"Cvmrérìí mvrà vléò we dag svng yàngò nø vdvngnga sháã lvm dang"

"Cvmrérìí mvrà vléò we dang svng yàngò nø vdvngnga sháã lvm dang"

Shóngshøng we pè mè, vnvm vchvng maq mònggàn taq yul vtvng bvnlì nø dvgá vsvngrì kaqsvng mvrà shvrì we tvrà ínø yak vtvng bvnlì nø dvgá vsvng tiqgø kaq nøn:gùn zílvm dvbvng dvzøm lvm tvrà íe.

Nøngmaq mònggàn rvgvq vsvng vrvm nø vlé shì sháò we íe, ínìgø wedø mvrà vlé shì we kaqsvng mèpvng mvbøn lvm dvpvt vdvng shì lvm, kàdø vlé daqò tvrà dang vrvm kení vdvng shì shá lvm nøngmaq angpè angmè maqí cvmnì kení shvngøt dvtv:na ràe.

Nøng maq Angpè apmè maqí cvmrérì kaqsvng mvrà vlé mvdaq wanø shøn sháò we íe. Mvrà Vlé daqò ke shvmná shvrí shì nø ngàn lvm, mvrà zílvm mvrà shvrì lvm wa ídaq ke cvmré rìnø vlédaqò kat svre nø lvpvt taq shønlvm, walvm svre weí wá mvkàm shì lòngnø kám nøt mvlúnò nø telong we íe.

Wedø mvbøn lvm dvpvt nø angcø angcèrì kaqsvng vlé daqò kè mvrà zílvm tvle nøn:gùn zí dvbvng kelòng nø vlé daqò tvrà kení vdvngã shá lvm dvpvt cvnnàò we mvnggá íe. Ínìgø nøngmaq bàshà angmvdò nvng ang mvdò wawe taq angpè angmè rìnø Øp shú rì írvt nø gvmzò mvgvm rìwa ísharvt cvmré rì kaqsvng shóngnøt mvtaq svre dvzvr nø téwa Øp mòwe íe.

Wedø íe tvrà rìnø angcø angcèrì svng ràwe mvtaq mvrà shvrì sháò we írvt dvdvm ràe. Nøngmaq angpè angmè rìnø Cvmrérìí vlé daqòke nànø vkvt tiqbaq vrá nàlé bøà nga svng dvshá èlù:ngàè vsvng mvgám èíe mà? Wedø èshønò rvt cvmré ò nøt mvsøn yvng zang wa tuq nø nøtyòl nøtzà shá shì lònge. Jøng jøng Cvmrérìí vlé daqòke mvrà zílvm tvle nø vléò tvrà rìkaqsvng nøt yvng gúng wáshì nø nvmwacè shvngøtò wenø téwa jò we kaqsvng yvnglún shìe.

Cvmrérì vm mvnè shìwe vm-vq lvm rìkaq svng zíò nìgø mv-vm daqò ke shóng nøt mv vl dárì walvm mvza nø vm aq mvnè shìwe kaqsvng angí vm neshì lvm høq shønãò lòng nø gvzà shvla we tvrà íe. Yàlòng cip shìwe nøt nø shaq Kùng-ngà íe wanø shá lún shìe.

Wedø írvt Cvmrérì tiqmaq nø kàdø bøn nì gø angpè angmè svng mà dvtv:nò nøt cvm nìgø bvnchat rì vhømò nìgø angmaq wawa laqí wanø vlshá lú:ngòe. Kàdø ínì gø shaqré rìkaqsvng chvpdap shøn lvm mví bøì we kaqsvng síngshá ràe.

Vsak télú:ngì rvtø rìtaq ínøgø angmaqò nøt taq angpè angmè rìkaq svng shønò ke dvbvng nga lvm mvdvm mvrà shvrì lvm téwa luqrvt, shvraq shì lvm, bvnchat rì vhømò rvtø rìtaq pvran nà dvbvng lvm nø mv vl téwa nøt dvshá dvzvr rae wanø nøt taq záng bøòe. Wervt nø angmaq nø ticiq vléò we tiq tvrà kaq svng walvm wa ílònge.

Wetø vlé shìwe kaqsvng vdèò angpè angmè rìkaq shøn mvkam shì bøwe Cvmrérì yvng ràwe mø:í, Angpè angmè íøp káng shø:lò yvng rawe íe. " Vsvng lvpvt taq mà-vléò we vsvng tiqgø gø mvl, vléò we vsvng rìgø zìdvng mvl, ínìgø Zìdvng vháng we vsvng vram nø vlé shì we yvng kení vdvng shá shìwe vsvng rì íe”.

Mèpvng vlé lvm tvrà rìkaqsvng shvrèshì mvrà, vlédaqò rvtø vrvm taq vdvng nø cvnshì lúnlvm ràe. Timaq angpè angmèrìí shønò we kà taq mènàlé nì wàe, mènàlé ni walòng nø pàgø mèwà nì dø màwá èvl wakà nvng vbung we íe. Kàpvn gø mèwàò nìnø pàgø mà-vl we vsvng tiq gø ílòngè.

Wedø írvt Shóngshøng we vpè mè vnvm vchvngmaq angcø angcèrìí mvrà vléò we vl daqke angpè angmè maqí nø yàlòng Cvmré rìí cvnshìlvm tvrà íe wanø dvda:mă ràe. Mvra menalé shì ni wa nø shøn lvm,dvrøqlvm tvlè mvrà vlé daqò long svng vdvng sháò we angcø angcèrì bøn lúnlvm dvpvt shvngøt lvm dvzaq shàì.