Cvmwe rvtø kení shøngnìCvmwe rvtø kení shøngnì paqzí dvyø shvlá wùn shì lún lvm dvpvt dvzaq shì ràwe mvngá.

Cvmwe rvtø kení shøngnì paqzí dvyø shvlá wùn shì lún lvm dvpvt dvzaq shì ràwe mvngá.

Importance of art Dènì nø Cvmrécerì kaq svng Cvm lvpat kèní shøngnì paqzí dvyø gvzà leqté lùng dø, vháng vlúnlvm dvpvt mvngá gvlnø shvngøt dvtú lvm dang tiqdùngce dvtit dvle meyønge. Shvngkà ta shìnøng we shúng shøng wè pèmè vnvmvchvngmaq, shøngnì paqzí kadvngte vchvt we kaq svng èshá nøng nàíē. Music wawe shingnì paqzí nø vsvng tiq gøò Stress wawe nøtyòl mvjor lvm kaqsvng shvyùmshì lúnòe. Vsvng tiqgø nøt mvbyo we svng gø, shàmná rìwe kaq svng gø shvyùmã lúnòe. Kà shvbóng- Cvmré tiqgø ngø ke mvkún nãm wacè mvkúnò sórí shvlìnò dvgvp lìn lúnshì rvt music Shøngnì paqzí nø kadvngtè vjú vlē wàlòng svng yáng lúnshìe. Music Shøngnì paqzí nø legà rø Shìwe, mvkún mvkún we,(gìdaq) shøngnì møt paqzí, hang vrùò we, cìí shvnvpò we, hàng sømla , hàng vngàt dvtvn bóy nvng laqmù paqzírì svng a:lò we íe.

Wedø í rvt Shøngnì paqzí wawe nø, vsvng tiqgø svng lvpvt zìdvng, mà rvwing nøt dvbù dvzvl lún we íe. Cvmrénì kení shøngnì paqzí dvyø shvlá èwùnò long nø cvmrérìo vgò mvcì vdòng taq mvcing lúnò we rvtø íe. Shøngnì paqzí taq Shøngnì møtlvm paqzí tiqpvn gø vbáe. Wervt cvmrérì svng mvkún tãshì dvzvr we, mvkún mvkùn dvzvr we gø Cvmrécè tiqgøò, tàshì nø cvnshì sháò dang svng vháng dvzvr lún shìe. Shøngnì møtlvm svng mànmàn tàshì sórí télú:ng we cvmré tiqgø nø dvgá cvmrérìí shønò we kà svng gø síngsháò nø tiqdø vrám vrá sháshì lùnge. Shøngnì nø cvmré tiqgøò tácíng shálvm zìdang, nøt nvng singwe dvdvm sháò we nyàn nvng zìdang svng nøt shá shìwe nyàn paqzí dvnùng ngà we íe. AngPè angmèmaq nvng cvmrérì tiqdø vhøm we rvtø taq gø shaqré nvng angcø angcèrì dvhøø gø shóngnøt vzøm lvm téwa vle. Cvmré télúng dvgvp wã legà kàrū rø dvzvr we mvdvm nø, cvmrélvpat kení (gaqdún) hàng sømlà vbá we dvzángrì nvng mvshøl legàrì svng svmaq svmaqce rø dvzvr weí legà kàru rølvm ang wawa nøntløm vmè. Angpè angmè maqí legà rø dvzvr we taq cvnshì gø nø shánønt paqzì té vhánglvm vlē.Zong lùngwe rvtø taq Zong yvng shv:ngøt we legàrì svng chøm yvng gø lvga rø lvm nóngùn zíshì we taq zongyvng téwa shálvm nónggùn kù:ngà vlē. Angpè angmè maqí hàng vngvt sømlà rì, state show rì yáng dvzvrò ke cvmré rìnø vsvng angpóng svng vpø shá we nvng vtoq-vtip shà daqòe. Angmaqí dvdvm lvm kù:ngà rì, dvcøpshìlvm bvlìrì svng téwa mánshálvm ílùnge. Góngsha dang gø shìqshan nø mvkún mánlvm, shøngnì møtlvm pvn angdangdang taq gø shálvm zìdang vl lùng nø vdèò lvpat dvpvt, Shøngnì paqzí dvyø svng dvtélvm waì wang nø, dvtit dvle we kà svng yàyáng na:ròe. By- mr. Paul hpu ye Dwi Photos Credit - Google Images