Dèni bat làngrérìò nøt mvsøn shiqshàn tvrà

Dèni bat làngrérìò nøt mvsøn shiqshàn tvrà

Vháng mvnshì ráìwe dènila mònggvn dvjà taq làngrérìò nøt mvsøn shiqshàn tvrà taqgø shìwvtrì gvzàni vkønwe svng yánglún shìe. Chøm døngku vdøng, vsvngrì nvng vtoq vtip we tvrà, paqzí dang nvng bvnlìrì taq vdu vbóngwe dø mvlángshì we Social media ratnø gø íwe svng yánglún shìe.

Ínìnø vle vmì we banrì taq yadø nøt mvsøn kùngà vnøn we vsvngrì mvvl we ímá wanø røtlvm vllonge. Døngjøng taq vzàng kaq vle vmì we batrì mvdàm yanilaò vsvngrì taq nø téwa yadø shìwvtrì vkøn ráì we svng yánglún shìe.

Deni batò làngrérì taq nøt dammá lúnò vsvngrì tiqni mvdàm tiqni téwa luqmvnshì ráì wae. Weratnø dènila bat làngrérì taq yadø íwe nøt dammá svng vgámlún lvm kadø vl vdue walong svng dvtit tvle nvngòn zílvm íe.

1. Mawvnge wanø vtiqshì lúnwe nøt zánglún lvm dèzaqshì. Yadø vtiqshìe wawe nø wá nàléò we gø mø:íwe mvtaq cvndøng dvrárì svng vléshì we gø mø:í. Nøngmaq taq shvngømré shvngøt dvtú we vdòng, kámnøt tvràrì taq vsvng kaq shóngshì ràwe, vtiqshì mvdaqwe dangrì gvzà tálún, shálúnì we ratgø bønsháò we gø íe.

Àngdè taqkèní wámèlúnò we ínìgø tiqdá vsvngrìí yáng latamvm radø wanø àngdè góng, nøtrì svng zá dvzvŕ shì sháìe. weratnø àngdèí wáā mvlúnwe, dvbangā mvlún we, rvtø zí mvlún we bvnlìrì tubùmshì ràwe rvtø taq ínìnø welòng vtiqshì lvm wárà weíe. Wekvt àngdèò nøt dvshà lvm shìwvtrì shvzøm shaq ívme

2. Nà tiqgøò tiqni lvpat rvtø kadø shvleshì rìsvng mècøng:ò. Dènila nøngmaq làngrérì taq àngdè ò tiqni rvtø svng kadø vlevm we svng shìpvn wanø mvcøng shàì we dang vnønìe. We tiqni vdòng taq shvlawe bvnlìrì kadángte wálúnìe, mashvla we vrá dvtøp ràwe dangrì kadø vlwe rì svng mvcønshì nø dvtøp ràwe íe.

3. Àngdèò nøt svng nvrshì rvtø èzíò, tiqni tiqni lèga paqzí, pø gvmsùngrì, bvnlìrì taqwa nøt zángsháì we taqkèní àngdèò nøt mvsøn kùngàrì vnønwe bønsháshì we írat yúm vtang 1 lvbán vdòng tiqni cènø shømwacè nvrā vduwe íe.

Kadø nvrā vdue wawe taq àngdè shóngshì we rvmnvngrì, tiqchøm vsvngrì kaq rvtø zinø nøtshøm lvm tvrà svng tongshìwe, shagóng mvnshìnø gøncøp we, mvkún shøngnirì tashì we taq rvtø lushìwe mø:íni àngdè nøtlúmwe kàru bokrì røshìwe svng wáshì vduwe gø íe.

4. Àngdèí wá lún, dánglún bøò we shvlawe tvràrì svng vrá dvdamshì ràwe, nøngmaq taq nøtsgok, nøt mvgørwe vhøm shìra dvgvp vzàngkaq vhøm bøìwe 6aklvm tvràrì svng wa vrá dvdamshì sháìe. Yadø nøt yaklvm vhømshì ralong dvgvp shvlawe dang tiq dang dangcè taqkèní ní dvdamshìnø nøt dvshatshì rawe íe.

Àngdè nøt vdòng vkøn rawe mvgørnøt welòng svng àngdèò shvlawe tvràrì taqkèní jórlúnlvm dvpat dvzaqshì ràwe svng shvdøm nø nvngòn ziwe íe.

5. Social media svng rvtø vdu vbóngwe dø èzíshì, dènila bat mònggvn dvjànø tiqni mvdàm tiqni vháng mvnshì lúng:ìnø hp langwe vsvngrì wa íráì. Tiqgø nvng tiqgø nø nvmbøng tvrà taqkèní wa vtoqshì we bat svng vpo lúngì we íe. Werat chvpdap vzømwe tvràrì taq vnønwe svng gø yánglún shì ráì.

Wedø íwe taq làbgrèrì téwa nøt dammá vhøm:ò we vsvngrì gø luqmvnshìe wae. Social media wawe nø tiqdang kèní gvzàni zømdàbgnø mà-vlmvdaq tiqpvn ínìgø tiqdang kènínø màshvlawe nøt laqyàrì dvbung dvzvŕ we svnggø síngshá dvzvŕ we íe.

Àngdèò lvpat taq kadø íwe nøt laqyàrì nvng ècúnshì we nø mèpvng kaq kadø bøn longwe nvng chvpdap singwe íe. Màshvla dø nøt laqyà gvlshì we tiqgø dvpat nø wedøniàng lvpat taqgø màshvlawe svng vhøm lúngò we íratnø làngrérìò lvpat taq kadø íwe nøt laqyàrì svng vshøp shàì nø màshvla we nøtrì taqkèní nø vwángshì lúnlvm svng shvdøm nø nvngòn ziwe dvtit tvle svngkà yayáng naròe.