Dang vrvm taq vdu vbóng dø wáshì ràwe

Dang vrvm taq vdu vbóng dø wáshì ràwe

Kapà taq ínìgø chávle wáshì wenø màshvla wawe shaqré kà vlwe dø tiqdvchá vsvng tiqgø taq dang vrvm taq vdu vbóng dø wáshì nø zitnøt vdòng taqkèní cúnshì ràwe íe. Vsvng tiqmaq taq shánøt, zitnøt taqkèní mvwá shì we taq dvshà mvhøt lvm vhømò we dø tiqmaq taq vdu vbóng dø cúnshì lúnò we vsvngrì gø vle.

Kàshvbóng pø zaqshøprì lawe, vnvp lvm dang taq nøt løpshìwe, vrùrapvn vm-aqwe rìnø vsvng tiqgøò nøt svng mà shvladø vlíng vpo dvzvŕ we íe. Vránø vdèò døngku vdòng taqø vm-aq lvm dangrì pvranlvm chøm cúnwángrì lúnlvm dvpat bvnlì wá dvzaqshì we taqgø shèrwe nøt mvsøn kèní wálún lvm vchyak we íe.

Vsvng tiqmaq taq mvshèrwe nøt mvpnøt rìtaq màdvrádø pølavm we ínø vsvng tiqgøò dvgùng vmvng we, lvpat cømwe rìgø gvzà yánglún shìwe íe. Wewa mvtaq vrùrapvn rìtaq chávle vm-aqwe gø shágóng svng pàvjú mvzi we mvtaq shagóng shiqshàn lvm dang taq vnøn dvzvŕ we ínø dvtut shìwvtrì àngpvn pvn dvbung lúng:ò weí làngdøm taq lvpatrì cøm dvzvŕ we høqshaq bøn dvzvŕ we íe.

Yadangrì nø vsvng kaq vjú mvziwe svng síngsháì we ínìgø shvnvngshì nø wedø laqyà rì taqwa lvpat rì dvcømshì we vsvngrì gø nøngmaq shvnvng gùr gùr taq gvzà ni yánglún shìe. Màshvla we íe wanø síngsháshì we nvng nvng nøt vwángshì lvm svng mvwáshì nø lvpatrì cømvm we làngrérì gvzàni luqmvnshì ráì.

Dèni bat svmaré rìtaqgø batzìdang taq cvnnø àngdè tiqgóng shvnvpshìlvm taqwa nøt vyuqwe gø gvzà yánglún shìe. Àngdèò tónglaqyà gónggwárì nvng vdu vbóng we màbóngwe svng mvyàngònø chá vle dvcøpshì nø àngdèò dvcì laqyàrì shvmangshì we vsvngrì gø gvzà vl ráì. Vsvng tiqgøò dòngnøt mvsøn taq kèní àngò mvr vnvpwe mànvp we svnggø vtán lúnòe.

Kadø íewani kadvgvp gø shèr we nøt mvsøn vl we tiqgø taq bang mvnøcè íwe mvrshøm vtánlúnò we ínìgø nøt mvshèrwe, nøt mvgør nøt vlwe tiqgø taq kadøgø mòngzōl nø vnvp we mvrshøm vtán lúnlvm mv-vl long. Wedø íratnø zìlàngré vnvmchvngrì svng shvdøm mvyø we taq kapvn taq ínìgø vdu vbóng dø wáshìwe mø:ínø chá vle wáshìwe ínìnø màshvla we lvp svng vpo dvzvŕ we íe.

svng tiqgøò lvpat nø àngdongcè wa íwe ratnø vtoshì lúnbøshà we lvpat taq shvla dø, dvgùng vldø cúnshì lúnlvm dvpat shvdøm we íe. Kadø íwe bvnlì rìtaq dvzømshì vdu we ínìgø vzàng nøt tøng shaqré rìò shvngøt dvtú we layà, kàrì taq zømshàì nø àngdèò lvpat svng vpø ring dø cúnshì laqlúnì wang dvtit dvle shvngkà yayáng naròe.

Add new comment

1 + 7 =