Jór nònggwòn vtoshì lúnò we vsv̀ngrì taqkèní rvtø̀ svng vwa dø mà dvzøò we 

Jór nònggwòn vtoshì lúnò we vsv̀ngrì taqkèní rvtø̀ svng vwa dø mà dvzøò we 
Lvpat taq jór nònggwòn vtoshì lúnò we vsv̀ngrì nø àngmaqò lvpvt taq vdè jór mvyǿwe dvdam tvnù manggárì gvlshì we gø íe. We manggárì svng tuqlún jórlún lv́m dvpvt rvtø̀ rì svng lúnshì dángte lvjang shìnø lángshì wegø íe. Rvtø̀rì vwadø bélv́m dangrì svng gø svdiq vyáshì nø vlwe gø íe. 
Nari rvtø̀, second vrv̀m kaq svng àngmaq dvpvt vjú vldø langshì we íe. Vrá nø lvpvt taq jór nònggwòn svng vtoshì lúnwe vsvngrì nø Social media rì mvdàmø wa vwadø rvtø svng mà dvtǿmshì wegø íe. Àngmaq taqkèní rvtø̀ rìsvng vjú vlwe dang kèní wa langshì longwe svng gø yv́ng lúnshìe. 
Lvpvt taq jórlúnwe vsvngrì nø àngmaqò rvtø̀ àngni rì svng dvdam shaq manggá dvlàrì mv-vl shaq kadvgvp gø mà shvle lúngò. Rvtø̀ angni tiqni nvng tiqni svng kadø vchvk we bv̀nlìrì kèní cúnshì lúnlv́m wawe tvràrì svng shvng shvngwa síngsháshì wegø íe. 
Vdèò lvpat taq jórnònggwòn rì vtoshì lúnlv́m dvpvt nø shvlawe dvdam nøtrì nvng manggá rì svng gvlshì ràwe gø íe. Jórlún lv́m tvrà taq vdè svng vgám kewe tvrà nø wedø shvlawe nøt mvsø̀nrì nvng manggárì mv-vl longwe kvt bǿn dvzv́r sháò wegø íe. Weratnø lvpvt taq jór lúnwe vsvngrì nø àngmaqò rvtø̀rì svng vjú vlwe dangrì taq zíshì we gø íe. 
Lvpvt taq tiqnv̀msháni jór nònggwòn vtoshì lúnwe vsv̀ngrì nø vdè nøt kaq svng vtøp dvzv́r we tvràrì mvngø̀r we tvrà rì svng gø lún dángte gur dvzaq shì nøt we dangrì svng yilshì lúnò we gø íe. Àngmaq taqkèní toni ò lvpvt mvrùmè rì døíwe vsvngí wàò we dang kèní mǿí we tvrà rì svng gø kadøwa vle lúnlv́m wawe dangrì svng gø nøt cun dvtøpshì sórí cúnshì we vsvngrì íe. 
Lvpvt taq jórnònggwòn vlwe vsvngrì nø vle bøwe rvtø̀rì taq vdè taqkèní vléshì bøwe dangrì vrv̀m taqwa gø rvtø̀ mà dvbéò nø v́l dvzaqshì longe. Vsvng wawe nø tiqgǿ vrv̀m taq vléshì we tvrà rì nø wedøni vl longe. Wedø vléshì we tvràrì taqkèní nøt màdvcv́mshì shaqí we dangrì taqkèní màng paqzí mvkrǿm mvdøprì lushìnø̀ dvzaqshì we vsv̀ngrì nø jø̀ng jǿngni jór lúnwe tvrà svng tuqlún we gø íe. 
Jór nònggwòn svng vtoshì lúnwe vsvngrì nø tiqdá vsvngrì ò jórnònggwòn svng yv̀ngnø̀ nònggwòn lushì só:rí vdèò manggá svng  gø jór lúnhøq dvzaq shì we íe. Jór nònggwòn svng vtoshì lúnwe vsvngrì nø vdè ò lvpat jór lúnwe tvrà svng wa kadvgvpgø nøt cun dvtøp shìwe vdòng taqkèní dvzaqshì we ínø tiqdá vsvngrì ò jòrwe tvrà rì nvng dvtutshì we dang wá vyáshì wegø íe. Weratnø vdè ò lvpat jór lún lv́m tvrà taq lvpat rvtø̀ rì svng shvlá wa vjú vldø lángshá lv́m, tiqdá vsvngrì ò shvlawe dangrì kèní paqzí lushì shálv́m nvng vdè ò lvpat jór lúnlv́m tvrà svng dvdam dvtøp shì lv́m gvzà vchvk we dang shvdǿm we íe.