Cvmrérì shóngshi we angpè angmèrì ílvm dvpvt dvzaq shì lvm dang.

Cvmrérì shóngshi we angpè angmèrì ílvm dvpvt dvzaq shì lvm dang.

Angpè angmè ní nøtkøm we mvl ninø angcø' angcèrìí angpè angmè maq svng shòngwe shóngnøt yúmlvm wa íe. Angcø' angcè rìnø døngkū taq tiqdø

vlwe angpè angmè maqò laqyà svng cvnshi sháò we íe.

We rvtnø vdèò angcø' angcè rìkaqsvng shvla we laqyà rì vl lvm dvpvt angpè angmè maqí kadø vl dvtvn lvm svng shøn mvyø:nge.

Døngkū tiqmaq nø angpè angmè nvng angcø angcè maq dvhø taq vrvm vrá we mv-vl svng yvng lún shìe.

Angcø' angcè rìí svre nø vpølvm dvpvt kà màshøn dømvwácè vlwe nø angpè angmè nvng angcø angcè dvhø taq shóngnøt yóm dvzvr we íe.

Døngkū vsvng vdòng taq vrvm vrá we mv-vl, nìnø àngpè àngmè maq mvdvmø dvgá rvmnvng rìsvng tévrvm vrá nø vløm shì sháòe.

Wedø írvt cvmrérì svng vkvt vkvt mvgoq ãnø, nøtshøm dvbù sórí vrvm vrá lvmsvng mènàtiq nøngni. 

Vrá nø nøngmaqò àngcø àngcèrì svng vkvtkvt vkiq nø mvrinò we rìgø angmaq nvng té vsvr lò:nge. Cvmrérì vdèò chøm døng taq mvbyò we

ínìnø shønggvn svng vsewe íshae. Wervtnø vdèò angcø' àngcèrì kaqsvng angmaq shóngwám shìdø kà vtvng lvm, nøtbyò dø dvzøm mvkok lvm vchvke.

Nøngmaq shaqré rìnø bvnlì loqwe rvt cvmrérì nvng kà shvlá wa dvmvn mvlún shìwe vle. Cvmrérì nø angpè angmè maqí kà shvlá taqí dvmvn nø dvzøm

mvkok lvm svng shóng shìe. Wedø angpè angmè maq bvnlì gvza luqwe rvtø rìtaq cvmrérì nvng vsvr shá shìe.

Wedø íwe rvtø rìtaq angpè angmè maqí cvmrérì svng rvtø lūshì nø vkvt vkvt vtoq vtip lvm vchvke. Zaqlè mvnvm rì vrá tuqra ke cvmrérì svng kà meshøn nøngni,

vrúm kaq nvse bønøng vlò dv:ngí cvmré rìsvng zèlke we rìnø cvmrérì svng nøtcvm dvzvr we íe.

Wedø ínìnø nøngmaq angpè angmè maqsvng shòngwe shóngnøt yómnø mvshvla we dang svng vpò lvm ílúng we íe.

Vránø kūpè nvng menàcvn ni, kà meshøn ni, úpè nvng kà meshøn ni, menà cvn ni,warìnø, nøngmaq angpè angmè maqsvng mvshvla we dø yàng lúngò we íe,

wervt nø angpè angmè maq gvza vyá shì ràwe svng dvdvm lvm vle.

Angpè angmè ninø vkvt vkvt àshvt we ínìnø angpè angmè maqsvng cvmrérìò shóngnøt yóm we nvng chøm taq vl mvbyò we bøn shá shìe.

Døngkū angpè angmè ni nøntkøm lvm mv-vlwe, vrvm vrá lvm mv-vl, shvlá wacè kà vtvn shìwe dvmvn we mv-vl we dang gø cvmrérì angpè angmè maqsvng

shòng lvm vpø we dang yóm lvm wa íe.

Wedø írvt nøngmaq nø àngcø àngcèrìò shóngshì we angpè angmè ni ílún lvm, laqyà shvlá dvtvn lúnlvm dvzaq shàì, wang nø dvmvn we kà íe,

shvngkà tã shìnøng we shvngbe kaqsvng oqã.