Cvmrécèrì gø dvci cvnwe zetnøt rvrnøt taq kèní vdèò lvpvt dvrà tong shìe.

Cvmrécèrì gø dvci cvnwe zetnøt rvrnøt taq kèní vdèò lvpvt dvrà tong shìe.

Mindset

   Deninø Cvmrécèrì taq dvci cvnwe zetnøt rvrnøt vbá we taq kèní vdèò lvpvt dvrà tong shìe wàwe kà vgo kèní dvtit dvle lvm íe.         

Àngmèò nønt vdúng taq vlwe zetnøt rvrnøt nvng pvn vrvm taq shølshú paqzí kèní shóngnøt vzøm we relationship dang høq angmaq lepvt svng tvrã tong shìwe svng yvng lún shìe.

           
Dakdvdvm sòn paqzí vdèrìí shønò wenø cvmré tiqgø'ò dakdvdvm we dang nø ang shøqòni kèní lóng døng tiqchvng mvdvm taq vroò wedø shøqò we ni kèní vbá daqwe íe, wae.

           
Cvmré tiqgø'nø a:ngò nønt vdúng taq a:ngí lún mvyø we dvrè tiqpvn pvn svng lún shìhøq dvzaq shìlvm nønt zvng we íe. Cvmré tiqgø'ò jvng laqyà nø we cvmrérìò bønwe zìdvng rìnø datcì, disè só zv:ngò dø jvng laqyà rìsvng nvnggùn zíò wedø ívm nø té vháng lvm lúnshì lung we íe. Cvmré rì angmaqí kadø yv:ngò we, dvdvmò we, kadø vlwe nvng angmaqò laqyà dvtvn we shvngbè nø zetnøt rvrnøt rì, íe wàe.

          
Mindset wàwe dakdvdvm sòn paqzí Vní pvn vlè wanø paqzí vdèrìí shønò we íe.

Nvmlat tiqpvn nø pvngyàn bùngdē dvdvm we íe. Wedø dvdvmò we cvmréò jvng laqyà nvng zetnøt rvrnøt rì, dakdvdvm sòn we dang vrvm taq tøptøp wa ínø a:ngí rvsvng bø'à we dang svng nø vlíng lvm dang mv-vlwe íe. Angí waò we dang vrvm nø nøtshøm lvm vlnø vháng lvmdang svng dvzaq shì sórí kvt súm we mv-vl lvm vyá shì lùng we íe. Paqzí dang taq mvdaq weí rvt dang vrvm taq we paqzí dang kèní lúnlvm rvtø nønt taq zàng we íe.

           
Vrá tin tiqpvn mindset nø vháng lúnlvm dvpvt rvtø vrvm taq dvdvm nø vlwe íe. Paqzí mvshàwe ínìnø kvtsúm lvm wa ílù:ngì wa dvdvm shàwe vsvng tiqgø' íe. Vdè taq vlwe zetnøt rvrnøt kèní nøntdøng nønttøng tøng dvzaq shìnø dvbù nøntshøm we íe.
           
Cvmwe angcø'angcè rìnø wedø dakdvdvm sòn we laqyà dang kèní dvtvn we íe. Wedø dakdvdvm sòn we rìnø angmaqí lún mvyø we nøntshøm dvbu lvm dang rìsvng wálúnò we íe.

           
Pàqzí vdèrìí shønò wenø vbì nøng mvrim íwe cvmré rì svng gún dvtøpmò we rvtnø shálún shìwe íe.

           
Nvmlat tiqpvn mindset vlwe cvmrérìnø angí màvlé lvm mvshut lvm dvpvt yòlwe bvnlì rìsvng rvsà:ngò we íe. Wervtnø angò mindset svng shálún shìe.

Vhánglvm dvpvt nønt we dakdvdvm sòn we cvmrérì nø téyat we vgo mvcìí dvdvm ràwe rìsvng rvsvng shìe. Angmaq nø pàlvm yòlwe rìsvng màrvsv:ngò nø té yatwe rìsvng rvsvng shìmá dvdvm lvm vlwe nø téshá lvm téyatwe rìsvng rvsàng shìwe íe, wanø paqzí vdèrìí shønò we íe.

           
We rvtnø angmaq rìnø two way street dakdvdvm sòn we Vní dang kèní lvpvt svng dìwe íe. Cvmré rvtø shøqòni kèní dakdvdvm we nvng angmaqò lvpvt svng dìwe íe wanø shaqrérìí dvdvmì nø angmaq télú:ngí dvgvp Pèmè nvng angcø'angcè dvhøø màdū màbúng we mv-vl lvm dvpvt shvdúm mvyøng we íe.