Døngkù wawe kà ang lvjøm svng deni la lvpvt nvng vdù vbóng dø dvshvng lvm íe.

Døngkù wawe kà ang lvjøm svng deni la lvpvt nvng vdù vbóng dø dvshvng lvm íe.

True meaning of family 12/ 7/ 2021

Døngkù wawe kà ang lvjøm svng dvtvn mvyøng we taq tiqmaq nø shvwì vbónge, tiqmaq nø toni keni dvci,angci angkangmaq nvng angri angrvp vdùri kaq svng Døngkù wànø ang lvjøm svng pønò we íe.

Tiqmaq ínø lá genes toni keni dvci vbóngwe nvng gø mvsing, shóngnøt mvdøng vzøm we taq kèní tiqgø nvng tiqgø dvzøm mvkoq dvbvng kènø vlwe taqwa si:ngè warì gø vle.

Vsvng vrvm vdèí dvdvmò dø vdèò Døngkù svng vdèí shò:ngò dø ang lvjøm lūshì shvlàe. Vkop vkang maq kèní vlrá shàwe àngpè angmè nvng angcø angcè rì høq góng nvng shvwì vbóngwe angrì angyàng maq

tiqdø vlwe shvngbe svng døngkù wànø lvjøm tø' shvlà we íe. Yàlòng nø angwà dø angrì angrvp vdùrì svng døngkù wawe ínìgø Jøngjøng rà vchvk we nvrøm dòng taq kèní dvciq lvpat cømsaq ngàngdøng we

Kámnøt tvra vl-lvm vchvkwe shóngnøt svng vná mvdaq. Ngà shvngømré bvnlì rí:ngò sórí mvring rì yángsvng vsél shøngnø bvnlì rìwe rvtø taq shvngømre vsvngrì nvng relationship vrám vrá we vle.

Tiqmaq rvmnvng rìnø kàdvgvp gø màvhøm bøshà we vsvng rì vle. Angmaq nvng angrì angyàng rì íshàe wanø mvsvt bøà pàgø mv-vlwe ínìgø angmaq nvng angrì angrvp mvdøng rìdø vràm vrá we, dvbvng kèwe,

kám vràm dø vl bøshà we íe. Wedø ínìnø shvngkà tà shìnøng rì svng ngà nøntdùng kèní røt mvyø'ngè? gø' vràm taq vdèí nøtnò dvdvmò we dang vle. Vdèò døngkù tiqrvp vsvng, angrì angyàng rì mví we vsvng rìkaq

nø kadø dvdvm lvm íèmá? Vdè nvng tiqdø dvshà nø yakwe rvtø, nøt mvgám zang we rvtø rìtaq gø nøtshèr weí vdè svng vrám vrá we íe. Ràrì svng dvbv:ngì. Nøt shvlà zang nø vdè svng dvbvng we yarì nø angrì angyàng

rì mví nigø vdè lvpvt svng dvdvmãrì svng døngkù vsvng wanø shøn shvlà má? Vsvng vràm nø kà døngkù, kà angrì angyàng rvp yvng shøq lúnlvm rvsvng mvlún shìwe íe.

Wedø ni vdè shøqò nø vlwe shvrà taq télong shàwe vsvngì íshàe. Ya rvtø taq angrì angyàng rvp màbóng we døngkù rì mvdvm lvpvt zìdang røngwe døngkù svng yvnglún shìbøì we íe. Angpè angmè maq mv-vl ámì

rvt Angcì angkàng maqí dvkvmò we Same Sex Couple rìí dvgá Cvmré rìsvng zaqshøp vpvt dvzvr lvm dvkømò we Angpè lvp/angmè lvp kèní vbá daq ìwe døngkù rì gvza køm nø vle. Wervtnø kãdø yakwe byòwe mvbyò

we ínìgø døngkù tiqrvp wanø vlwe íe. Wedø døngkù tiqrvp dvpvt dvzaq shìwe svng jòè mvjò wanø shøn shvlà má dvdvm lvm vle. Akvtdø 21 yamvzuq taq types of family ang pvn pvn vle.døngkù wawe zúng tiqkøm

lvmpvng taq dvzaq shìnø vlwe íe. Wervtnø angnø vdè svng shùng rvt vdèò lvpvt taq tuq ráìwe írvt vdènø kadø ínìgø mvrà we íe.

Kàdø ínìgø bøn daqwe shvngbe svng vtò shaq íe. Vdèò mvrshvm svng yvng mvyø' rvt pàgø wálúnòe. Wáa mvyø' we yarìnø dènì lvpvt zìdang taq vlwe vsvng vràmò lvpvt taq angrì angyàng tiqrvp vsvng màdū we

ínøgø vdè yvng svng shùng rvt tuqráì nø døngkù tiqlòng svng shvzøng shì lúnòe. Nøngmaq vsvng vràm nø dvgá vsvng tiqgøí dvbvng we shù:ngì we íshàe. Wervtnø døngkù wawe zòng lvmpvng taq lvjøm vlwe

døngkù lvpvt rìsvng shvzøng shàì. Shvngbèkaqsvng oqã.

Kàtvlíng Paul Hpu Ye Dwe RVA Rawang Rúng, Putao.