Dèni bat taq zìlàngrérì nø mvdøng vchyak we dang taq vlnø vpø ringwe svng dvtit tvle svngkà

Zìlàngrérì taq gvzà ringnø vchyak we bvnlì døngjárì zømò weí vsvng zìdang vháng lúnò we kùngàrì vle.

Wedø írat nøngmaq shvngbeí síngshá ràwe nø zìlàngré lvpat wawe nø gvzà vchyak we íe. Pàwálvm wani vsak vrvmwe rvtø taq nvngòn kùngàrì, síngrál nøt, rìtaq kèní angdè kámshì we bvnlì døngjárì svng jordò wálúnò we íe.

Làngrérì taq vzàngkaq vleá:mì vsvngrìò bvnlì døngjárì dvtut wá mvlún bøò we bvnlìrì angmaq vrá tiqkat tvleshìnø ríò weí vdèò móng lvmarì taqø gø dvzaqshì we íe.

Làngrérì nø pindvp nvng gø vbóng we íe. Pawá wani vdèmóng vdè rvgaq svng gø roqgvr shì lúnòe.

Vdè móng móng lvmarì nvng wulaq bvnlìrì taq gø làngrérì taq wa vlømshì ràlúngì. Welòng nø angmaq taq nvngòn kùngàrì jór nvngònrì vlwe rat wa íe.

Vsak tenø svrøng á:mì we vsvngrì kaq roqgvr nø dvbang tùbum shìe. Àngmaqò bvnlì døngjárì svng tvle vtoshìe.

Làngrérìò kùngàrì taqkèní tvnù mangárì jór lún shìe. Vdè móng vdè rvgaqò vcipwe zìdangrì taq kèní dvháng lúnò we kùngàrì angmaq taq vlwe íe.

Yadø vsak tevm we vzàng vsvngrì taq kèní tvlevtnò we bvnlì døngjá vko vkángrì svng làngrérì taq kèní svdiq døng dø wárà we ínø téwa shvla dø wá dvzaqshì ràwe gø íe.

Kàshvbóng bvnlì shvlshú tiqpè taq kèní angò dvzvŕ tiqgø svng angò bvnlì døngjá, vko vkángrì tvlevtnò dvgvp wegø nø angò kùngàrì nvng mvkrøm mvdøprì tiqni mvdàm tiqni téwa rvmshì we taq dvzaq shì lvm wa ílonge.

Làngrérì taq jo dø dvdamwe síng rál nøt vl ràe. Vdè góng vdègø svdiq vyá shìwe taqkèní àngdè taq vlwe nvngòn kùngàrìí tvnù mangárì lún høq dvzaqshì ràwe íe. Vsvngrì nvng vtoq vtip we tvtà taqø gø jàng laqyà shvlá washìnø vzømwe taq kèní angdèò tvnù mangárì jórlún shìwe íe.

Dèni bat làngrérì taq àngdè nvng angde shóngshì we dangrì taq rvsvngshì nø dvzaqshì ràwe íe. Wedø íwe taq àngmaqò vko vkángrì gø bángkà poqâ ràe.

Langré tiqgøò vko vkángrì nø cvmré lvpat taq kèní angmaq taq vzí shaq lún shaq írà we íe. Wedø ínø wa àngmaqò lvpat zìdang vháng lúnò we dang taq angmaq nøt taqkèní wálún lúngòe.

Wedø írat làngré wawe nø gvzà zømdàng we vsvngrì ílonge. Angmaq taq àngdè góng angdè zìdang vháng lvm dvzaqshì ràwe mvtaq tiqdá vsvngrì nvng vtoq vtip lvm dang taqø gø vlømvm vrvm dø dvzaq dvkángshì ràlonge. We dangrì taq síngrvl lúngò we kat wa angdè góng angdè kámshì rawe ínø vhømshì rawe bvnchvtrì gø vgám lún lúngòe.

Wedø írat làngrérì nø móngdàn vdòng móng lvmarì, vsvngrì nvng vtoq vtip we tvràrì nvng àngdèò tóng laqyàrì roqgvr shì lvm dang taq bvnlì døngjá zømshì ràlònge.

Wekat wa vdè dvcìrì vdòng taq vzømnø mòngzøl weí shìwvt àngpvn pvn vkøn ràwe rì taqkèní vgám lúnshì nø vdèmóng vdè rvgaqgø dang vrvm taq zídang vháng lún lvm waíe wawe tvtit tvle shìwe shvngkà yayáng naròe.