Jòrlvm tvrà dvpat tvlú dvgø shìwe dang

Tvlú dvgø shìwe svng vsvng tiqmaq taq mvshóng shìwe svng yánglún shìe. Téwa rvtø angdong taq pøq pøq nan wawe laqyà vl vsvngrì nø téwa mvshóngshì we svng yánglún shìe. Wedø rvtø angdong vdòng taq mvhøt mvhè èwáshì lòngnø nøt mvsøn svng mvhøt nø dang angpvn taq vnøn dvzvŕ sháò we gø íe.

Shóngshøngwe zìlàngré vnvm vchangrì tvlú dvgø shìwe taqkèní lúnshì we vjúrì taq bvnchvtrì svng yùldø pvran lúnshì we, tøp tøp wa nøt shøm dø wálún shìwe nvngòn vl we nvng gùn dvtøp lúnwe svng yánglún shìe. Tvlú dvgøshìe wawe taq angdèò ni vrvm cúnshàì we lvpat taq tiqni tiqni ámlvm aqlvm rìsvng lá vshøp shàì nø dvgø shàì padø lvpat bvnlìrì dang vrvm taq gø tvlú dvgø shì shálvm, we laqyà gvl shìlvm svng shøn mvyø we íe.

Wedø angdè lvpat taq tvlú dvgø shìshá ràwe dang nvng singnø American Danmvdaqpè Abraham Lincoln kèní shøn shvdøm we kà tiqlòng taq "ngàí shøng tiqtøng svng rømlvm dvpat rvtø nari 8 dàm la vlwe ínìnø nari 6 dàm nø wurdi heshøng lònge' wanø shønwe kà vle. Wedø írat tvlú dvgø shìe wawe nø angdè nvng singwe bvnlì døngjá rìdvpat ràwe dangrì taq tvlú dvgø shì lvm svng shøm mvyø we íe.

Nvmbøng shø taq bvnlì wawe vsvngrì, nímzì bvnlì wawe vsvngrì, paqzí vdèrì dø íwe lvpat zìdang vhánglún we vsvngrì shvngbe nø angmaqò bvnlì tvnù mvnggá rì lúnlvm dvpat tvlú dvgø shì nø dvzaq shì wewa íe. Ínì nø nøngmaq gø vrvm taqø gø kadø íwe dang taq tvlú dvgø shàìe má?

Chvpdap bvnlì taq tvlú dvgø shìwe walòng nø yùl yùlcè wanø mø:í long. Rvtø lushìnø nvngòn kùngàrì zángshàì weí zè zè wa wáshì ràwe gø vhøm shì ràwe ínø nøngmaq taq wá mvshóng shàì wegø íe. Ínìgø jòr we tvrà nø welòng taq wa cvnwe íe. Tvlú dvgø shìwe tvrà kèní shvla we síngshá nøtrì nvng nøt mvsøn kùngàrì lúnshì we gø íe. Jòr we lvpat svng vtoshì lúnlvm dvpat nø tvlú dvgø shì ràlonge.

Tvlú dvgø shìwe taqkèní angdè góng angdè kámshì nøt svng lúnshì we ínø angdè góng angdè kámshì wenø angdè cvndøng we tvrà taq jór nvngòn svng bøn dvzvŕ we íe. We dø tvlú dègø shìwe rvtø taqø gø shvrúng we nøt kèní nøtrat shìnø wáshì lvmgø gvzà vchyak we íe. Wedø mø:í nìnø jòrlvm tvrà nvng vsvr nø angdèò nvngòn kùngàrì, rvtø rìsvng dècømò we nvng vbóng:vme. Angdèí èwá lúnò we zìdang taq vto shì lúnwe nøt gvl shìnø ngà taqkèní kàpà svng mvdøng wá vdue walòng manggá taq nøtrat shìnø èwàò.

Ngà taqkèní pàwálvm yadø tvlú dvgø shì nø wangòe walòng svng shvlá wa síngshá shìràe. Tiqkat kvt vdèî èwàò we bvnlì manggárì, dvlàrì nø kàpà íe wàlòng svng mvsíng shá shàì we gø bøn sháshìe. Wedø nøt shok lvmrì bung ra dvgvp rvtø lushì nø sun dvtøoshì lvm nvng mvdàm kaq shønbøshà we dø tiq dvchá nøt løpshì nø wàlvm vchyak longe.

Tvlú dvgø shìwe nø bvnlì svng bò bò dánglún lvm dvpat wa mø:í we bvnlì svng jòdø kømgøm wálún we svng dvtøp lvm vchyak we íe. Yakwe rvtø rì svng yùldø wálún dánglún lvm dvpat dvlú èwàò nø dvgø shì we wa íe. Wedø íratnø shóngshøng we zìlàngrérìe angdè lvpat taq bøn mèyø we jór mèyø we dangrì gvzà vl longe.

Nàtaq kèní kadø íwe dangrì taq jór mèyø we svng shvng shvng wa síngshá shì ràe. Wedø síngshá shì bø kvt kèní jórlún, bønlún lvm dvpat tvlú dvgø shìwe bvnlì rì wá èpvngshì weí nàò lvpat tvnù mangárì kaq mvn mvn èwàò nø dèzaqshì. Wekvt jór lúnwe angshí angwvt rì nàí vtoshì lúnlvm wa ílonge wanø paqzí dvkømwe tvtit tvle svngkà yayáng naròe.