Cvnshìwe tvrà

Shóngshøngwe zìlàngré vnvm vchangrì vsvng lvpat yàngùng nø cvnshì ràwe wa íe. Cvnshì ràwe taq cvmré làngré shaqré wanø àng mvlim svng mvsat shìwe gø mvl we íe. Cvnshì èlúnò mvbat sháramshì mvbat ínø téwa vjú vl mvbat íwe íe. Wedø íratnø àngdèí cvnshì èlúnò we dángte svnggø tiqdá vsvng kaq dvtit tvle shìwe ígø àngdè dvpat téwa vjú lúnshì we íe. Shóngshøng we zìlangréri àngdèò lvpat taq cvnshàì we dang svng laq mvnarì. Dang àngpvn pvn taq kèní cvnshì shvla we taq ni vramò tvmø bvnlìrì àngdè mvdàm tewe rì taq kèní cvnshì shvla we íe. Gø vrvm nø rvtø vrvm shvrà vrvm taq cvnshì lvm vl we íe. Pàwálvm wani cvnshìe wawe nø lvpat zìdang vháng lúnlvm dvpat cvn shàì wewa íe. Nøngmaq gø vrvm rìò góngnøt mvsøn laqyàrìnø tiqni mvdàm tiqni shvla lvpsvng vlíng vpo shì ràwe írat nø cvnshì we tvrà nø welòng dvpat mvdøng vchyakwe tì-aq rø íe wanø shøn lúnshì we íe. Wedø ínø cvnshì we dang taq dvzaq shìwe nø welòng tì-aq rø svng téwa shvlá lvm dvpat nvmpøn ezángò weó vbóng we íe. We dø tiq dvchá làngré tiqgøò lvpat zìdang vhángnø vlíng vpo lvm nø àngdè lvpat taq kadángte cvnshì dang taq dvzaq shìe wa lòng taq mvdøng cvnwe íe. Ècvn shì lún bøò we rì svng gø chvpdap èwaò nø lángshá lvm gø vchyak we íe. Mvdøngnø àngdèò cvnshì we dang taq shvrúng nøntrì èvlwe tiq gø dvpat àngò lvpat zìdang vhángnø vlíng vpo lvm dang svng kadøgø vgám ma mvlún shìlong. Cvnshìwe dang svng vpø shvringò we tiqgøò dvpat nø minutes, seconds vrvm nø vjú vlwe íe. Tiq kat kat vléshì rawe gø vhøm shìrae ínigø welòng vléshì bøwe taqwa nøt vtangnø vsøm mvzí shì lvm gvzà vchyake. Cvnshàì we lvpat taqøgø rvtø svng vhø vhwaq dvsømnø, pøgvmsùngrì vwa wadø dvbéì dø mø:ínø rvtø svng gø vjú vldø lángìwe taq àngdèò lvpat zìdang vháng lúnlvm paqzí rì cvnshì laq lúnì wangnø dvshá dvzitwe dvtit tvle mòngkà yayáng naròe.