Dèniò làngrérì taqkèní nvpni mònggvn svng dvcø:pmì

Dèniò làngrérì taqkèní nvpni mònggvn svng dvcø:pmì

        
Shòlaqré lvpat wawe nø vsvng tiqgøò lvpvt tiqmvril ínø cvmré lvpat nvng shaqré wawe svrønwe lvpatò dvhø mvril svng shøn mvyø we íe.
        
Làbgré rìò lvpat svng èyàngvtnò dvgvp pàdang taqgø vdángwe mv vl, shò shòwa wálúnò we lvpat íe. Kùngà zøngnø shèrwe nøt mvsøn gvlshì weí shut shut vnvngcè vllúnwe mvril niíe. We mvrilrì nø paqzí zùngrì rungwe, àngpè àngmèò pùngpvng taq vlnø àngmaqò shvngøt dvtú we vdòng taq vlwe íe.
        
Àngpè àngmè ígø wedø làngré mvril svng shi mvhøqò dvgvp kèní mvdøng vchyak we jànglaqyàrì svng shvngøt dvtú òwe ínìnø we mvril svng tuqra dvgvp àngmaqò lvpatrì svng àngmaq wa vháng dø vrangshì lúnlvm wa íe.
        
Wedø íratnø cvmré lvpat taq kapàrì shvngøt dvtú ràwe ímá?
        
Àngmaqò nøt svng shvng shvngwa dvtánshì dvzvŕ ràe. Shèrwe nøt mvsøn vl lvm shvngøt vjønā ràe. Tuqrawe bvnchvtrì svng pvran lúnwe tvràrì svng dvtanā ràe. Kàshvbóng hí shvngnvm cømri àngnø àng dvcøp shìshá lvm, bèlaqkømrì dvcøpshì shálvm dø íwe zìdang kèní shvngøt vjønā ràwe íe. Àngmaqò nøt svng àngmaqwa shvng shvngwa kámshì lúnlvm dø nvngòn zíā ràe.
        
Kàshønwe dangrì taqgø shvng shvngwa shønsháwe,vyànøt mvvl lvm, nvng vsvngrì nvng vtoq vtip we dangrì svng gø shvngøt dvtúā ràwe íe.
        
Wedø íwe lvpatrì taqkèní telongwe tiqgø dvpat nø àngmaqò kùngàrì wedøni vháng lún lú:ngòe. Wedø zìdang vháng vlúnwe tiqgø taq kèní nø tiqdá vsvngrì ò lvpvtrì svng gø dvbangā lún lú:ngò we mvtaq àngmaq lvpvtrì svng gø shvla dø roqgvrshì lú:nò we íe.
        
Vsvng tiqgøò lvpat zìdang vháng lúnlvm dvpat nø lèga paqzí shálvm gvzà vchyak we íe. Lèga paqzí shavm kvt wa àng lvpat taq mvkrøm mvdøprì nvng vdu vbóng dø shvla dø láng lún lú:ngòe.
        
Àngò lvpat tvnù mangárì svng gø jórlún lú:ngòe. Làngré tiqgø wawe nø kùngnga zøngwe ínø àngò lvpat tvrà svng jòrdø dilún daqòe. Àngò bvnlì døngjárì svnggø vpø sháònø diqdá vsvngrì kaqgø shánøt zitnøt vwánā lún lú:ngòe.
        
Shòlaqrérì tiqmaq taq zùng lángshì we, vrù rapvng vm-aqwe rìgø yánglúnshìe.
        
Tiqmaqnø mvnvr nvr bvnlìrì dvzaqshì weí ya rvgaq dvpvt vjú zílú:nòe.
        
Shòlaqrérì wawe nø mèpvng lvpatrì dvpat ínø we tuqrawe mèpvng lvpatrì wawe gø àngmaqò wur taqni tuqrawe íe.
        
Wedø íratnø tuqrawe nvpniò lvpat svng shvnvp lvm dvpat nø dèniò cvmrérì nvng làngrérì svng shvlawe dang kèní dvgøā laqlúnì wang dvtit dvle shvngkà yayáng naròe.

Add new comment

4 + 0 =