Cvmrérì svng kadø shvngøt vjøng lvm dang nvmlvt (1) tut

Cvmrérì svng kadø shvngøt vjøng lvm dang nvmlvt (1) tut.

1 Vdèò døngkū dvpvt dèzaq shinøng we shóng shøng we pèmè vnvm vchvng maqe...vdè nø døngkū angpè angmè íbø shà rvt rà vchvk we shvngbe svng dvzaq shì ràbøì we íe. Døngkū shvzøng shiwe dang kèní wa Kømzøp lvm mv-vl. Døngkū nvng sing nø shárà we paqzí rìsvng gø cvn shì ràe. Té kaqnø vdèò angcø' angcèrìí shá vdū we paqzí rìsvng vdèí shvngøt vjøng ràwe dang gø vle. Pàrvt ímá wanìnø dèni la cvmrérì nø, mèpvng nìò mònggvn nvng shvngømré svng shølshú vgo, dvcøp lvm dvzøm shúpè la nvng vpø vnvp ring vtvng we írvtnø shóngnøt taq kèní shvngøt dvtú lúnlvm vchvk we íe. Nvmlvt taq, cvmrérìí ngàngdøng we nøt svng lúnlvm dvpvt shvmun nãràe...wawe dang taqnø vdèò góng svng vdè kám lúnlvm cvn dvzvr ràe. Kà shvbóng taq-hang cømla vruò ke angí shòngò dø vru dvzvrò, shvnvng taq kèní wedø waò, kudø wàò wa mè shøn ni, angí shòngò wedang dvdvngò we høq vruò kèní wa anggø nøtbyo lvm vle. Tiq dvshaq gvzà krvk dø vru mvlúnò we ínìgø mepvng nø nvmwa vnvp lo:nge. Angpè angmè maq nø cvmrérì shvnvng yvng vlrànø shvgùn shvring:alvm svng vná mvdaq we íe. Wedø shvgùnò wecvmré gønø vdè nø vdèò góng svng kámnø, nøtshøm lvm vle. Vrá nø, nøtshøm dvbù lvm, shvrúng nøt vl lvm dvpvt nvngùn zíràe. We da:ngí shóngnøt vl lvm dvpvt gø cvn naràe. Døngmvn kømzøp we tvrà nvng vrvm vrá sha nø dvrá we dang taq rip lúnlvm cvn dvtú ràe. Cvmrérì vsvk cvm we rvtø rì taq kèní cipshì nøt vl lvm nvng shaqré shaqtvng rømnvng rømchvngrì kaqsvng gø vpø sha we nøt mvcøn taq zá:ng shì høq shvngøt ràe. Wedø vpø we laqyà shvla we svng dènila lvpvt taq cvmrérìí vto lún høq dvtvn lúnlvm vchvke.

No (2) taq nø, vháng vlún we cvmrérì bøn lúnlvm dvpvt, cvmrérì svng shvgùn shvring we vl ràe. Cvmrérì mvkún kun we svng byo we, mvbyo we ínìgø gvzà byoè lé wanø shvgùnò we ínìnø angmaq nøt byo bøì we íe. Mvrà lánø vzelwe rìsvng bat tut wá mvdaq we svng síng shá lvm shvngøt ràe. Nøngmaq angpè angmè tiqmaq nø, cvmrérìí tiq pvn pvn waò ke dvrøq nø nga:nò nìnø cvmrérìò vzang lvp tvrà svng vgvmò we ísháshìe. Vháng we móngdàn rì taq nø cvmrérì svng tékaq shvrà zíò we svng yvng lún shìe. Cvmrérì svng kà zaq íshønò we ínìnø cvmrérì svng vréshìe wanø dvrá nvng mvrà zíòwe svng gø yvnglún shìwe íe. We rvtnø cvmrérì vháng lvm dang taq angpè angmè maqí gvzà shvngøt lvm dvcøp lvm vchvk we íe. No (3) dang taq, angpè angmè maq cvndøng ràwe nø, cvmrécèrì svng vpø ràe. Nà angpè angmè í shóngnøt dvdvn we, vpøò we rìsvng kàí shvngøt nò we mvtaq, laqyà shvlá taq kèní gø dvtvn lvm vchvk we íe. Cvmrérì svng nø rvtø gvzà zí ràe. Cvmrérìò mørdàng taq kà shøn vyá shì ràe. Pàrvt ímá wanìnø cvmrérì nø cvm we rvtø rìtaq gvzà cvn shì we vle, vrá nø yvng bøà we svng zang wa cvn shìe. We rvtnø laqyà shvlá rìsvng té kaq yvng lúnlvm, angpè angmè maqí rvtø zíò nø shvngøt dvtú lvm wàì. No (4) dang taqnø, cvmrérì svng bvnlì dvtvn we, bvnlì wá dvzvr we dang taq cvn lvm dang svng yv:ngì.Shóngshøng we pèmè vnvm vchvng maqé cvmrérì svng bvnlì dvzvrò ke bvnlì dvda:ng lvm nvng bvnlì wáshà lvm dvpvt wa mví, bvnlì døngjá lushì shá lvm, bvnlìò ang dvpø svng nøt shálvm nvng bvnlì dvzaq shìwe ang tvnù mvnggá svng dvdvm shá dvzvr ràe. Vsvk (5-6) nøng rvm íwe cvmrérì svng ginsøp mvn shì dáng bøà mèpvng dvrè rìsvng shvlá mvcha rvdã shá ràe. Vsvk (7) nøng rvm taqnø, bvnlì dvzvr rà bøì. Angmaqí wádá:ngò we bvnlì rì svng dvtvn ràe. Kà shvbong vmlvm shvbóy rì dvgø dvzvr we vmpà v'm dvng shì bøì mepvng kung rì shør:ò nø rvda lvm dvzvr ràe. Wedø cvmrérìí wà bøà we svng gvzà jòè shvlae wanø shvggùn kà shøn ràe. Wedø shønò nìnø nøt dvbù lvm lúnò wenø nvngùn zíò we íe. Mvrà zíòwe vzel we ínìnø nøt cvm shá lvm wà íe. We rvtnø cvmwe cvmrérì svng shvngøt vjøng we rvtø taq gvzà vyá shìnø shvngøt ràe. Cvmrérìí kà shøn we, bvnlì waò we dang nvng jvng laqyà rìsvng yv:ngò nø nøt yanggúng wáshì nø nvmwacè shvngøt vjøng lvm wàì, wang nø ngám shìwe tut rìsvng mèpvng tãshì lúnlvm ílo:nge.

 

 

Add new comment

13 + 0 =