Jòrnø zìdang vháng lúnwe làngrérìò jàng laqyà 7 dang

Jòrnø zìdang vháng lúnwe làngrérìò jàng laqyà 7 dang

Vsvng tiqgøò jàng laqyà wawe taq ang vlwe kulwàng nvng shvngøt vjøn we taq cvnnø tiqgø nvng tiqgø taq vshaí vmwe íe. Jàng laqyà wawe nø angdè tiqgø nøt taqkèní mèdøm shìdø wá vdu we laqyà íe. Wedø íwe laqyàrì taq vshøm pvn vl we svng yánglún shìe.

1. Shvla we jàng laqyàrì; tasvng vpø shvring ké sháò we, tvlú dvgø shì sháò we, tiqdá vsvng kaq nøt vtoā sháò we.

2. Mà shvla we jàng laqyàrì; dang vrvm taq mà shvla ku wa yáng sháò we, nøt dvcvmshì we nvng tiqdá vsvng kaq mvrà shvri sháò we.

3. Shvla we nvng mà shvla we gøn vshú laqyà; tiq kvt kvt vsvngí vpø shvring vdu dø wáshì lún we ínì gø tiq kvt kvt vsvng rìnvng màbóng dø chá vle wáshì vsvngrì wanø yánglún shìe. Angdè ò jàng laqyàrì taq kèní angdè tiqgóng dvpat vjú zílún we dø tiqdvchá màshvla we laqyà ígø angdè lvpat svng gvyaqshì sháò we íe.

Lèga vru svra tiqpè íwe Samuel Smiles shøn yàngì we taq "nøtí dèdamò long nø èwàò we dang svng bøn lún dvzvŕe, èwàò lòng taqkèní jàng laqyà svng bønlún we ínø, we jàng laqyàrìí mvngnø angdèò vzànglap lvpat svng bønlún dvzvŕ we íe. We jàng laqyà wawe rì taqkèní shvla we svng bønlún we dø tiqdvchá màshvla we svng gø bøn dvzvŕ sháòe".

Angdèí dèdamò werì taqkèní jàng laqyàrì svng vlíng vpo shì dvzvŕ lúnwe svng Samuel Smiles íshøn vtàn yàngà we íe. Vsvng tiqgø taq angdè wá jømnø kadvgvp gø wásháò we laqyà tiqlòng svng angdèò jàng laqyà wanø shøn lúnshì we ínø angdè í wá mèjøm we laqyà tiqlòng svng wálún lvm lvm dvpat nø rvtø lushì nø shvmun shì weí wá dvzaq shì ràwe íe.

Nøngmaq shvngbe taq shvla we laqyà tiqlòng svng shvtìn lvm nø yùl we ínì gø shvla we laqyà tiqlòng svng wálún lvm dvpat nø rvzaq we íe. Vsvng tiqgø taq cvmré lvpat taq nø jàng laqyà vlíng vpo shìlvm yùl we ínø vsak tevm we tiqgø dvpat jàng laqyà rì vlíng vpo shìlvm yake wanø paqzí vdè rìí gùn dvtøpwe taqkèní shálúnshì e. Jòrnø zìdang vháng lúnwe làngrérìò jàng laqyà wawe nø kapà rì íemá?

1. Angdè góng angdè kámshì we nøt kèní wáshì sháò we, angdèò bvnlì døngjárì taq kámshì we nøt kèní vsvngrì nvng vdu vbóng dø vtoq vtipshì sháò we nvng lvpat zìdangrì taq téwa vháng lún mvyø we nøt kèní nøt gvlshìnø dvzaqshì sháò we.

2. Tvnù mangárì gvlshì nø dvzaq dvkángshì sháò we laqyà rì gvlshì we. Tvnù mangárì wawe taq angdè yøpnvng shøngran taq dèdamò we tvnù manggá nvng we tvnù manggá svng tuqlún lvm dvpat chvpdap bvnlì kèní mvti mvni wá dvzaqshì sháò we.

3. Vchyak gvl nø bvnlì wá sháò we, vsvng tiqmaq taq àngdèò dvdam shìwe manggá rì svng tuqlún lvm dvpat wáshì ràwe, vchyak gvlshì ràwe nø kapàrì íwe svng síngsháò nø gvlshì we ínì gø welòng svng cvndøng we taq tvrà vyuq vmwe vsvngrì gø gvzà yánglún shìe. Kàshvbóng; angdè tiqgø nø tuqrawe 10 nøng vdòng taq bvnlì gvbà tiqlòng angkàng mø:í ni svté mvgàm tiqgø bøn lvm dvdam shìnø dvzaqshì we vdòng we zìdang svng Shi mvtuq we tvrà taqni tvnù mangá língshì sháò we.

4. Vní lvp taq vjú vl nø jòr we dang svng wá dvzaqshì we, vní lvp taq jòr lvm wawe taq angdè dvpat wa vjú vlnø jòr we svng wa dvdam shìwe dø mø:í nø tiqdá vsvng kaq gø vjú ziwe tvrà svng wá lúnlvm svng shøn mvyø we íe. Yalòng nø angdè taq wa vjú vl dø angdè shòng dø wa laqí wawe nøt laqyà mø:í nø tasvng vní lvp dvpat vjú vl dø dvdamā nø wáshì we svng shøn mvyø we íe.

5. Vsvngrì ò shøn kà shvlá wá táā ràwe, vsvng tiqgø taq vnà vní lòng nvng nvngøp tiqlòng vl we ínø tiqdá vsvngí angdè svng shønkà téwa táā lún dáng ràe wae. Wedø táā lún bøwe mèpvng taq wa angdèí kadø shøn ràwe walòng svng dvtøp lúnshì we íe.

6. Vsvngrì nvng vzøm nø bvnlì wáshá ràwe, vsvngrì nvng bvnlì wáshá ràwe wawe taq angdè tiqgø shóngshì dø wá mø:í dvgá tiqgø wámshì dø wagø mø:í nø vsvng mvdò nvng nøt vráwe vzøm we vdòng taq bvnlì wáshá we laqyà svng shøn mvyø we íe.

7. Angdè taq kùngà vnøn we dangrì taq vrá vrangshì shá ràwe, angdè góng angdè lvpat taq kadø íwe dangrì taq nøshvla we ínø kadang taq kùngà vnøn we ímá? Walòng svng dvtøp nø kungà lushì, vrangshì we dang taq dvzaqshì lvm gø gvzà vchyake. Mvdàm kaq tábøshà we jàng laqyàrì 7 dang taqkèní 3 dang nø angdè tiqgøò nøt mvsøn nvng singwe ínø ngámshìwe 4 dang nø vsvngrì ònøt mvsøn nvng vdu vbóng dø wáshì ràwe svng tvnùng we íe.

Yadangrì taq zøm shàì weí angdè lvpat zìdangrì dvhàng shàì weí angdèò lvpat tvnù manggárì svng jór lúnwe làngré lvpat svng vtoshì laqlúni.