Dèdamò we dangrì nvng nvpniò rvtø

Dèdamò we dangrì nvng nvpniò rvtø

Vsvng tiqgø taq bvnlì wang svng èzáng shì bø we mèpvng vsak 60 nøng dángte hø shaq yúm vtang bvnlì 3 pvn dángte høq washìe wanø shálún shìe. Vsak 20 - 30 nøng dvhø taq bvnlì tiqlòng mè pvng tiqlòng taq vsélshì sháì we ínø 30 -60 dvhø taqnø bvnlì tiqlòng taq chakwa zøm shì we svng té mvlúng ka yánglún shìe.

Bvnlì tiqlòng taqkèní dvgá tiqlòng svng vsérshìe wawe taq dang angpvn pvn vl we ínø tiqmaq taq wedø wáshì we tvrà taqni bvnlì lá mvlúnò we, bvnlì màdá í:am nø vlømrà vmang we vsvngrì gø yánglún shìe. Vháng mvnshì ráì we bat taq jat rúng bvnlì wàngrì taq vsvngrì tvle jatrì svng dvzvŕ ò nø lángshì ráì we rat vsvngrì taq bvnlì lálvm vko vkángrì tiqni mvdàm tiqni yúm mvnshì we gø yánglú shìe.

Tiqni nvng tiqni vlíng mvnshì ráìwe bat taq shvngkà tvyørì taqkèní gø pvnyàn yvngnø cvnshì ràwe íe. Téwa angdè nvng singwe bvnlì rì dangrì svng màdat dvtøp shìlvm vchyake we íe. Dèni bat taqnø vsvng zìdang tiqni mvdàm tiqni vháng mvnshì we írat bvnlì tiqmaq taq vjú mv vl we rì gø bøn mvnshì we svng yánglún shìe.

Vsvng tiqgøò lvpat taq bvnlì tiqlòng taq wa ang lvpat tøp wáshì lúnlvm nø yak we svng yánglún shìe. Pàwálvm wani bat zìdang svng cvnnø angpvn pvn vlíng vpo rawe írat bvnlì lángshì vdu we mø:í ni vsérshì vdu werì gvzà bøn we svng yánglún shìe. Wedø íratnø gø vrvm nø bvnlì tiqdang taq wa nøtløp shìwe dø mø:í nø dvgá bvnlì tiqlòng lòng svng gø cvnshì vdu we íe.

Pàwálvm wani kapvn bvnlì ínìgø tiq lvpat ngàngdøng we wawe mv vl rat dvgø shì ràwe dang svng shøn mvyø we íe. Yanila bat taqnø angdè kayángø èvl we shvrà kayáng màyáng kèní angdè nvng singwe paqzí rì tapshìnø cvnshì lúnwe bat svng vpo ráì we gø íe.

We dø íwe bat taq angdèò kùngà, shánøt zitnøt rìsvng dvshatshì lvm vchyak we íe. Vránø angdè nvngòn kùngà vl we rvtø taq bvnlì tiqlòng taq wa zømshì ngámshì we rvtø rìsvng shvleì we dø mø:í nø angdè bvnlì vtawe rvtø rìtaq dvgá dø bvnlì tiqlòngcè taq wáshì lúnwe gø shvla we dang tiqlòng íe. Kà shvbóng bvnlì narshì rvtø rì íwe rvtø angni rìtaq shvng gvmsùng lúnshì we katvm tvmø rìtaq dvzaq shìwe dø íwe laqyàrì gvl shàì we taqkèní gø angdèò lvpat svng tiqdang kèní tùbum lúnshì we íe.

Vsvng tiqgøò lvpat taq bvnlì tiqlòng taqwa tiqlvpat wáshì lvm wanø gø dvdam shì, sunshì màshvla lòng. Nà, ngà lvpat nø dèni dø wa mø:í we svng síng sháshì ràe. Tiqni rvtø taq angdè góng shiqshàn dang nvngòn yúm rawe dø íwe dangrì vl sháshì we ínø wedø bønra we rvtø rìtaq angdèí dèdamò dø bøn mvlúnwe rì gø vl sháshì we íe.

Wedø íra kat angdè taq yaklvm shìwvt rì tuqlòng we svng tvlú dvgø shì sháràwe svng shvdøm we íe. Wedø íratnø vdègóng shiqshàn dang svng gø mvdøng wáshì nø cvnlvm gvzà vchyak we íe. Bvnlì wangrì taq nøt shoklvm, nøt dat lvm dø íwe dangrì angkat kat vhømshì sháìe. We dø íwe rvtø taq dvgá rvmnvngrì nvng gø vtoq vtip shì weí nøt dvshat shìlvm gø vchyak we íe.

Bvnlìrì nvrshì rvtø rìtaq angdè kadvgvp gø mètuq dvrwe shvrà rìkaq svng zaqlè edi we ígø angdè taq yúmvm we kùngà rìsvng vwángā lúnwe ínø angdè taq vlwe rvtø rìsvng vjú vl dø lángshì lvm gvzàni vchyak we dang dvtit tvle svngkà yayáng naròe.