Jòrlvm Onglvm dang svng

Jòrlvm Onglvm dang svng

Vsvng tiqgø taq jòrlvm Onglvm dang svng vtoshì lúnlvm dvpat nø cøm vnønwe tvràrì luq luq svng vle dáng:í wa lúnshì longe. We jòrlvm dang svng diwe tvrà taq yaklvm, cøm vnønwe tvràrì svng màtoshìwe, we lòng svng vto mvkamshì wenø kadøgø bøn mvdaq long.

Vsvng tiqgø wawe nø cvmré lvpat taq kèní lvpat tvrà taq vléshì lvm tvràrì svng kadø yelshì lúnwe møí, shvla dø lvpat svng kadø cúnshì lún ràe wanø àngpè, àngmè, shvngøtshú svrarìí shvngøt dvtú we ínìgø jøng jøngni lvpat tvrà, bvnlìrì taq rip vdu rawe kvt we bvnchvtrì, shìwvtrìnø wedøni tuqlonge. 

Vsvngrì tiqgø vrvm nø àngdèò lvpat tvnù mànggá rì jórlún lvm dvpat dvzaq dvkángshì we vsvngrì wa íshàe. Wedø dvzaqshì ràwe tvrà taq vgám kewe tvràrì svng vle lúnlvm shvngbe nø dvzaqshì vdu longe. Wedø lvpat tvrà taq yaklvm bvnchvtrì, shìwvtrì wawe mvvl we la ínìnø àngdèò lvpat tvnù mànggá rì wawe gø vpø ringlvm mvvl long. Yakwe shìwvtrì dvhø kèní lúnshì rawe vjú rì wa vsvng tiqgø dvpat vjú vlnø ring we íe. 

Weratnø kratcøm we tvrà nø mvkrøm nvdøprì ínø àngdèò lvpat tvrà taq cvn dvtøpshì dvzvŕ we tvrà tiqlòng gø íe. Werat welòng svng nø àngdèò lvpat tvrà kaq tvrà dvtanā we shølshú svra wanø vtoshì ràwe svng shvdøm we íe.

Kratcøm we tvrà wawe nø lvpat zìdang vháng mvyø dang svnggø tubùm dvbangā lúnwe íe. Tiqkvt kvt àngdè taq cøm vnønwe tvràrì bonglong dvgvp mèpvng svng vwángshì lvm ímá, mø:í ni vzang lvp svng zvn dvtut dí dvzaq shìlvm má wawe tvrà tiqlòng svng rvsvngshì ràlonge.

Kratcøm we tvrà taq kèní vko vkáng àngshvr svng gø dvtanā lúnwe ínø we tvrà taqkèní àngdè tiqgø svng dvgá tvrà rì svnggø tóngā lúnwe gø íe. 

Kratcøm we tvrànø nàsvng téwa vháng vlún dvzvŕ we mvtaq lvpat tvrà wawe àng lvjøm svng shvngøt dvtú lúnwe gø íe.

Vlé shìwe tvrà rìí vsvng shvlá tiqgø bønlún lvm tvrà svng dvtanā lún:e.

Àngdèò mànggá rì svng vlíng vpo dvzvŕ lúngòe. Nà tiqgø taq la kratcøm we vléshì we tvrà rì tuqlong dvgvp àngdènø àngdè shvlá wa vrá sun dvtøpshì ràlonge. Ngàí pàratnø vlé:ngòwe, pàrat kratcøm we íemá walòng svng nøtsun dvtøp shìlvm vchyak we íe. We kat vléshìvm we tvra taqkèní paqzí lushìnø vrá dvtøp shìwe yángkèní jòrnø ongwe tvrà svng lúnshìlvm ílonge.

Weratnø kratcøm we tvrà nø vsvngrì tiqgø vrvm taq vhømshì wewa ínìgø welòng yángkèní mvkrøm nvdøprì lushìnø àngdèò lvpat tvrà, tvnù mànggá rìsvng shvlá vtang vrangshì laqlúnì wang dvtit tvle svngkà yayáng naròe.