Døngkū Mòngzøl lvm Mvpáng nø Kámnøt tvra dang íe.

Døngkū Mòngzøl lvm Mvpáng nø Kámnøt tvra dang íe.

Shóngshøng we pèmè vnvm vchvng maq dènì dvtit dvlè lvm nø nøngmaqò døngkù taq mvdøng vchvk we nø kámnøt tvra dang íe. Dvcìcèrì

vháng we loqlvm dvpvt dvzaq shì rawe taq, døngkù tiqrvp vsvng nvng vsvng mvn pòng mvdò taq mvdøng vchvk we Paqzí dvhàng lvm shvrà

shvlá nø chøm døngkù íe. We døngkù nø shvlà we nvng nønttøng nø laqyà shvlá dvtvn lúnò we døngkù íe, tiqrvp vsvng køp svng kámnønt

vlwe chøm wanø shønlún shìwe íe.

We chøm rvpò shvla we dvgùng íwe poyt degrees svng màvmvng mvgvyaq shìlvm dvpvt nø, døngkù angpèní angmè nà:nì kámnøt tvrà dang

svng cvndøng weí, angcø angcè rìsvng tvrà shøràe, chøm vsvngrì mvgvm mvshvla we tvra taq màvmvn lvm shvnshvr pvlàcè tvra dang taq

dvzaq dvkáng shì rawe íe. Angcø angcè rìsvng kámnøt pàlàcè dang taq saqcvm nø màvsvr lvm tvra shør ràe, nøntcvm we mv-vl lvm vjúrøt

sórí shvngøt dvtúò nø tvra shøllvm nø dvgá vchvk we bvnlì rì washàlvm shngøt we mvtaq, té vchvk we íe.

Bvnlì dvtú shìwe dang taqgø nønggøp nvng íwa, ewa nøng wa dvzvr mvdaq, tiqdø vjúrøt we tiqdø nøqngøm zùng diwe, dvgá shvngømré vdùng

kèní wàòwe bóy rìtaq shøllún lvm wáràe, wedø dvgá shvngømré bóy rìyvng dílúnò wenø, gvza shvlàe. Wedø cvmrérìí nvmlvt taq cvnlvm yatwe

ínìgø, pèmèrì nøngmaq nønt yvng weí zvng dvtut shóngnøt taq kèní tvra shøl ràe. Kámnøt tvrà dang nø døngkù vrvm nvng sing we pàqzí dang

tiqpvn íwe svng shá ràe. Kámnøt tvra dang dvzaq shìwe døngkù tiqchøm taq, Gvrày Gvsvngò shvmvn jèjú gvza loqwe íe.

Chøm bvnlìrì svng tøptøp wa dvzaq shìwe írvt Gvrày Gvsvng ínø, we døngkù svng jøngjø'ng shvlà we rvsángcèrì ídvzvr lùng nø, angcø' angcè

rìsvng gø Gvrày Gvsvngò jèjú nvng dvkøm dvzøm lúnlvm ílù:ngì. Kámnøt tvra dang nø vsng mvn pòng mvdò svng tvrà shøl lúnò we gálòng lvtnak

gvbà tiqpvn íe, we rvtnø nøngmaq døngkù vsng rì shvngbè gø we Kámnøt tvrà dang nvng wà nøtkøm nø tiqdø vzøm lún lò:ngè. Pèmè níí, lúnò we

sháò we Kámnøt tvra dang ràwe pàqzí rìsvng cvmré rìkaq zvng dvtut shvngøt lvm lvgún mvdaq. Angmaqò lvpvt taq døngmvn we, nønttøp nø

shvdiq døng we, laqyà shvla nvng vlshà lvm nø kámnønt tvra pàqzí rìsvng lúnshì bøkè wa bøn daq we íe. We Kámnøt nvng singwe dvrá rìnø

døngkù vdùng taq kèní shálà we paqzí tiqpvn íwe dvdvm sháò høq shvngøt ràe.

Chøm døngkù vsvng rì bvnlì kadvng tè màtă we ínìgø, kámnønt ngøngdøng lvm vl ràe. Kà shvdún - Shvngømré vdùng taq cvndøng ràwe kámnøt

dvrá rìsvng vpø' shàwe, nøqngøm zùng diwe, vjúrøt rìpòng rìsng dìwe, zìlvngré rìpòng svng diwe, Kámnøt tvrà nvng singwe bóy rì nvng Shvngømré

bvnlì rìtaq kámnøt kèní dvzaq shìlúnlvm vchvk we íe. Pèmè rì nøngmaqí cvmrérì svng shvngøt wedø tiq dvchá chvpdvp wá dvtvn lvm vchvk we íe.

Chøm døngkù vdùng taq Gvrày Gvsvng kaqsvng mvdøng wá shìnø kámlvm dvzaq shì ràe. Lvbán Misa nvng nøqngøm zùng diwe, nøtlùm vlū záng

shá ràe, Gvrày bvnlì wáshú rìsvng dvbvng sháràe wa pèmè maqí chvpdvp wáò nø shvngøt dvtvn ràe.

Nivrvm súnshì lúnlvm dvpvt bvnlì dvzaq shìràwe dè:ngè, ínìgø dvshaqí bóng nø Gvrày Gvsvng kaq vjúrøt sórí cømsaq mòngzøl weí bvnlì wvng taq

díràe. Zá yvng vhøm shì dvgvp cì lvjángshì vmdá:ngí wa bvn lù:ngì de:ngì, wedø ínìgø shvrúngshú Jòrì, Svràrì svng goò nø vjúrøt weí cìlvjáng

shìwe nø kámnønt tvra dang taq nønttøp nønttøng we nvng cvndøng we íe. Vrá nøngmaqò lvpvt taq mvzøng shìlvm tiqdang nø Rvsvngcèrì

nøntbyò we lúnlvm nø, nøt mvngshèr we, nøt cipshì we, vsvng kaq dvsházã sháò we rìnø pvlàcè, Kámnøt tvra dang cvnshì shálvm dvzaq shìrìnø

vháng lvm vlnø, døngmvn we svng cvnrì nø èshøt ègvn lúnlvm íe wang dvtit dvlè kà íe.