:mā rawe dang

Dèni nø cvmrécèrì dvpat PèMè maqí dvdv:mā lvm dang wawe kà vgo taq kèní dvtit dvle mvyø:nge.

Cvmré goqnicèrì wawe nø gvlò ni kèní vbì nøng høq mvrim svng shønòe. Àngmaq mvrimcèrì rvtø
taq gvza vchvk we írat pèmè maqí ya tiq dang svng dvdvmā lvm waì.

 PèMè nígø cvmré goqnicè svng lúnò we írat nønt shøm dvbù nøt byò weó kapvn walvm kadøku
dvzøm lvm wanø nønt shuk we rvtø gø íe. 

 Cvmré mvgvlò we rvtø taq gòng we gvmsòng nø vní gø dvpat wa írvt  vkvt nø kadø gø láng mvluqámì
rat mvgø'm shìwe ang dang dang gvza vlámì weí kadø døngku tiq chøm lvpat svng kadø shvlelám
kū íámì má?

Kadø dvshà nø yatwe ínigø pèmè ní ínø, vdèò angcø' angcèrì dvpat mvngá shvlá gvlò nø mvbøn
bøn høq shvngøt dvkum lvm íe.

 Cvmrécè nø vkvt vní nøng høqà:tnà kat tvrà dí shápáng shì weí ang dí mvyø we shvrà svng dílún bø'à.
Kà shvdún vmpà vmlvm íe, we rat zún elu bø'ò, we dá:ngí kūng svng svbyó mvdvm taq èhvp bø'ò
wanø dvzvr lúnshì bø'ì, we dá:ngí angmè shvnvng tuqàtna kvt shvgùnò weó cvmré dvbù nø vrá
dvzøm dvbvng lvm dvlú íbø'ì we íe. Yalùng nø cvmré svng dvki we mví, cvmré svng nønt nvng
sing we paqzí dang svng shvngøt shìwe tiq dang íe. Cvmré tiqgøò vháng lvm dvpat pèmè maqí
tvrà shøl dvbvng we dang íe. Wedø cvmrécèrì svng tvrà shøl dvbvng we nø pèmè maqí dvdvmò
we shønràn taq tuqnø cvmrérìò vháng lvm tínchuk dvbv:ngò we dang íe. Cvmré tiqgø' taq power
kū:ngàrì vlwe íe. Dvdvm sháò nøt vle. Àngmaq dvpat gvza nøtshøm rà vle.

 Cvmrérì nø àngmaq svng shaqrérìí takecare ဂရုစိုက် nø shvngøt dvtú we dang svng angmaqí sháòe.
Angmaq vsak cvm we ínigø døngku taq pèmè maqí dvdvmò shønràn vlwe nvnggùn zì nø tubum
dvbvng we svng sháòe. 

  Tiqkvt kvt nø shvnvng taq vlrìí mvgvm mvshvla we cvmré tiqgø' dø tuqàm dvzvr lvm dang gø vlshàe.
Werat pèmè ní í, darárì gvlò nø yalùng wá mvdaq, kū yvng dí mvdaq vgám lvm gø vlshàe.

 1960 nøng rvm taq vlnø télú:ngí we cvmrérìò rvtø taq shvngøt dø tiqchá pvn vrvm svng serè ràe wawe
dará dvtú dvshvt dø v'lràe. Cvmré wawe nø angpè,mè svng serè ràe. Shaqrérìí dvtú shvngøt we kà
svng cvnràe. Shaqrérìí pvn vrvm svng serè ràe wanø shvngøt yv:ngà rat vsháme. Chøm døngku taq
pàgø shøng mvkàm shìàme, confident màvl we cvmré íáme. Vdè gø vdèò góng svng kám we nøt
mv-vl ámì. Pèmè maqí svng gø role model shvla we svng gø mvyvng bø'à. Wedø cvmré nø vdè
dè kám we nvng pèmè maq svng kám we nøt gø nmvng v:me.

Werat nø cvm we rvtø taq kèní cvmré nø chøm døngku vrvm taq vlwe írat shaqrérì vhøm vzøm vzap
weí mvnshì dvzvr nø shinggán nvng chøm màbúng we dang svng dvdvm shá dvzvr ràe. Wedø mvnshì
sórí အန္တရာယ် mvjò vlwe svng vyá shìnø chaqbvp dvdvm shálvm tubum dvbvng ràe. We kat wa vzvng
nø family relationship døngku vdùng taq vrvm vrá ràwe sháò ínigø vkat nø friend relationship
rvmnvng rvmchvng rìnvng gø vrvm vrá ràwe dang svng gø dvdvm shá bø'à we íe.

 Vdèò angcø' angcèrì svng pèmè maqí mvshòng we dang svng mvwà lvm shvngøt ràe. Tiqkvt kvt nø
pèmè maqí dvdvmò dø mvbøn daq ke shvmná mvgøl we bø'nshàe. We rvtø taq ngàcè írat ngàí shóngshinge.
Ngà shvmná shvrí we dang shvyúm ràe wanø ø dvdvmā ràe. Tiqmaq nø té shvmná shvrí shìnø yapè nø
shvmná tvpám mvyø'pàí wanø shvmná té shvrí shìwe dang nø cvmrérì svng bvttáng ကလဲ့စားချေ òwe dang
ívme. Cvmrérì nø kū:ngà powerless mv-vl we svng pèmè maqí dvdvm shárà we íe.

 Døngku vdùng taq té nøtkøm we lúnlvm fix binsin dvgø' ràwe íe. Cvmrérì nvng tvp vl lvm rvtø gvza zí ràe.
Cvmrérì svng manage bvnlì pvràn dvtú dvshvt shá ràe. We kat wa mòngzøl vl byò we relationship svng
lúnlvm ídaqe.

Wedø cvm we rvtø kèní chvqdvp practice shvmùn lvm gø gvza vchvke. We kat wa shaqrérì màvlámì mèpvng
taq àngmaq vdè nø vdè mònggan taq cúnshì dvzaq shì lúnlvm pèmè rì dvpat one only chance vkoq vkáng
tiq lùng íe wàng dvtit dvle we āyáng nvl lvm íe. Shvngbe oqà.