Kàrushøprì rø dvzaqshì wenø vsv̀ng tiqgǿò lvpat svng dvcøp shvdøngā lúnwe

Kàrushøprì rø dvzaqshì wenø vsv̀ng tiqgǿò lvpat svng dvcøp shvdøngā lúnwe

Kàrushøprì luq luq rø dvzaqshì wenø vdèò nøt mvsø̀n síngrál nøtrì nvng dvdamshì we tvnù manggá rì kaqsvng gwaq dvzv́r lúnwe gø ínø̀ téwa jórnònggwòn dvpvt gø tubùmā lún tiqlòng gø íe. Lvpvt taq bø̀ngshvngwe vsv̀ngrì àngmaqò lvpat mvshǿl rì svng èyv̀ngvt nò dvgvp àngmaq ò lvpat tvnù manggárì vrangshì lúnlv́m dvpvt nònggwòn kù:ngàrì dvkángshì we dangrì svng yv́nglúnìe. Vdèò lvpat taqgø téwa yuqyà we shø̀nran rì vl lv́m dvpvt téwa ngàngdøngwe lvpvt tvràrì vrangshì lún lv́m dvpvt nøt mvsø̀n àngshv́r rì svng gø vtoshì lún dvzv́r we gø íe.

Shóngshø̀ngwe shòlaqré vnvm vchvngrì vdèò kámnøt tvrà kèní vjúrøt dvzaqshìwe gø vchvk mvdø̀ng tiqlòng íwe rat we tvrà taq vnøn rawe rvtø̀ rì taq yaklv́m shìwvtrì gø àngpv̀n pv̀n vkǿn rawe ínø vjúrøt dvzaqshì we tvrà kèní jór nònggwòn wawe ìshøt jejúrì vtoshì lúnwe gø íe.

Vránø nøngmaqò lvpvtrì taq jórlún lv́m dvpvt dvzaq dvkáng shàì we rvtø̀ pàgø wá mvlúnì, wá mvneshì, nøt dat nøt vtang lv́m døíwe tvrà rì vhǿmshì rawe kvt nøt mà dvcv́mshì shaqí pv̀nyv̀n dvzaqshì lv́m vchvk wegø íe.

Rvgaq yachyàng mvdàm taq pà tiqpv̀ncè gø vwadø mvlún shì, àng dvpǿ nvng àng vlwe íratnø we àngdvpǿ kuni zíshì ràlongwe gø íe. Tvnù manggá gvlshì we vsv̀ng tiqgǿ nø we tvnù manggá svng tuqlún lv́m dvpvt we àng dvpǿ svng gø dvgǿ shìshaq írà longe. Àng dvpǿ wawe taq vdèò kùngà shaq svng shǿn mvyǿwe gø íe. Vdè taq tuqrawe lún vkángrì svng zǿmshì só:rí welòng svng chvkwa wálún ràlong we gø íe. Kùngà vnǿn rawe rvtø̀rì tønnøt shøpshì ràwe rvtø̀rì gø vl longe wedang rì svng vle lún lú:ngòwe tiqni taqnø jøng jǿngni vdèí dèdamò we lvpat tvnù manggá svng tuqlún lv́m ílonge.

Vdèò lvpat tvrà taq wá vléshì bøwe tvràrì bv̀nlìrì gø wedøni vl longe. Wedangrì kèní nøt dvcv́mshì nø vnǿn lv́m wáshì mvdaq. Vdèí dèdamò we tvrà kèní cúnshì lúnlv́m dvpvt vdè nvng singwe vsv̀ngrì dvhø taqgø vdu vbóngdø vzø̀m vzvpnø vtoq vtip lún lv́m gø vchvk we íe.

Vdèò bv̀nlì rì taq vpǿnøt kèní lúnshì rawe àngshí àngwvtrì svng dvdam shàì nø wálún lv́m gø vchvk we íe. Vdèò lvpat bv̀nlìrì taq vdèí dánglún dángte nøt mvsø̀n kù:ngàrì zángshì nø dvzaq dvkángshì lv́m gø vchvk we íe. Weratnø mèpv̀ng lvpsvng vnǿn lv́m mv-vl vzàng lvp tvrà svng dvjaqnø dvzaqshì lúnwe laqyàrì gv́lshì nø dvzaqshì lv́m nònggwòn ziwe íe. Lvpat taq vsǿm zíshìwe tvrà rì nø tiqkvt kvt vdèò laqyà tiqlong ku bamshì shálúngò we írat wedang svng svdiq vyáshì lv́m shvdǿm nø nònggwòn ziwe íe.