Døngmvn dø lvpat cúnshì we Vdè ò lvpat tvrà svng døngmvn dø cúnshìe wawe nø vwadø vhú vhwaq lvpat cúnshì we dø mǿí nø vdè ò nøt mvsø̀n kaq svng vtøp dvzv́r we zàng kèní lutshì lúnwe tvrà ni íe. Vdè ò lvpat tvrà svng tiqdá vsvngrì nvng shvbóng shvnvpshì w

Døngmvn dø lvpat cúnshì we
Vdè ò lvpat tvrà svng døngmvn dø cúnshìe wawe nø vwadø vhú vhwaq lvpat cúnshì we dø mǿí nø vdè ò nøt mvsø̀n kaq svng vtøp dvzv́r we zàng kèní lutshì lúnwe tvrà ni íe. Vdè ò lvpat tvrà svng tiqdá vsvngrì nvng shvbóng shvnvpshì we dø mǿí nø vdèò lvpat tvrà svng døngmvn yuqyà dø cúnshì we tvrà íe. Vdèò lvpat tvrà taq mòngzøl lòng svng vtoshì lúnlv́m dvpat nø shvla we nøt mvsø̀n kèní v́lshá lv́m nø vchvk mvdø̀ng ílonge. 
Ínìgø vdèò lvpat tvrà svng døngmvn dø ecúnshì we tvrà nø téwa nøt shǿm dvzv́r lúne wanø gùndvtøp we rìtaq vtànò we svng yv́nglún shìwe gø íe. Vdèò lvpat tvrà svng døngmvn yuqyà dø cúnshì lúnlv́m dvpat kadø íwe tvrà rì svng síngshá ràlonge má? 1. Vsvng kaya svng nøt shø̀m lòng lún dvzv́r lv́m mèdèzaq shìni. Wedø vsvng kaya svng nøt shø̀m lòng zílún lv́m dvzaqshì we vsv̀ngrì vl longe. Àngmaq nø àngmaq nvng vzø̀mwe rv̀mnvng rv̀mchvngrì í mvwámshì lv́mlòng svng svre nø àngmaq la shóngwám shì radø v́l dvzaqshì we gø íe. Welòng nø lv̀ngdø̀m taq vdèò lvpat tvrà gø vmvn sháò we íe. 
Vsvng wawe nø tiqgǿ nvng tiqgǿ nø màbóngwe shìwvt rì wedøni vl longe. Vdèí ewá lúnò we bv̀nlì ri vl longwe dø wá mèlúnò we bv̀nlì rì gø wedø ni vl longe. Wedangrì svng vle lúnlv́m dvpat vdèò vpǿshì, shvringshì we dangrì v́lrà longe. Vdè góng vdè shóngshì rà longe vdèò jàng laqyà rì svng vtøp dvzv́r we dangrì svng yilshì rà longwe gø íe. Wedø íwe bv̀nlì rì svng gø vtiq lúnlv́m dvzaq dvkángshì ràwe gø íe. Vdè nø kadø íwe vsvng tiqgǿ íwe nvng vdèò laqyàrì nø kadø íwe tvrà rì svng gø vtán lún rà longe. 
Weratnø̀ vdèò lvpat taq vpǿ shvringshì vdu we dangrì svng shvlá wa gv́lshì lv́m gø vchvk we íe. 2. Vsv̀ngrì í vdè kaqsvng kadø yvngra we dangrì svng nøt taq mègv̀l ni. Vsvngrì taqkèní vdè svng kadø èyvng rawe dang svng dòngnøt taq egv̀lò we dángte nø àngmaqò vshuq ni èí longe wawe ka ga vl we íe. Vdè kaq svng yáng wángshì rawe vsvng vl longwe dø vdè kaq svng yáng mvtàmvm rawe vsvngrì gø wedøni vl longe. Werat nø wedang nø vsvngrì nvng wa singvme. Vdèò dòngnøt taq gv́l mvrà we svng gø shvdǿm we íe. Wedang rì svng nøt taq egv̀l lúngò we taq tiqkvt kvt nøt vsor rawe rì bǿn dvzv́r sháò wegø íe. 
Vsv̀ngrì taqkèní vdè kaqsvng kadø èyvng we ínìgø vdègóng vdè lvpat svng vpǿ dø gv́lshì lv́m nø vchvk mvdøng tiqlòng ni íe. Weratnø vdèò chvpdvt lvpat tvrà svng ma shì wedø mǿí nø døngmvn dø shvng shvng wa v́l sháshì lv́m svng shvdǿm we íe.