Dvsháza shóngnøt

Dvsháza shóngnøt
      
Dvsháza nøt nvng shóngnø wawe nø vsháy we íe. Ínì gø welòngní taq vbóng we tvrà vle. Shóngnø wawe taq shvrwe nøt mvsøn nvng lún mvyø we mvpnøtrì màbá we íe. Døngmvn we dvsháza nøt wawe nø àngdè taqkèní zíshì bøwe rì vrá tiqkvt lún mvyø we nøt mvvl lòng íe. Weratnø vnvmchvngrì døngmvn we dvsháza nøt gvlshì we nø vní lvp svng mòngzøl nø dvbu dvzvŕ we íe.
                      
Paqzí vdè rì shønwe kà taq lvpat wawe nø vm-aq gónggwárì mvvl nø àngpè, àngmè maq mvvl lvmwe ínìgø cúnshì lú:ne. Dvsháza nøt wawe mvvl lvm kvt mvng nø lvpat cúnshì màshvla long wae. 

Kaløm løm we kamà rìí gø we àngò kàløm rì svng shóngnøt í bø:mò nø kacèrì gór lún lú:ngòe. Tiqdang kèní èshòn nonìnø dvsháza shóngnøt í we àngløm svng bø:mò we mvvl long kvt we àngløm rì shvngbe nø tìn nø gvyaqshì lvm wa ílonge.

Wedø ni nøngmaq vsvngrì taqgø dvsháza shóngnøt wawe nø àngmè yvngkèní tuqrawe ínø kù:ngà walòng nø àngpè taqkèní tuqlong we íe. Weratnø àngpè àngmè wawe mvvl bø kvtnø vsvngrì dvhø taq vdu vbóng dø cúnshì lúnlvm yakwe gø íe.
       
Shóngshøng we vnvmchvngrì shvlaq màbáwe kvn tiqgùm nø gamwe nvmjøm mvvl vmwe dø shóngnø í mvluq mvpøn kéò we vsvng tiq lvpat gø kadøgø vnvp dø cúnshì lúnlvm mvbøn daq longwe íe. Shóngnøt wawe nø àngdè tiqgóng ídøm shì we nøt, mvnúr nøt nvng mvgør nøtrì mvvl nø shèrwe nøt mvsøn ni íe.

Tiqdá vsvngrì kaq dvsháza we, tubùm dvbangā we, cipshì we nøt nvng vsvngrì ò vjú dvpat shóngnøt í dvzømshì we nøt íe.
         
Mònggvn vsvngrì tiqmaq taq wedø shóngnø mvzángshì vsvngrì gø gvzà vl we svng yánglún shìe. Yanila mònggvn dvjà svng èyà:ngvtnò dvgvp gø tiqgø nvng tiqgø, tiq mvdò nvng tiq mvdò, tiq móng nvng tiqmóng rì tasvng vzi vrùng wanø mvjàn dvbu:ngòe. Wedø íwe tvrà rì svng kadø pvran pvjáng lvm dvdamshì vdu vmì.

Mònggvn mvshøl taq bønshvng we India móngdàn svng shóngnøt í vlíng vpo dvzvŕ yà:ngà pè Mvhaqdvmaq Ghandi nø àng tiqgø kadángte dvgùng vl vsvng tiqgø íwe ínìgø vsvngrì shvngbe nvng shvrvm shvrá shìnø vl dvzaq shì we svng yánglún shìe. Zaqlè diwe tvrà rì taqgø dvshà vsvngrì nvng tiqdø, tiq zìdang ku modo cycle rì zúnshì we svng mvshøl rì taq yáng lúnshìe. 

Àngnø móng vsvngrì vzøm vzvp we tvrà kèní we nóng vháng vlún lvm tvrà taq wa nøt løpshì nø dvsháza shóngnøt í shìni høq dvzaq dvkángshì yà:ngì we móngdàn shølshú tiqgø íwe svng mònggvn vsvngrì shvngbe taq bøn shvng ráì we íe.

Wedø àngò laqyà, nøt mvsøn shvlá rìdø mònggvn vsvngrì tiqgø vrvm gø cvn dvtøp lúnì we ínìnø mònggvn rvgaq yachàng nø cømsaq mòngzøl lvm wa ílonge.
        
Vsvngrì tiqgø nvng tiqgø nø nøt mvsøn, laqyàrì màbóngww ínìgø, wedø shvla we nøt laqyà tvrà rì cvnlún lvm shvngbe nø dvzaqshì vdu we svng shøn mvyø we íe.

Dvsháza shóngnøt wawe nø cvm vtangwe tiqdang íwe høq shaq welòng taqkèní mònggvn svng vlíng vpo dvzvŕ lúwe tvrà mvshøl rì taqkèní cvnshì shvla we íe. We tvrà nø mònggvn taq pàí gø shvdún mvlúnshì we vpø vtang we zaqshøp tiq tvrà wanø gø shøn lún shìe.

Weratnø kagø nø kadø màshvla we tvrà taq rip we ínìgø àng vdè tiqgø taqkèní nø we shóngnøt tvrà svng cvn lún lvm dvzaqshì ràwe íe. Dvsháza shóngnøt wawe tvrà taqkèní kadø íwe mvhøt lvm shìwvtrì shvngbe svng dánglún, jórlún wegø íe.

Weratnø nøngmaq shvngbe nø dvsháza shóngnøt wawe tvrà svng cvn dvgøm lú:nì nø mòngzøl we lvpat tvrà svng vrang lúnlvm dvpat mòngkà yalòng taqkèní dvtit tvle we íe.