Dèni bat làngrérì nvng paqzí

Gvray ínø Gvrayí muqlàngrì nvng rvgaq pv́n yà:ngà mèpvng wa basharì svng pvn yàngà. We dø pvn we tvrà taq làngdøm pvn shì we bashàrì taq kèní rvgaq yachàng svng øpkáng lúnò we nø paqzí rat nø íwe íe. Paqzí wawe taq bashàrì taq wa vlwe mø:í nø ninàrì tiq maq taq gø vlwe svng yánglún shìe. Nìnarì taq gø paqzí téshawe go taq kèní paqzí cvmwe nìnàrì svng øpá:mò we dø tiq dvchá dèni la mòngàn taq èyàngvtnò dvgvp gø paqzí zìdang vháng á:mìwe móngdànrì taqkèní vháng manshìwe móngdànrì kaqsvng dang àngpvn pvn taqkèní øp á:mòwe svng yáng lúnshìe. Vsvng nø nìnàrì dø nvngòn kùngàrì mvlì, kashvbóng mvgwi dø nvngòn mvzaq, vgi dø kvláng mvlúnì, vyø dø nø vrám nø vzøm we taq wá mvlúnì. Wedø tiq dvchá màbóng we kùngàrì vlwe ínìgø øpkáng nø roqrimwe dang taq nø pazí taqkèní wa wálún shìwe íe. Vsvng nvng nìnàrì taq vsháynø màbóngwe taq vsvngrì taq nø síngnøt rál nøt vlnø tasvng shvngøt vjøn kèweí paqzírì tvtit tvle ke-e, chàng laqyà shvlawe màshvlawe svng síngshá shìe. Pazí walòng svng àng lvchøm èpønvtnò dvgvp shvla we nvng màshvla lòng svng síngrál we nyan go mølsi íe wanø shøn vdu longe. Dèni bat taq nø paqzí walòng svng vpø shvring nø lá vshøp dvzaq shì ràwe bat íráì nø làngrérì taq àngdè èjangnø mø:ínì nvngòn kùngà èvlwe dangrì taq vháng lún lvm dvzaqshì ràbøi. Tvnù mangárì gvlshìnø chvpdap wá dvzaq shìràe. Dèni bat làngrérì taq àngdèò mangá mvl we mø:íni shvman shìwe gvzà vle. We dø bøn we nø mòngàn byo lvm dang svng wa yelònø vlín we rìtaq téwa yáng lúnshìe. Dèni bat làngrérì mòngàn byo lvm dang taq vshò dø lìga paqzí lawe dang taqø gø wedø tiq dvchá shvrúng nøt kèní vshò we íni nø vdè móng vdè rvgaq nø zìdang vháng nø mòngzøl lvm wa ílonge. Lìga rønø paqzí la we tiqgø nvng mvla we tiqgøò dvhø taq síngrál nøt zìdang màbóngnø vsar longe. Tiq maq taq àngdèí èsháò we zìdang tiq lòng vdòng taq kèní gvzà ídøm shádøm shì nø dvtut cvnshì lvm mvwáshì we gø gvzà yánglún shìe. Nøt sun paqzí vdè Confucius shøn yàngì we taq vsvng nø shìni høq shaq á:m-aq ràwe dø tiq dvchá shìni høqshaq paqzí gø pvngyàn cvnshì ràe wae. Dèni bat nøngmaq dvcìrì taq pazí svng vpø shvring nø vshøp shìrà-á:mì. Lìga paqzí mvsha we tiq gønø zaqshøp shvlá roqgvr pè mø:í wawe kà vlwe íe. Mòngàn taq svté mvgàm tiqpè íwe Bill Gate nø àngcèrì kaq àngtaq lún bøà we pø gvmsùng zaqshøprì zílvm mø:í nø paqzí zaqshøp svng wa zí vdue wanø shøne. Wedø ni vdè Myanmar móng shvnvng gùr gùr taq vlwe vháng á:mì móngdànrì íwe Singapore, Hongkong, Japan Korea dø íwe móngdànrì taqøgø làngrérì lìga røwe taqkèní pazí lawe dang svng mvdøng nvngòn zíò we svng shálún shìe. Wedø írat nø dèniò làngrérì nvpniò ringwe shøl shú vgorì bøn lvm dvpat lìga røwe nø paqzí lá lvm svng shvlá vtang tùbumshì we dvzà tiqlòng íe wanø dvtit dvle we mòngkà yayáng naròe.