Gvray àngwur taq nøngmaqò tiqlvpat svng gv́l shàì

Gvray àngwur taq nøngmaqò tiqlvpat svng gv́l shàì.

Vsvng tiqmaq taq vdè kratcǿm rawe rvtø̀ tiqdá vsvngrì kèní vzel shì longe. Vdè taq jór nònggwòrì vtoshì lú we rvtø̀ rìtaq vdè shvnvng svng tuq ranø̀ vdè kùngà vnǿn we rvtø̀ rìtaq shvnip shvnvr mvyǿ long we íe. Vdè mvdàm dvtàng svng tuq rawe kvt lv̀mpvng kèní rønnø̀ dvjá mvyǿ we vsvngrì gvzà vl sháò we gø íe. Jø̀ng jǿng taq vdèò lvpat tvràrì vcip we vhángwe dangrì shvngbe svng vpǿ shvringā we nø Gvray àng tiqgǿ wani ílonge. Weratnø̀ tvrà vrv̀m taq Gvray àng shvnvng svng tvpníshì lv́m nø vchvk mvdø̀ng íwe svng síngshá shìlv́m shvdǿm wegø íe.

We dang taq vdèò lvpat tvrà nø ngø̀r we rvtø̀ mvhøt lv́m dø íwe rvtø̀rì vl longwe ínø̀ rvtø̀ vrv̀m taq vdèò nøt mvsø̀n kùngàrì dvzaqshì lún lv́m gø gvzàni vchvk we íe. Vdèò lvpat tvrà taq nøt mvsø̀n zá vtøp lv́mdø íwe dangrì shvngbe kaq svng gø Gvray àngò shòngnøt kùlwàng vdòng taq gv́lshì lv́m dvzaq shàì. Dø lòng vmvngvm we mèpvng taq gálòng tuqrawe dø ni vdèò lvpat tvrà taqgø mvhøt lv́m dangrì vle lúnbǿò we mèpvng taq jór nonggwòn wawe kùngà svng vtoshì lúnwe wa ílòng svng síngshá dvzv́r mvyǿ wegø íe.

 Kadvgvp gø vlíng vpo we mv-vl Gvray ang shóngnøt rì vrá yv̀ngì dvgvp nøngmaq ò shóngnøt rì nø vtì gùm taq zangwe vtì nvng vbóng longe. Tiqlang rvtø̀ taqnø løm longnø̀ naqrawe kvt kwitvm we íe. Ínìgø Gvray àngò shóngnøt mv̀ngnø kadvgp gø ngø̀rngun we íe. Nøngmaq vsvngrì ò shóngnøt wawe vdòng taqnø rvwìngwe nøt mvsø̀n rì vbáe. Vsv̀ngrì ò shóngnøt wawe nø mvdàm rvm svng wa yv́ngshì nø gv́lshì we ílonge Gvray àngò shóngnøt mv̀ngnø dòngnøt mvsø̀n svng yv̀ng we íe.

Vsv̀ngrì ò shóngnøt walòng nø kadvgvp gø vlíng vpo we shóngnøt íe. Ínìgø Gvray àngò shóngnøt mv̀ngnø kadvgvp ínìgø vlíng vpo we mv-vl pv̀nyv̀n ni zø̀ngwe shóngnøt íe. Vránø vsv̀ngrì taq vdè kaqsvng kà svdiq rì mvdøngwe vsv̀ngrì kaqnø nøt zawe bǿn sháìe. We shóngnøt rì nø tiqgǿ nvng tiqgǿ mvwám shìwe tvràrì bǿn shálúngòe. Ínìgø Gvray àng shóngnøt nø àngkaq svng vléshì bǿwe mvràrì høqshaq àngò shvwií dvshèr nø chutcháng we høqshaqni àng shóngshìe.

Gvray àngò shóngnøt kèní vdèò chø̀m dø̀ngku vdòng taq, rv̀mnvng rv̀mchvngrì dvhø̀ taq vzø̀m vzvp lúnwe ínìnø we shóngnøtrì nø kadvgvp gø ngø̀r ngunwe tvrà svng tóngā lúnlv́m wa ílonge. Weratnø̀ làngré lvpat taq kapà bv̀nlì dangrì taq ínìgø Gvray àng vdòng taq zǿmshì nø èwàò we ínìnø mòngzøl we lvpat tvrà svng vtoshì lúnlv́m wa ílonge.

Nøngmaq bashàrì nø vdèò dòngnøt mvsø̀n rì svng mashì sháì we ínø̀ wedø íwe tvràrì naq long dvgvp we tvrà taq v́l nv̀mvmwe gø bǿn dvzv́r sháò we íe. Weratnø vdèò lvpat tvrà svng Gvray àng shóngwám shìwe tvrà kèní cv̀nnø dí lún we ínìnø jø̀ng jǿngni jór nònggwòn rì svng vtoshì lúnlv́m ílongwe svng shvdǿm nø nònggwòn ziwe íe.