Jòrlvm dangrì nø kàgøò wur taq íemá?

Jòrlvm dangrì nø kàgøò wur taq íemá? Bøngté lvm dvpat gø kagøò wultaq íe má? Vdá mvgàm lvm gø kagø wur taq íe má? Wawe dang svng làngrérì taq dvdam shàì. Nøngmaq mvlúngka taq angdèò gàm svngwa kà vgo wásháì we svng yánglún shìe. Nøngmaq dvhø taq angnø gàm shvla rat nø íe wanø tvnung ké sháì we íe.

Jøng jøng taq nø gvm shvlae wawe taq angdè dvzaq dvkángshì we nvng vko vkángrì vhøm lòng weò angshí angwvt íe. Gam wawe nø bvnli taq cvn we íe. Gvm shvlá mèyø we ínìnø bvnlì wá dvzaq shì ràe. Yani la ban taq angdèí síngrál dèdam lúnòwe taqkèní bvnlì èwá lúnò wenø shvla nø nøt shøm vdu we íe wanø nvngòn ziwe íe.

Chvpdap lvpat taq gvm shvlá lúnlvm dvpat nø angdèò bvnlì døngjárì taq dvzaq dvkángshì lvm rà vchyak we svng shvdøm we íe. Wedø ínøwa tiqni ni jaq vjøngni gvm shvlae walòng svng vto shì lúnlvm ílonge. Yadø dèzaq shì nvng nvng nàí dèdamò we gvm shvla we mø:íni jòrwe svng mèlúnò we ínì welòngnø rvtø shi màrvm we íwe svng síngshá ràe.

Wedø íwe rvtø taq àngdèò rvtø shi mvtuq rawe íe wanö nøt dvzaq shì lúnlvm vchyake, nøng maq shvnvng gùr gùr taq jòr nø svté mvgàm we vsvngrì gvzà yánglún shìe. Ínìgø angmaq mèpvng lvp kadø dvzaq dvkángshì nø yadø jòr ráì we svng yáng mvlúnì. Nøngmaqí síngsháràwe nø wedø jòrnø zìdang vháng lún we vsvng tiqgø bønlvm dvpat nø rvtø angdong taq kèní lúnshì we mø:í.

Rvtø angdong taqkèní lúnshì lòngnø rvtø angdong taqøni vmvngvm we bønshá shì we íe. Lvpat tiqlòng taq dvgùng vl e walòng nø ang wa wa tuq rawe mø:í walòng svng yánglún shìe. Vdá mvgàmré rìtaqø gø angpè angmè maqò pøzaq shøprì kèní vdá mvgàmwe vsvngrì mvdàm angdè hí mvdàm angdè ripnø jórlúnwe vsvngrì téwa luqwe svng yánglún shìe. Kudø yadø íratnø wawe vzing shàì weí rvtø màdvbé lvm vchyak we íe.

Kadø íwe bvnlìrì bvnchvtrì vkønwe ínì gø angdèò nvngòn kùngà taqkèní dvzaqshì nø lutshì lúnlvm tvrà svng lá dvzaq shì ràlonge. Tìkwè taq chvtnø vdángkéò we nvngwà lìng svng vsvng rvmnvngrì goshìnø tøl shvlae ínì gø angdè nøt mvsøn taq vdángkè we bvnchvt wàng taqkèní nø angdè wa chutcháng shì ràwe íe.

Jòr nø zìdang vhánglún lvm, vdá mvgàm lvm dvpat rvtø angcé nøng wawe nø gvzàni luqpøn we rvtø íe. Angdè nvng lvpat vsvk vbóngwe, paqzí zùng rungwe taq vbóng we mvrilrì dvhø èyàngvtnò dvgvpø gø tiqgø nvng tiqøò lvpat zìdangrì tiqni mvdàm tiqni màbóng rawe svng yánglún shìe. Tiqmaq taq vdá mvgàm rae, tiqmaq taq paqzí zìdangrì vháng mvnshìvme, tiqmaq taq ínì nø mvhøtlvm angovn pvn taq dvshà we lvpat vdòng vl vdu we svng yánglún shìe.

Yalòngnø lvpat tvnù mangárì taq dvzaqshì we nvng màdvzaq shì we taqkèní vsháyvm we wa íe. Dèni høqshaq nøngmaq lvpat rìsvng vlíng vposhàì we mv vl, todø wa vlìwe, kani ka rvtø taq zìdang vháng lúnlvm wawe tvnù mangárì mv gvl shàì we dø mø:í nø tvnù manggárì gvl shàì nø kani karvtø taq vdá mvgàm nø zìdang vháng ràe wawe tvnù manggá chyak wa gvl shàì nø dvzaq shàì we ínìnø tiqni rvtø taq vháng á:mì móngdàn rìdø angmaqò zìdang svng jór lúnlvm wa ílonge.

Wedø írat nø jòr nø zìdang vháng lvm nø kagøò wur taq íe má wawe kà vgo svng èyàngvtnò dvgvp welòng svng jórlún lvm nø nà, ngà shangbeò wur taq wa vl we ínø gø vrvm nø jòr nø, vdá mvgàm, zìdang vhánglvm dvpat dvzaq shàì wanø nvngòn ziwe dvtit dvle shvngkà yayáng naròe.