Jór nvngòn lúnshì lvm dvpat díràwe gòngre

Tiqdá vsvng kaq shóngshì lúnwe wawe taq angdèò shèrwe nøt mvsøn vlràe. Vsvng tiqgø nø tiqdá vsvng kaq nvrøm zadø èwàòwe, nøt mvsøn damá èzíòwe, kà svdiq mvdøng we mvrà vroqã we svng wáshì ràe. Wedø wáshì lvm dvpat rvtø angdong taqkèní wámvlú shìwe ínìgø rvtø naq ra dvgvp síngrál nøt kèní shvla lvpsvng vpo dvzvŕ we íe.

Angdèò lvpat nø tiqni mvdàm tiqni témvn shìwe ínø vdèò wur vnípa vl we taqkèní tiqpa nø vdè góng vdè gønshaq dvpat ínø dvgá tiqpa nø tiqdá vsvng kaq dvbangã lúnwe laqí daq.

Vsvng gø vrvm taq tiq dang dang taqnø jór nvngòn vl we wa íe.tiq kat kat we dang svng angdè góng angdè mèsháshì we ínìgø nøng maq dvhø tasvng síngsháã kéì weí shvngøt dvtú kérà we íe.

Tiq kat kat vsvngrì taqkèní angdè góng svng yáng mvtàmvm we, mvwám shì we nøt gvlshì lvm svre weí angdè taq vl we jò we nøt laqyà rìkaq svng mashì sháìe. Tiq kat kat tiqdá vsvng kaq mèkám kèò we gø angdè góng angdè dvshá washì we ku gø bøn sháò we svng døm shá ràe.

Mvzi dvyø èkatnò we kèní telong we angtøng svng dvdam shìlvm vle. Angvng we dø dvté lúnlvm dvpat angye svng rvgaq taq kat rà longe, we mèpvng angnø dvjáng zønli angpvn pvn vkøn longwe dvhø taqkèní ku dø ku dø témvn shì longe. Wedø vkøn dvjángrì svng svre nø nøt dvcvm shìwe ínì nø kadø gø jòrnø vháng lúnlvm tvrà mvl long.

Shóngshøng we zìlàngrérìe angdè lvpat taq angdè èkám shìwe dang taq nøt ratshìnø dvzaq shìlvm gvzà vchyake, angdè góng angdè laqyàrì mashàì we laq mvl, la angdè taqkèní mèsíng mèsháò we vl rawe rvtø taq tiqdá vsvng kèní paqzí lushì, røtshì we nø shvlá vtang íe. Vsvng ígø waòe wanø vdú vna mvwá shìlvm vchyake. Vdè góng vdè síngshá shì weí angdèò manggá svng angdè shóngshì we tvrà kèní wáshì lvm nvngòn zí mvyø we íe.

Dang vrvm nø tiqni rvtø taq døm nø zøvm tinvm we wa íe. Angdè nø kadángte shèla we mèshèla we ínì gø tiqni taqnø vdángvm we wa ílonge. Wedø írat nø ni vrvm angdèí èwá lúnò dángte svng mvn mvn wá dvzaq shàì nø vpø shvring shì laqsháì.

Lvpat tiqlòng taq jøng jøngni nøt mvshømlvm nøt tøn shìlvm nø angdèí dèdamò we tvnù manggárì lúnshì we mvlúnshì we nø mvdøng mø:í, we tvnù manggárì mèdè damòwe nvng manggá mègvlshì lòng màng ílonge. Wedø írat nàí dèdamò we tvnù manggá svng shóngshì we nøt kèní mvn mvn wá dvzaq shìlvm nvng vsvng nvng vdu vbóng dø vtoq vtip shì lúnlvm lvm gø vchyak we íe.

Nàí dèdamò werì tvnù mangárì nø nà tiqgø nvng wa sing we íe jór nø bøn lúnhøq shaq dèzaqshì. Angdèò tvnù mangárì svng jórlún lvm dvpat dírà we tvrà nø gòngre tiqlòng nvng vbóng longe. We gòngre danggvp vrvm taq nàò nvngòn kùnggàrì zángshì nø mvn mvn èdi we ínìnø jøng jøng ni tiqni taq nàí dèdamò we tvnù manggá svng jór lún tuqlún lvm wa íe.

Mvgam màshvla we dang taq kèní èkámshì we la ínì nø jór we tvrà svng mvtuq dø nàsvng nàgám kelong we svng síngshá ràwe svng shvdøm nø nvngòn ziwe dvtit dvle shvngkà yayáng naròe.